សង្គមអន្តរជាតិ
អន្តរជាតិ
គ្រូម្នាក់នៅអាហ្វ្រិកខាងត្បូងបាត់បង់ការងារដោយសាររូបថតសិស្សស្បែកស និងស្បែកខ្មៅ អង្គុយដាច់ពីគ្នា
× កុមារស្បែកសប្រមាណ១៥នាក់អង្គុយនៅជុំវិញតុធំមួយ ចំណែកកុមារស្បែកខ្មៅ៤នាក់ត្រូវបានដាក់ឲ្យអង្គុយនៅឆ្ងាយពីនោះបន្តិច។ រូបថតនេះ ត្រូវបាននៅថ្ងៃបវេសនកាលនៅសាលារៀន Schweizer-Reneke នៅខេត្តដាច់ស្រយាលមួយក្នុងប្រទេសអាហ្វ្រិកខាងត្បូង។
យោងតាមការផ្សាយរបស់សារព័ត៌មានអាហ្វ្រិកខាងត្បូង Times LIVE អ្នកគ្រូម្នាក់ បានផ្ញើរូបនេះ ចូលក្នុងក្រុម WhatsApp ទៅកាន់ឪពុកម្តាយសិស្ស ដើម្បីប្រាប់ថា ការបង្រៀនចាប់ផ្តើមហើយកាលពីថ្ងៃទី៩ ខែមករា។ ភ្លាមៗនោះ រូបថតត្រូវចែកចាយពេញបណ្តាញសង្គម ដោយក្រុមអាណាព្យាបាលបានប្តឹងទៅសាលារៀន ទាក់ទងនឹងការរើសអើងក្នុងសាលា។
អ្នកស្រី Thuli Madonsela មេធាវី និងជាអ្នកនយោបាយម្នាក់ បានចោទសាលា Schweizer-Reneke ថា នៅជាប់កម្អែលរបបអាប៉ាថេត (Apartheid) ដែលរើសអើងជាតិសាសន៍។ ក្រោយការតវ៉ា និងទាមទាររបស់ក្រុមសមាជិកបក្សប្រឆាំង និងតំណាងសហជីពគ្រូបង្រៀននៅអាហ្វ្រិកខាងត្បូង ភាគីសាលា បានអះអាងថា វាជាជម្រើសរបស់សិស្សទាំងនោះ ដែលដំបូងឡើយ ពួកគេបានអង្គុយជុំគ្នា។
នៅថ្ងៃដដែល លោក Sello Lehari ប្រធានមន្ទីរអប់រំខេត្ត North West បានទៅកាន់សាលាដោយផ្ទាល់ ហើយបានបើកការស៊ើបអង្កេត និងដកគ្រូបង្រៀនដែលបង្ហោះរូបនោះ ចេញពីការងារ។ តាមការដកស្រង់របស់ Times LIVE ភាគីសាលាបានអះអាងយ៉ាងមុតមាំថា ករណីនេះមិនមែនជាការឆ្លុះបញ្ចាំងពីគោលការណ៍ពិតប្រាកដរបស់សាលានោះឡើយ។
ថ្នាក់ដឹកនាំម្នាក់របស់សាលា បានលើកឡើងថា សិស្សទាំងអស់សុទ្ធតែបានបង្ហាញពីការសប្បាយចិត្តរបស់ខ្លួននៅថ្ងៃបវេសនកាល ដោយពួកគេមិនគិតពីរូបរាងពណ៌សម្បុរនោះឡើយ។ បន្ថែមពីលើនេះ សាលាក៏បានបង្ហោះរូបថតជួបជុំគ្នារបស់សិស្សទាំងអស់ផងដែរ៕
© រក្សាសិទ្ធិដោយ thmeythmey.com