ជាតិ
លោកថោង ខុន ប្រាប់ អាជ្ញាធរខេត្តកំពង់ឆ្នាំងឲ្យត្រៀមខ្លួនជាស្រេច មុនពិធីបុណ្យទន្លេចាប់ផ្តើម
រូបភាពពីទំព័រហ្វេសប៊ុកក្រសួងទេសចរណ៍
×![]()
ដោយ: ភួង វ៉ាន់ថា
បុណ្យទន្លេឆ្នាំ២០១៩នេះ នឹងរៀបចំនៅក្នុងខេត្តកំពង់ឆ្នាំង ចាប់ពីថ្ងៃទី១៥-១៧ ខែមីនា ក្រោមប្រធានបទ«ទន្លេ៖ ផ្សារភ្ជាប់សន្តិភាព ប្រជាជន និងទេសចរណ៍»។ មុនពេលកាលបរិច្ឆេទរៀបចំពិធីមកដល់ លោក ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យរដ្ឋបាលខេត្តនេះ ខិតខំរៀបចំរបៀបរៀបរយ សណ្តាប់ធ្នាប់ អនាម័យសាធារណៈ ពិសេសក្នុងទីក្រុង តាមដងទន្លេ។
តាមទំព័រហ្វេសប៊ុករបស់ក្រសួងទេសចរណ៍ លោក ថោង ខុនបញ្ជាក់ដូច្នេះ៖ «រដ្ឋបាលខេត្ត និងមន្ទីរទេសចរណ៍ មន្ទីរពាក់ព័ន្ធនានាក្នុងខេត្ត ត្រូវខិតខំចាប់យកឱកាសនៃការប្រារព្ធពិធីបុណ្យទន្លេលើកទី៥ ផ្សព្វផ្សាយលើកកម្ពស់ការយល់ដឹងសាធារណៈ ពីភាពស្អាត និងបៃតង ថែរក្សាបរិស្ថានទន្លេ បរិស្ថានទីក្រុង លើកកម្ពស់គុណភាព ផលិតផល និងសេវាទេសចរណ៍ឲ្យបានល្អ។ ត្រូវខិតខំស្រាវជ្រាវ និងពង្រីកគោលដៅទេសចរណ៍ថ្មីៗឲ្យបានច្រើន ឲ្យសមជាខេត្តដែលសម្បូរទៅដោយសក្តានុពលទេសចរណ៍(វប្បធម៌,ប្រវត្តិសាស្ត្រ,ធម្មជាតិ)ដ៏សម្បូរបែប ពិសេសទេសភាពតាមដងទន្លេ»។
ទន្ទឹមនឹងនេះ លោករដ្ឋមន្ត្រីក៏បន្តជំរុញរដ្ឋបាលខេត្ត ឲ្យពង្រឹងសន្តិសុខ សណ្ដាប់ធ្នាប់ សេវាម្ហូបអាហារ រមណីយដ្ឋានទេសចរណ៍ បង្គន់អនាម័យសាធារណៈ និងចល័ត បញ្ហាអនាម័យ បញ្ហាសំរាម តាមដងទន្លេ ទីផ្សារ រមណីយដ្ឋានស្អាត និងត្រូវរៀបចំពិព័រណ៍ម្ហូបអាហារ ពិព័រណ៍ផលិតផលក្នុងស្រុក ព្រមទាំងត្រូវរៀបចំ កម្មវិធីសិល្បៈ ព្រឹត្តិការណ៍កីឡា និងពិធីផ្សេងៗឲ្យបានល្អផងដែរ។
គួររម្លឹកថា កាលពីខែមីនាឆ្នាំ២០១៨ បុណ្យទន្លេលើកទី៤ ធ្វើឡើងនៅខេត្តកណ្ដាល ក្រោមប្រធានបទ«មិត្តភាព និងនិរន្តរភាពទេសចរណ៍»៕
Tag:
បុណ្យទន្លេ
កំពង់ឆ្នាំង
© រក្សាសិទ្ធិដោយ thmeythmey.com
