ជាតិ
លោក ប៉ាវ ស៊ីណា នឹងចូលបំភ្លឺជុំវិញបទចោទញុះញង់ឲ្យប្រព្រឹត្តបទឧក្រិដ្ឋ នៅថ្ងៃទី១៧ មករា
× ភ្នំពេញ៖ តុលាការខេត្តកំពង់ស្ពឺកោះហៅលោក ប៉ាវ ស៊ីណា ប្រធានសហភាពចលនាកម្មករកម្ពុជា ឲ្យចូលបំភ្លឺនៅថ្ងៃទី១៧ មករា ជុំវិញបទចោទញុះញង់ឲ្យប្រព្រឹត្តបទឧក្រិដ្ឋ ធ្វើឲ្យខូចខាតដោយចេតនា មិនគោរពសេចក្តីសម្រេចរបស់តុលាការ ហិង្សាដោយចេតនាមានស្ថានទម្ងន់ទោស កាលពីថ្ងៃទី១២ មករា ឆ្នាំ២០១៦កន្លងទៅ។
សេចក្តីសម្រេចរបស់តុលាការ ឲ្យលោក ប៉ាវ ស៊ីណា ចូលខ្លួនបំភ្លឺឆ្លើយដោះសារពីការចោទប្រកាន់លើខ្លួន។ ការកោះហៅរបស់តុលាការនេះ ធ្វើឡើងបន្ទាប់ពីលោក ប៉ាវ ស៊ីណា បានដាក់ពាក្យប្ដឹងទៅឧទ្ធរណ៍ជុំវិញករណីខាងលើនេះ ក្រោយពីតុលាការដំបូងខេត្តកំពង់ស្ពឺ បានកាត់ទោសកំបាំងមុខ កាលពីថ្ងៃខែធ្នូ ឆ្នាំ២០១៨កន្លងមក ដោយសម្រេចឲ្យលោក ស៊ីណា និងមនុស្ស២នាក់ទៀត ជាប់ទោស២ឆ្នាំ ។
លោក ប៉ាវ ស៊ីណា បានបញ្ជាក់ថា លោកនឹងចូលបំភ្លឺតាមការកោះហៅរបស់តុលាការនេះ។ ថ្លែងប្រាប់សារព័ត៌មានថ្មីៗ ប្រធានសហភាពចលនាកម្មកររូបនេះ បាននិយាយបែបនេះថា៖« យើងខ្ញុំគឺជាជនរងគ្រោះ ស្ទើរតែបាត់បង់ជីវិត។ តែអាជ្ញាធរខេត្ត និងមន្ត្រីតុលាការ បែរជាបង្វែររឿងឲ្យយើងខ្ញុំ ក្លាយទៅជាជនល្មើសទៅវិញ»។
បទចោទញុះញង់ឲ្យប្រព្រឹត្តបទឧក្រិដ្ឋ ធ្វើឲ្យខូចខាតដោយចេតនា មិនគោរពសេចក្តីសម្រេចរបស់តុលាការ ហិង្សាដោយចេតនាមានស្ថានទម្ងន់ទោស ដែលមានចែងក្នុងមាត្រា ៤៩៥ ៤១០ ៥២៣ និងមាត្រា២១៨ នៃក្រមព្រហ្មទណ្ឌ៕
Tag:
ប៉ាវ ស៊ីណា
ញុះញង់
បាតុកម្ម
© រក្សាសិទ្ធិដោយ thmeythmey.com