អន្តរជាតិ
ស៊ុលតង់ថ្មីនៃរដ្ឋប៉ាហាំង នឹងក្លាយជាមហាក្សត្រម៉ាឡេស៊ីថ្មី ស៊ុលតង់ថ្មីនៃរដ្ឋប៉ាហាំង ត្រៀមសោយរាជ្យជាមហាក្សត្រម៉ាឡេស៊ី (រូបភាព AFP)
× ស៊ុលតង់រដ្ឋប៉ាហាំង Abdullah Sultan Ahmad Shah នឹងក្លាយជាព្រះមហាក្សត្រថ្មីរបស់ម៉ាឡេស៊ី ដែលនឹងសោយរាជ្យបន្តពីស៊ុលតង់រដ្ឋកេឡាន់តាន់ Sultan Muhammad V ។ ស៊ុលតង់ Muhammad V បានក្លាយជាមហាក្សត្រដំបូងគេក្នុងប្រវត្តិសាស្ត្ររបស់ម៉ាឡេស៊ីដែលបានដាក់រាជ្យមុនចប់អាណត្តិដែលមាន៥ឆ្នាំ។ ពិធីជ្រើសរើសមហាក្សត្រជាផ្លូវការ នឹងធ្វើឡើងនៅថ្ងៃទី២៤ ខែមករាខាងមុខ ហើយពិធីសោយរាជ្យពេលក្រោយ។
ក្រោយដាក់រាជ្យគួរភ្ញាក់ផ្អើលរបស់មហាក្សត្រ Sultan Muhammad V តម្រូវឲ្យមានការជ្រើសរើសប្រមុខរដ្ឋថ្មី។ ក្រោមច្បាប់រដ្ឋធម្មនុញ្ញម៉ាឡេស៊ី មហាក្សត្រថ្មី ត្រូវជ្រើសរើសចេញពីស៊ុលតង់នៃរដ្ឋនានារបស់ប្រទេសតាមគោលការណ៍រង្វិលជុំ។ ដោយសារស៊ុលតង់ Muhammad V មកពីរដ្ឋកេឡាន់តាន់ មហាក្សត្រថ្មីរបស់ម៉ាឡេស៊ី ត្រូវដល់វេនស៊ុលតង់រដ្ឋប៉ាហាំងវិញម្ដង។
ស៊ុលតង់ Abdullah Sultan Ahmad Shah ដែលទើបជ្រើសតាំងជាស៊ុលតង់នៃរដ្ឋប៉ាហាំងនៅថ្ងៃទី១៥ ខែមករានេះ នឹងត្រូវជ្រើសរើសជាមហាក្សត្រម៉ាឡេស៊ីថ្មី។ ការឡើងគ្រងរាជ្យរបស់ស៊ុលតង់ Abdullah ជាវិធានការការបញ្ចៀសបញ្ហាមួយ ដ្បិតបិតារបស់ទ្រង់ គឺស៊ុលតង់ Ahmad Shah មានព្រះជន្មជរា និងព្រះឈួនផងដែលមិនអាចអង្គុយបល្ល័ង្គស្ដេចម៉ាឡេស៊ីបានទេ។ ដូចនេះទើបទ្រង់ Abdullah ដែលជារជ្ជទាយាទ ក្លាយជាស៊ុលតង់វិញ ដើម្បីឈានទៅការសោយរាជ្យនៅពេលខាងមុខ។
តាមការគ្រោងទុក សន្និសីទស៊ុលតង់ នឹងបើកកិច្ចប្រជុំនៅថ្ងៃទី២៤ ខែមករា ដើម្បីបោះឆ្នោតជ្រើសរើសមហាក្សត្រថ្មី ដែលស៊ុលតង់រដ្ឋប៉ាហាំងគឺជាបេក្ខភាព ហើយបន្តពីស៊ុលតង់ប៉ាហាំង គឺដល់វេនស៊ុលតង់រដ្ឋចូហរ។
ស៊ុលតង់ Abdullah ដែលជាបុត្រទី៤ របស់ស៊ុលតង់ Ahmad Shah ជាសមាជិករាជវង្សប៉ាហាំងដែលមានចំណេះដឹងច្រើន និងមានបទពិសោធក្រាស់ក្រែលផ្នែករដ្ឋបាលផង ដ្បិតត្រូវបានតែងតាំងជារជ្ជទាយាទរបស់ប៉ាហាំងតាំងឆ្នាំ១៩៧៦ ដែលពេលទើបព្រះជន្ម១៦វស្សាប៉ុណ្ណោះ។ ស៊ុលតង់ដែលមានព្រះជន្ម៦០វស្សាក្នុងឆ្នាំ២០១៩ នេះ កាន់កាប់កិច្ចការតូចធំក្នុងរដ្ឋមួយនេះតាំងពីឆ្នាំ២០១៦ មក គឺបន្ទាប់ពីបិតាទ្រង់មានព្រះសុខភាពកាន់តែទ្រុធទ្រោម។
ស៊ុលតង់ថ្មីនៃប៉ាហាំង ក៏ជាអ្នកចូលចិត្តវិស័យកីឡាដែរ ដោយធ្លាប់ជាអតីតប្រធានសមាគមកីឡាបាល់ទាត់ម៉ាឡេស៊ីពីឆ្នាំ២០១៣ ដល់ឆ្នាំ២០១៧ ។ សពថ្ងៃទ្រង់ជាប្រធានសហព័ន្ធកីឡាហុកគីទ្វីបអាស៊ី និងជាសមាជិកប្រតិបត្តិរបស់សហព័ន្ធកីឡាបាល់ទាត់ពិភពលោក FIFA ផង។ លោក Abdul Razak Mohd Kirir អតីតមិត្តរួមក្រុមកីឡាបាល់ទាត់របស៊ុលតង់ Abdullah បានសរសើរថា ទ្រង់ជាកីឡាករដែមានការផ្ដោតអារម្មណ៍ និងយុទ្ធសាស្ត្រជាប្រព័ន្ធ៕
Tag:
ម៉ាឡេស៊ី
Abdullah Sultan Ahmad Shah
© រក្សាសិទ្ធិដោយ thmeythmey.com