ស្អាត! ចិត្តល្អ! កញ្ញា លីលី ជាតារាសំដែងម្នាក់ដែលមានឈ្មោះពិតប្រាកដថា លឹម សុធាវី។ កាលពីយប់ឈានចូលថ្ងៃទី១៣ ខែមករា លីលី បានជួយសម្រាលកូនស្ត្រីកម្សត់ម្នាក់នៅតាមផ្លូវក្នុងសង្កាត់បឹងកក់១ ខណ្ឌទួលគោក។ កាយវិការដ៏ប្រពៃបែបនេះ ទទួលបាននូវការកោតសរសើរយ៉ាងខ្លាំងពីមហាជន ជាពិសេសអ្នកប្រើប្រាស់បណ្តាញសង្គមហ្វេសប៊ុក។ ជាងនេះទៅទៀត កញ្ញាលីលី តាមរកស្ត្រី និងទារិកា ហើយបានបន្តកៀងគររកមូលនិធិដើម្បីជួយដល់ពួកគាត់បន្ថែមផងដែរ។
«ខ្ញុំចេញពីមើលកុន រៀបនឹងបើកឡានចេញ តែដោយឮសំឡេងស្ត្រីម្នាក់ស្រែក រួមទាំងវត្តមានមនុស្សប្រុស៣នាក់ ខ្ញុំគិតក្នុងចិត្តថា ស្ត្រីរូបនោះរងការធ្វើបាប។ ពេលទៅដល់ជិតទើបដឹងថាមានស្រី្តកំពុងតែឈឺពោះជិតសម្រាលកូន»។ នេះជាការរៀបរាប់បន្ថែមរបស់កញ្ញា លីលី មកកាន់សារព័ត៌មាន ThmeyThmey ។
ក្នុងវ័យ២៤ឆ្នាំ កញ្ញា លីលី មិនមានជំនាញពេទ្យអ្វីនោះឡើយ ប៉ុន្តែអារម្មណ៍អាណិតស្ត្រី និងស្រឡាញ់ ធ្វើឲ្យកញ្ញានឹកឃើញវិធីសង្គ្រោះបន្ទាន់ ជាពិសេសធ្វើតាមសកម្មភាពក្នុងរឿងភាពយន្តមួយចំនួនដែលខ្លួនធ្លាប់បានមើល។
ដំបូងឡើយ កញ្ញា លីលី បានរ៉ាប់រងសោហ៊ុយធ្វើដំណើរដល់ស្ត្រីដើម្បីទៅសម្រាលកូននៅពេទ្យ ប៉ុន្តែមិនមានអ្នកណាហ៊ានយកទៅឡើយ ពីព្រោះមិនមែនជាសាច់ញាតិនឹងគ្នា។ បន្ទាន់ពេក តារាសំដែងដ៏ស្រស់ស្អាត បានយកក្រណាត់ដែលនៅក្នុងឡានទៅក្រាលឲ្យស្ត្រីរូបនោះដេកពីលើ ខណៈទារិកា បានកើតចេញមកពាក់កណ្ដាលទៅហើយ អ្នកនៅជុំវិញនោះបានឲ្យស្រោមដៃទៅកញ្ញាជួយសម្រាល។
«ទាំងភ័យ និងមិនធ្លាប់ជួបរឿងបែបនេះពីមុនមក តែទឹកចិត្តចង់ជួយបានធ្វើឲ្យខ្ញុំសម្រេចសង្គ្រោះម្តាយ និងទារិកាដោយផ្ទាល់ដៃរហូតដល់ឲ្យមានសុវត្ថិភាព»។ នេះជាការរៀបរាប់របស់លីលីដែលបានក្លាយជាឆ្មបម្នាក់ដោយចៃដន្យ។
បេសកកម្មមិនទាន់បញ្ចប់ភ្លាមៗនោះឡើយសម្រាប់កញ្ញា លីលី។ នៅព្រឹកបន្ទាប់ អ្នករាជធានីភ្នំពេញដ៏ស្រស់ស្អាត ដែលមានឈ្មោះដើមថា លឹម សុធាវី រូបនេះ បន្តទៅរកស្ត្រី និងទារិកា ដល់មន្ទីរពេទ្យ។ តាមការពិនិត្យស្ថានភាពជាក់ស្តែង កញ្ញា លីលី អះអាងថា ស្ត្រីដែលខ្លួនជួយនោះ មិនមានជីវភាពធូរធាឡើយ គាត់គ្មានសម្ភារប្រើប្រាស់គ្រប់គ្រាន់ ដោយមានតែទឹកដោះគោ និងសម្ភារមួយចំនួន ដែលបានពីការបរិច្ចាគរបស់អ្នកសម្រាលកូនផ្សេងទៀតប៉ុណ្ណោះ។
តារាសម្ដែង លី លី បានធ្វើការអំពាវនាវនៅលើទំព័រហ្វេសប៊ុករបស់ខ្លួនដើម្បីស្វែងរកថវិកាជួយដល់ម្ដាយនិងទារិកា ពីព្រោះនាងមិនឃើញអ្នកណាម្នាក់នៅក្បែរនោះឡើយ ជាពិសេសស្វាមីរបស់ស្ត្រីរូបនោះ។
កញ្ញា លីលី ដែលមានគណនីហ្វេសប៊ុកឈ្មោះ Lyly Yaka II ជាតារាសំដែងក្នុងរឿង អន្ទងវិញ្ញាណ, កាំបិតមុខពីរ, ផ្ទះតៃហោង និងរឿងមួយចំនួនទៀត ហើយកញ្ញាជាតារាបង្ហាញម៉ូតមួយរូបផងដែរ។ កញ្ញាបានសំណូមពរជនរួមជាតិនាំគ្នាចូលរួមសម្រាលការចំណាយរបស់ស្ត្រីនៅមន្ទីរពេទ្យកាល់ម៉ែត្រ ៕