អន្តរជាតិ
វៀតណាម ជួយឡាវពង្រីកសារមន្ទីរប្រវត្តិសាស្ត្រយោធាដើម្បីពង្រឹងទំនាក់ទំនងយូរឆ្នាំ
× រដ្ឋាភិបាលក្រុងហាណូយ និងរដ្ឋាភិបាលវៀងចន្ទន៍ បានដាក់ដំណើរការការសាងសង់សារៈមន្ទីរប្រវត្តិសាស្ត្រសម្រាប់យោធាឡាវ។ គម្រោងសាងសង់នេះ ស្ថិតក្រោមការគាំទ្រ និងជ្រោមជ្រែងពីសំណាក់រដ្ឋាភិបាលក្រុងហាណូយ។
តាមការចុះផ្សាយរបស់ភ្នាក់ងារព័ត៌មានវៀតណាម Vietnam News មន្ត្រីជាន់ខ្ពស់របស់រដ្ឋាភិបាលវៀតណាម និងរដ្ឋាភិបាលឡាវ នៅថ្ងៃ២០ ខែមករា បានប្រកាសដាក់ដំណើរការគម្រោងពង្រីកសារមន្ទីរយោធារបស់ឡាវឲ្យកាន់តែមានលក្ខណៈប្រសើរជាងមុន ដែលគម្រោងនេះ ជាអំណោយរបស់ក្រសួងការពារជាតិវៀតណាមសម្រាប់ក្រសួងការពារជាតិឡាវ។
តាមការបញ្ជាក់របស់លោកឧត្តមសេនីយ៍ Noethong Phomlavong តំណាងក្រសួងការពារជាតិឡាវ គម្រោងនេះ គឺជាសមិទ្ធផលមួយដ៏អស្ចារ្យ និងប្រវត្តិសាស្ត្រនៃមិត្តភាពប្រទេសទាំងពីរ។ លោក ក៏បានបង្ហាញពីការដឹងគុណទៅកាន់បក្ស , រដ្ឋ និងប្រជាជនវៀតណាមសម្រាប់ជំនួយទៅកាន់កងទ័ពឡាវផងដែរ។
តាម Vietnam News គម្រោងដែលទើបតែដាក់ដំណើរការនេះ មានតម្លៃប្រមាណ ១.៦ លានដុល្លារ និងត្រូវទទួលខុសត្រូវដោយក្រុមហ៊ុនសាងសង់វៀតណាម ហើយគ្រោង បញ្ចប់នៅក្នុងខែកញ្ញាឆ្នាំ២០១៩នេះតែម្តង។
គួរកត់សម្គាល់ផងដែរនោះ ការប្រកាសដាក់ដំណើរការសាងសង់នេះ ធ្វើឡើងក្នុងថ្ងៃរៀបចំពិធីដង្ហែរក្បួនព្យុហយោធាដើម្បីរម្លឹកខួបលើកទី៧០ នៃការបង្កើតកងទ័ពឡាវ ដែលជាថ្ងៃប្រមុខការពារជាតិជាច្រើនរូប បានបង្ហាញវត្តមានចូលរួមនៅក្នុងរដ្ឋធានីវៀងចន្ទន៍៕
Tag:
វៀតណាម
ឡាវ
យោធា
អាស៊ាន
© រក្សាសិទ្ធិដោយ thmeythmey.com