រដ្ឋាភិបាលក្រុងហាណូយ បានអះអាងថា ខ្លួន នៅមិនទាន់ទទួលបានសំណើណាមួយពាក់ព័ន្ធលទ្ធភាពនៃជំនួបកំពូលរវាងប្រមុខដឹកនាំកំពូលអាមេរិក និងកូរ៉េខាងជើងនៅឡើយនោះទេ។ ក៏ប៉ុន្តែក្រុងហាណូយ ក៏មិនមានបញ្ហាអ្វីដែរ ប្រសិន មេដឹកនាំនៃប្រទេសទាំងពីរ ពិតជាចង់ជួបចរចានៅក្នុងទឹកដីវៀតណាមមែននោះ។
អ្នកនាំពាក្យក្រសួងការបរទេសវៀតណាមលោកស្រី Lê Thị Thu Hằng នៅថ្ងៃ២៤ មករា តាមរយៈសន្និសីទសារព័ត៌មានប្រចាំថ្ងៃរបស់ខ្លួន បានអះអាងពីជំនឿចិត្តរបស់ខ្លួនលើសមត្ថភាពនៃការរៀបចំព្រឹត្តិការណ៍កម្រិតអន្តរជាតិ ដោយលើកសំអាងពីភាពជោគជ័យនៃការធ្វើជាម្ចាស់ផ្ទះនៃកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក និងសន្និសីទអន្តរជាតិជាច្រើនផ្សេងទៀត ។
ការលើកឡើងរបស់អ្នកនាំពាក្យរូបនេះ បន្ទាប់ពីមានការលេចឡើងនូវព័ត៌មានជាច្រើនបន្តបន្ទាប់គ្នា បានព្យាករពីលទ្ធភាព នៃជំនួបកំពូលស្តីពីការរំសាយអាវុធប្រល័យលោកលើកទីពីររបស់ប្រធានាធិបតីអាមេរិក លោក ដូ ណាល់ត្រាំ និងប្រមុខកំពូលកូរ៉េខាងជើង លោក គីម ជុងអ៊ុន ថាអាចនឹងប្រព្រឹត្តឡើងនៅក្នុងទឹកដីវៀតណាម ។
តាមភ្នាក់ងារព័ត៌មានវៀតណាម Viet Nam News អ្នកនាំពាក្យដដែលនោះ បានអះអាងថា វៀតណាម មិនទាន់ទទួលបានការជូនដំណឹង និងសំណើជុំវិញលទ្ធភាពជំនួបមេដឹកនាំកំពូលនោះទេ។ លោកស្រី ក៏កាន់តែមិនច្បាស់ថាតើ នឹងមានទស្សនកិច្ចផ្លូវរដ្ឋរបស់ប្រធានាធិបតីអាមេរិក ដូ ណាល់ត្រាំ និងប្រមុខដឹកនាំកំពូលកូរ៉េខាងជើង គីម ជុងអ៊ុន ទៅកាន់វៀតណាមឬក៏យ៉ាងណានោះទេ។
ក៏ប៉ុន្តែអ្វីដែលអ្នកនាំពាក្យអាចហ៊ានអះអាងតបនឹងការលើកឡើងនៃលទ្ធភាពជំនួបនេះគឺ វៀតណាម តែងតែមានឆន្ទៈ និងត្រៀមខ្លួនរួចជាស្រេចសម្រាប់ធ្វើជាម្ចាស់ផ្ទះដើម្បីរៀបចំ និងសម្រួល។
« រឿងទីកន្លែង និងពេលវេលា អាស្រ័យទៅលើភាគីអាមេរិក និងកូរ៉េខាងជើង ដែលជាអ្នកសម្រេច។ ក៏ប៉ុន្តែ វៀតណាម មានឆន្ទៈ និងការត្រៀមខ្លួនរួចជាស្រេចសម្រាប់ការចូលរួមដោយវិជ្ជមានក្នុងការរក្សាសន្តិភាព និងស្ថិរភាពលើបញ្ហាឧបទ្វីបកូរ៉េ។» លោកស្រី បានសង្កត់ធ្ងន់យ៉ាងដូច្នេះ។
គួរជម្រាបផងដែរថា បញ្ហានៅឧបទ្វីបកូរ៉េ ដែលសំដៅលើការគំរាមកំហែងសន្តិសុខកើតចេញពីការអភិវឌ្ឍកម្មវិធីអាវុធនុយក្លេអ៊ែររបស់កូរ៉េខាងជើង មិនត្រឹមតែជាក្តីបារម្ភសម្រាប់ប្រទេសជិតខាងប៉ុណ្ណោះនោះទេ តែ វា ជាក្តីរបស់រួមរបស់ប្រទេសក្នុងតំបន់ និងពិភពលោក។
នៅឆ្នាំមុន ប្រមុខដឹកនាំកំពូលអាមេរិក និងកូរ៉េខាងជើង លោក ដូណាល់ ត្រាំ និងលោក គីម ជុងអ៊ុន បានជួបពិភាក្សាគ្នាជាលើកដំបូង និងប្រវតិ្តសាស្ត្រនៅក្នុងប្រទេសសិង្ហបុរី ដោយបានបញ្ចប់ជាមួយនឹងការឯកភាពគ្នាជាផ្លែផ្កាផងដែរ។ ក៏ប៉ុន្តែ ភាគីទាំងពីរ នៅមិនទាន់បានបញ្ចប់លក្ខខណ្ឌដាច់ស្រេចនឹងគ្នានៅឡើយនោះទេ ហើយកូរ៉េខាងជើង ក៏មិនទាន់រំសាយអាវុធប្រល័យលោករបស់ខ្លួន ដែលតម្រូវឲ្យភាគីទាំងពីរ ត្រូវជួបគ្នាជាថ្មី៕