អ្នកចាំទី គឹម មករា អាចអវត្តមាន១រដូវកាល ដោយសាររបួសដាច់សរសៃជង្គង់

កីឡាជាតិ

ជាតិ

អ្នកចាំទី គឹម មករា អាចអវត្តមាន១រដូវកាល ដោយសាររបួសដាច់សរសៃជង្គង់

28, Jan 2019 , 8:59 pm

រូបភាព

កីឡាករ គឹម មករា សម្រាកព្យាបាលនៅមន្ទីរពេទ្យក្នុងប្រទេសវៀតណាម ក្រោយវះកាត់រួច, រូបភាពពីក្លិបបឹងកេត

ដោយ:

អ្នកចាំទីដៃទី១របស់ក្លិបបឹងកេត គឹម មករា អាចបាត់មុខពីទីលានប្រកួតពេញមួយរដូវកាល ក្រោយរងរបួសដាច់សរសៃជង្គង់អំឡុងពេលហ្វឹកហាត់កាលពីចុងឆ្នាំ២០១៨។ បច្ចុប្បន្ន មករា កំពុងសម្រាកព្យាបាលរបួសនៅមន្ទីរពេទ្យក្នុងប្រទេសវៀតណាម ក្រោយវះកាត់របួសដោយជោគជ័យកាលពីចុងសប្តាហ៍មុន។ លោក ហៅ សុជាតិ បានលើកឡើងថា ការអវត្តមានអ្នកចាំទីដៃទី១រូបនេះ អាចប៉ះពាល់តិចតួចដល់ក្លិប សម្រាប់ការត្រៀមរដូវកាលថ្មី។

ក្រោយវះកាត់របួសដាច់សរសៃជង្គង់ខាងស្តាំដោយជោគជ័យកាលពីថ្ងៃសៅរ៍ ទី២៦ ខែមករា អ្នកចាំទីដៃទី១របស់ក្លិបបឹងកេត គឹម មករា អាចចំណាយពេល១ឆ្នាំក្នុងការសម្រាកព្យាបាលរបួសឲ្យជាសះស្បើយ។ បច្ចុប្បន្នអ្នកចាំរូបនេះកំពុងសម្រាកព្យាបាលរបួសនៅមន្ទីរពេទ្យក្នុងប្រទេសវៀតណាម។ នេះបើតាមការបញ្ជាក់របស់លោក ហៅ សុជាតិ គ្រូបង្វឹកក្លិបបឹងកេត។

ក្នុងន័យនេះអ្នកចាំទី គឹម មករា អាចអវត្តមានពេញមួយរដូវកាលឆ្នាំ២០១៩ ដែលនឹងបើករជ្ជកាលថ្មីនៅខែមីនា ជាមួយក្លិបម្ចាស់ជើងឯកក្របខណ្ឌមិត្តហ្វូនខេមបូឌានលីគឆ្នាំ២០១៧មួយនេះ។ លោក ហៅ សុជាតិ បានបង្ហាញក្តីបារម្ភចំពោះការអវត្តមានអ្នកចាំទីដៃទី១រូបនេះ ព្រោះលោកយល់ថា វាអាចជះឥទ្ធិពលមិនល្អតិចតួចដល់ក្លិប ខណៈបច្ចុប្បន្នក្លិបបឹងកេតពុំទាន់រកឃើញអ្នកចាំទីថ្មី ដើម្បីជំនួសតំណែងនេះនៅឡើយទេ។

កាលពីពេលកន្លងទៅថ្មីៗ គេសង្កេតឃើញអតីតអ្នកចាំទីរបស់ក្លិបភ្នំពេញក្រោន Alex You បានបង្ហាញវត្តមានក្នុងក្រុមបឹងកេត ដែលធ្វើឲ្យមានការសន្និដ្ឋានថា កីឡាកររូបនេះទំនងជាមករួមរស់ជាមួយក្លិបបឹងកេត។ ពាក់ព័ន្ធបញ្ហានេះ គ្រូបង្វឹកដឹកនាំក្លិបបឹងកេតឲ្យឈ្នះជើងឯកនៅឆ្នាំ២០១៧ខាងលើ បានទទួលស្គាល់ថា Alex You ពិតជាបានបង្ហាញមុខក្នុងក្រុមបឹងកេតពិតប្រាកដមែន។ ប៉ុន្តែការបង្ហាញវត្តមានរបស់ Alex គ្រាន់តែជាការធ្វើតេស្តសមត្ថភាពប៉ុណ្ណោះ ហើយវាកំពុងស្ថិតក្នុងការពិចារណា។

ទោះបីគ្មានការឯកភាពគ្នាឈានដល់ចុះកិច្ចសន្យាជាមួយអ្នកចាំទីខ្មែរ-បារាំងរូបនេះក៏ដោយ លោក ហៅ សុជាតិ បានអះអាងថា លោកនឹងព្យាយាមប្រើប្រាស់ធនធានកីឡាកររបស់ក្លិបឲ្យអស់ពីលទ្ធផលភាព។ បច្ចុប្បន្នបឹងកេតមានអ្នកចាំទីពីររូបរួមមានកីឡាករ សាន គឹមហ៊ុយ (មកពីសាលាបាល់ទាត់ជាតិបាទី) និងកីឡាករ លី សាម៉េត (មកពីវេស្ទើនភ្នំពេញ)។

គួររំលឹកថា អ្នកចាំទី គឹម មករា បានរងរបួសដាច់សរសៃជង្គង់ខាងស្តាំក្នុងអំឡុងពេលហ្វឹកហាត់ត្រៀមរដូវកាលថ្មី កាលពីចុងខែធ្នូ ឆ្នាំ២០១៨។ រូបគេបានទៅវះកាត់របួសនៅមន្ទីរពេទ្យក្នុងប្រទេសវៀតណាមកាលពីថ្ងៃសៅរ៍ ទី២៦ ខែមករា ឆ្នាំ២០១៩។ សម្រាប់ការចំណាយលើថ្លៃព្យាបាលជាបន្ទុករបស់ក្លិបបឹងកេត ហើយរូបគេ ក៏ទទួលបានប្រាក់ខែដូចកីឡាករដទៃផងដែរ។ គឹម មករា ត្រូវបានក្លិបបឹងកេតដំឡើងពីអ្នកចាំទីដៃទី២មកដៃទី១នៅពាក់កណ្តាលរដូវកាលឆ្នាំ២០១៨ ក្រោយអ្នកចាំទីដៃទី១ ស៊ូ យ៉ាទី ផ្ទេរទៅក្លិបណាហ្គាវើល៕