កីឡាជាតិ
ជាតិ
ក្រុម Cambodia All Stars ប៉ះ Muangthong នៅអូឡាំពិកល្ងាចនេះ
× ក្រុមកីឡាបាល់ទាត់ Cambodia All Stars ត្រូវប្រជែងជាមួយក្រុម SCG Muangthong United នាជំនួបមិត្តភាពអន្តរជាតិកម្តៅសាច់ដុំ នៅម៉ោង៦:៣០នាទីល្ងាចថ្ងៃទី៩ ខែកុម្ភៈ ឆ្នាំ២០១៩ នាពហុកីឡាដ្ឋានជាតិ។ ការប្រកួតនេះរៀបចំឡើង ដើម្បីស្វែងរកមូលនិធិសប្បុរសធម៌ និងដកស្រង់បទពិសោធសម្រាប់ត្រៀមមុនបើករដូវកាលថ្មីឆ្នាំ២០១៩ រៀងៗខ្លួន។
លោក ភា សុភ័ក្ត្រា ដែលដឹកនាំឲ្យក្រុមក្រសួងការពារជាតិលើកពានសម្តេច ហ៊ុន សែន ឆ្នាំ២០១៨ ត្រូវដឹកនាំក្រុម Cambodia All Stars ជាលើកដំបូង ប្រជែងតទល់ជាមួយក្រុម SCG Muangthong United នាជំនួបដកស្រង់បច្ចេកទេសល្ងាចនេះ។ ក្រុមទាំងពីរធ្លាប់ជួបគ្នាពីរលើករួចមកហើយ ដោយលទ្ធផលឈ្នះ១ និងចាញ់១ដូចគ្នា។
នៅឆ្នាំ២០១៦ ក្រុម Cambodia All Stars ក្រោមការដឹកនាំរបស់លោក ប្រាក់ សុវណ្ណារ៉ា ដែលជួយឲ្យបឹងកេតលើកពានលីគកំពូលឆ្នាំ២០១៦ បានយកឈ្នះក្រុម SCG Muangthong United ក្នុងលទ្ធផល ៤-៣។ ប៉ុន្តែនៅឆ្នាំ២០១៧ ក្រុម Cambodia All Stars ក្រោមការដឹកនាំរបស់គ្រូបង្វឹកប្រេស៊ីល Leonardo Vitorino បានចាញ់ SCG Muangthong United ក្នុងលទ្ធផល ៤-០។ តើល្ងាចនេះក្រុម Cambodia All Stars អាចជម្រះបញ្ជីចាស់បានឬយ៉ាងណា?
ព្រឹត្តិការណ៍«SCG Muangthong United ASEAN Tour 2019» រៀបចំឡើងដើម្បីស្វែងរកមូលនិធិសប្បុរសធម៌។ ពោលគឺថវិកាមួយផ្នែកដែលបានមកពីការលក់សំបុត្រ និងអាវយឺតនឹងយកទៅជួយអង្គការសប្បុរសធម៌នានា ខណៈមួយផ្នែកទៀតយកទៅប្រគល់ជូនសហព័ន្ធកីឡាបាល់កម្ពុជា ដើម្បីរួមចំណែកក្នុងគម្រោងអភិវឌ្ឍន៍កីឡាបាល់ទាត់នៅកម្ពុជា។
ការប្រកួតនេះ ក៏ដើម្បីដកស្រង់បទពិសោធ និងពង្រឹងសមត្ថភាពសម្រាប់ត្រៀមប្រជែងដណ្តើមជើងឯកក្នុងរដូវកាលថ្មីផងដែរ។ ជាក់ស្តែងកម្ពុជានឹងធ្វើជាម្ចាស់ផ្ទះការប្រកួត AFF U22 Championship 2019 ដែលមាន៨ប្រទេសចូលរួមនាខែកុម្ភៈ នេះ៕
Tag:
បាល់ទាត់
Cambodia All Stars
SCG Muangthong United
© រក្សាសិទ្ធិដោយ thmeythmey.com