អន្តរជាតិ
ជេក ម៉ា៖ «ការងារដំបូងរបស់អ្នកសំខាន់បំផុត»
× ការងារដំបូងរបស់អ្នក មិនចាំបាច់ទាល់តែជាការងារនៃក្តីសុបិន ជាការងារនៅក្រុមហ៊ុនធំៗ ឬជាការងារដែលអ្នកស្រលាញ់ឡើយ។ ប៉ុន្តែវាគួរជាការងារដែលផ្តល់កន្លែងរៀនសូត្រ និងជាចំណុចចាប់ផ្តើមដ៏សំខាន់បំផុតនៃជីវិត។ នេះជាសម្តីរបស់មហាសេដ្ឋីចិន និងជាស្ថាបនិកក្រុមហ៊ុនបច្ចេកវិទ្យាយក្សអាលីបាបា ជេក ម៉ា ។
លោក ជេក ម៉ា និយាយពីសារសំខាន់នៃការងារដំបូង ឬជាចំណុចចាប់ផ្តើមនៃអាជីពការងារនេះនៅពេលដែលលោកចូលរួមក្នុងវេទិកាសេដ្ឋកិច្ចពិភពលោកនៅទីក្រុងដាវ៉ូសប្រទេសស្វ៊ីស កាលពីចុងខែមករាកន្លងទៅ។
មហាសេដ្ឋីចិនរូបនេះបានពន្យល់ថា ការងារដំបូងសំខាន់ដោយសារវាជាកន្លែងដែលមនុស្សម្នាក់អាចរៀនសូត្របានពីអ្នកដទៃជាពិសេសរៀនសូត្រពីចៅហ្វាយនាយពីរឿងល្អៗ និងអាចតម្រង់ផ្លូវខ្លួនឯងទៅពេលអនាគតផង។
លោកនិយាយដូច្នេះ៖« ការងារដំបូងសំខាន់បំផុត។ វាមិនចាំបាច់ទាល់តែធ្វើការងារក្នុងក្រុមហ៊ុនដែលមានឈ្មោះល្បីល្បាញឡើយ។ អ្នកគួរតែស្វែងរកចៅហ្វាយនាយល្អដែលអាចបង្ហាត់បង្រៀនអ្នកពីរបៀបធ្វើជាមនុស្ស ពីរបៀបធ្វើរឿងត្រឹមត្រូវ និងពីរៀបធ្វើការងារបានល្អ។ បើបែបនេះ អ្នកគួរបន្តធ្វើការងារនោះ»។
សម្រាប់លោក ជេក ម៉ា បើសិនជ្រើសរើសកន្លែងធ្វើការងារដែលផ្តល់ឱកាសសម្រាប់រៀនសូត្រ គេគួរបន្តធ្វើការងារនៅទីនោះក្នុងរយៈពេលមួយសមស្រប។ នេះក៏ដោយសារមនុស្សម្នាក់ៗត្រូវការពេលវេលាដើម្បីស្វែងរកចំណុចខ្លាំងសិន និងអាចឈានទៅកំណត់គោលដៅចុងក្រោយរបស់គេ។ តាមសម្តីរបស់លោក ជេក ម៉ា ពេលអាចកំណត់គោលដៅចុងក្រោយ និងភាពខ្លាំងរបស់ខ្លួនបានហើយ គេអាចចាប់ផ្តើមបន្តដំណើរទៅមុខទៀតបាន។
ជាមួយគ្នានោះដែរ មហាសេដី្ឋចិនវ័យ ៥៤ឆ្នាំរូបនេះបានរម្លឹកពីបទពិសោធន៍ផ្ទាល់ខ្លួនដែរមុនឈានជើងទៅចូលបង្កើតក្រុមហ៊ុនអាលីបាបា។ លោក ជេក ម៉ា ចាប់ផ្តើមការងារជាគ្រូបង្រៀនភាសាអង់គ្លេសនៅខេត្តហាងចូវអំឡុងឆ្នាំ ១៩៩០។
«ហេតុផលមួយដែលខ្ញុំអាចឈរជើងបានក្នុងរយៈពេល ២០ឆ្នាំមកនេះគឺ ខ្ញុំធ្លាប់ធ្វើជាគ្រូបង្រៀន»។ លោក ជេក ម៉ា រៀបរាប់បែបនេះ មុនបន្ថែមថា បទពិសោធន៍ដ៏មានតម្លៃមួយនេះហើយបានជួយឲ្យលោករៀនសូត្រកំណត់មើល និងវាយតម្លៃមនុស្សដែលមានសក្តានុពល និងទេពកោសល្យ រួមទាំងអាចជួយជំរុញលើកទឹកចិត្តឲ្យអ្នកទាំងនោះរីកចម្រើនដែរ។ ទាំងអស់នេះជួយឲ្យលោកបង្កើតបានក្រុមការងារដ៏រឹងមាំមួយនៅក្នុងក្រុមហ៊ុន អាលីបាបារហូតមកដល់ឥឡូវ។
«ពេលខ្ញុំជួលមនុស្ស ខ្ញុំជួលអ្នកដែលឆ្លាតជាងខ្ញុំ។ ខ្ញុំជួលមនុស្សដែលអាចក្លាយជាចៅហ្វាយរបស់ខ្ញុំ ក្នុងរយៈពេលបួនឬប្រាំឆ្នាំក្រោយ។ ខ្ញុំចូលចិត្តមនុស្សដែលតែងតែមានភាពវិជ្ជមាន និងមិនដែលចង់បោះបង់គោលដៅរបស់ខ្លួន»៕
Tag:
ជេក ម៉ា
ការងារ
អាលីបាបា
© រក្សាសិទ្ធិដោយ thmeythmey.com