រដ្ឋអឺរ៉ុបខាងកើត ប៉ូឡូញសម្រេចបញ្ជាទិញប្រព័ន្ធបាញ់គ្រាប់រ៉ុក្កែតចល័តពីអាមេរិកដើម្បីពង្រឹងវិស័យការពារជាតិរបស់ខ្លួន។ ការបញ្ជាទិញអាវុធពីអាមេរិកកើតឡើងស្របពេលដែលរដ្ឋាភិបាលក្រុងវ៉ាសូវី ព្យាយាមពង្រឹងទំនាក់ទំនងជាមួយក្រុងវ៉ាស៊ីនតោន ក្នុងគោលដៅទប់ទល់ឥទ្ធិពលរុស្ស៊ីក្នុងតំបន់ និងទប់ស្កាត់ការឈ្លានពានណាមួយនៅពេលអនាគតផង។
បើតាមការចុះផ្សាយរបស់ទីភ្នាក់ងារព័ត៌មាន AFP កិច្ចព្រមព្រៀងទិញប្រព័ន្ធបាញ់រ៉ុក្កែតចល័តតម្លៃ ៤១៤ លានដុល្លារនឹងត្រូវចុះរួមគ្នារវាងភាគីអាមេរិក និងប៉ូឡូញនៅថ្ងៃពុធទី ១៣ ខែកុម្ភៈនេះ។ ចំណែកការបញ្ជូនសព្វាវុធនឹងត្រូវធ្វើឡើងនៅត្រឹមឆ្នាំ ២០២៣ឯណោះ។
រដ្ឋមន្ត្រីការពារជាតិប៉ូឡូញ Mariusz Blaszczak បានបញ្ជាក់ប្រាប់អ្នកសារព័ត៌មានកាលពីចុងសប្តាហ៍កន្លងទៅថា សព្វាវុធដែលប៉ូឡូញបញ្ជាទិញពីអាមេរិកនឹងពង្រឹងសមត្ថភាពរបស់កងទ័ពក្នុងការពារជាតិក្នុងស្ថានការណ៍បច្ចុប្បន្ន។
ប្រព័ន្ធបាញ់គ្រាប់រ៉ុក្កែតចល័តនេះផលិតឡើងដោយក្រុមហ៊ុនផលិតសព្វាវុធ Lockheed Martin។ វាអាចមានសមត្ថភាពបាញ់បានគ្រាប់រ៉ុក្កែតនាំផ្លូវប្រាំមួយដើមដែលមានរយៈចម្ងាយរហូតដល់ ៧០ គីឡូម៉ែត្រ ឬក៏អាចបាញ់មីស៊ីលមួយដើមដែលមានរយៈចម្ងាយ ៣០០គីឡូម៉ែត្រផងដែរ។
មកដល់បច្ចុប្បន្ននេះ ប្រព័ន្ធបាញ់រ៉ុក្កែតនេះត្រូវបានប្រើប្រាស់ដោយប្រទេស ១៩ ហើយនៅទូទាំងពិភពលោក ហើយវាត្រូវបានបញ្ជូនទៅកាន់ស៊ីរីដើម្បីកម្ចាត់ក្រុមភេរវជនរដ្ឋឥស្លាមផងដែរ។ វាមានសមត្ថភាពខ្ពស់ទោះជាត្រូវប្រើប្រាស់ក្នុងពេលអាកាសធាតុមិនល្អ ឬពេលដែលការវាយប្រហារតាមផ្លូវអាកាសមិនអាចធ្វើទៅរួចថែមទៀត។
ការបញ្ជាទិញសព្វាវុធតម្លៃជាង ៤០០លានដុល្លារនេះមិនមែនជារឿងចម្លែកទេសម្រាប់ប៉ូឡូញ។ រដ្ឋាភិបាលស្តាំនិយមដែលកំពុងដឹកនាំប្រទេសនេះកំពុងព្យាយាមរឹតបន្តឹងចំណងមិត្តភាពជាមួយអាមេរិក និងពង្រឹងសមត្ថភាពខ្លួនឯងផងដើម្បីឆ្លើយតបនឹងឥទ្ធិពលរបស់រុស្ស៊ី និងឈានទៅទប់ស្កាត់សកម្មភាពបង្ករឿងណាមួយដែលអាចកើតឡើងនៅពេលខាងមុខផង។
កាលពីខែមីនាឆ្នាំមុន វ៉ាសូវី ក៏បានចុះកិច្ចព្រមព្រៀងទិញប្រព័ន្ធការពារមីស៊ីល Patriot ពីអាមេរិកក្នុងតម្លៃ ៤,៧៥ពាន់លានដុល្លារផងដែរ។
លើសពីទិញសព្វាវុធ រដ្ឋាភិបាលប៉ូឡូញក៏បានជំរុញឲ្យអាមេរិកបើកដំណើរការមូលដ្ឋានទ័ពអចិន្ត្រៃយ៍របស់ខ្លួននៅលើទឹកដីប៉ូឡូញថែមទៀត។ បច្ចុប្បន្នអាមេរិកមានកងទ័ពឈរជើងនៅប៉ូឡូញដែរ ប៉ុន្តែក្នុងលក្ខខណ្ឌបណ្តោះអាសន្នស្ថិតក្រោមប្រតិបត្តិការរបស់អង្គការណាតូប៉ុណ្ណោះ។ យ៉ាងណាមិញ អាមេរិកអះអាងថា ប៉ូឡូញមិនទាន់ត្រៀមខ្លួននៅឡើយទេសម្រាប់ការទទួលមូលដ្ឋានទ័ពអាមេរិក ហើយចំណុចសំខាន់ជាងគេ ប៉ូឡូញខាតទីតាំងសម្រាប់ការហ្វឹកហ្វឺនរបស់កងទ័ពអាមេរិក។
ដោយឡែក បក្សសម្ព័ន្ធយោធាណាតូ បានបើកដំណើរការអង្គភាពចារកម្មមួយនៅប៉ូឡូញឆ្នាំ ២០១៧ ក្នុងគោលដៅពង្រីកសកម្មភាព និងសមត្ថភាពប្រមែរប្រមូលរបាយការណ៍ចារកម្មរបស់សមាជិកណាតូ បន្ទាប់ពីភាពតានតឹងនិងការប្រឈមមុខដាក់គ្នាកើនឡើងខ្លាំងជាមួយរុស្ស៊ី ក្រោយមហាអំណាចនេះក្រសោបយកទឹកដីគ្រីមៀ ពីអ៊ុយក្រែនឆ្នាំ ២០១៤៕