ទទាយំឆ្លងត្រយ៉ងបងអើយ រត់ហើយ! បទថ្មីមួយទៀតរបស់សម្តេច ហ៊ុន សែន

ជាតិ

នយោបាយជាតិ

ទទាយំឆ្លងត្រយ៉ងបងអើយ រត់ហើយ! បទថ្មីមួយទៀតរបស់សម្តេច ហ៊ុន សែន

22, Feb 2019 , 3:25 pm

រូបភាព

ដោយ: ថ្មីៗ

ខណៈលទ្ធផលនៃការភ្នាល់យកចាញ់-ឈ្នះ ជិតឈានមកដល់ សម្តេច ហ៊ុន សែន ប្រធានគណបក្សកាន់អំណាច ឆ្លៀតសរសេរបទចម្រៀង ដែលបង្កប់អត្ថន័យបញ្ឆិតបញ្ឆៀង និងផ្លែផ្កាឲ្យលោក សម រង្ស៊ី មេដឹកនាំក្រុមប្រឆាំង ដែលកំពុងនិរទេសខ្លួននៅបរទេស។

បទចម្រៀងថ្មីក្រោយនេះ ដែលសម្តេច ហ៊ុន សែន ទើបនឹងសរសេររួច ហើយបានបង្ហោះលើទំព័រហ្វេសប៊ុក ក្នុងថ្ងៃទី២២ ខែកុម្ភៈ ឆ្នាំ២០១៩នេះ គឺទាក់ទងសត្វទទាដដែល។ ទំនុកចម្រៀងនេះ គឺ៖

១. ទទាយំឆ្លងត្រយ៉ងបងអើយ រត់ហើយ(ពីរដង) សង្សារបងអើយ រត់អីលឿនម្ល៉េះ?

២. បើរត់យ៉ាងហ្នឹង ហេតុអ្វីធ្វើចេះ? (ពីរដង) លុយក៏អស់ ឆ្នាំងក៏ប្រេះ បើរត់យ៉ាងនេះ ទៅជ្រកឯណា?

៣. បងរត់ចោលអូន អត់ធម៏មេត្តា (ពីរដង) បងភ្លេចសន្យាកាលពីគ្រាដើម។

៤. បើបងធ្លាប់រត់សុំរត់ទៀតណា (ពីរដង) រត់ទៅរាមរ៉ាមានអ្នកប៉ាវបាយ៕

នេះជាបទចម្រៀងទីពីរហើយ ដែលគេ យល់ថា សម្តេច ហ៊ុន សែន តែងឡើង ដើម្បីឌឺដងទៅលោក សម រង្ស៊ី ដូចបទទីមួយដែរ។ ទំនុកបទចម្រៀងទីមួយ ដែលសម្តេច ហ៊ុន សែន និពន្ធកាលពីថ្ងៃទី៨ ខែកុម្ភៈ ឆ្នាំ២០១៩ គឺ៖

ទទាយំឆ្លងត្រយ៉ងបងអើយ អត់ឆ្លើយ (ពីរដង) សង្សារបងអើយ ដល់ពេលហើយឬនៅ?

ចិត្តអូនចិត្តដាច់ ដោយសារចិត្តបងចិត្តខ្មៅ (ពីរដង) ស្ពានក៏បាក់ ទឹកក៏ជ្រៅ ធ្វើម្តេចបានទៅតាមកិច្ចសន្យា៕

បទទីមួយ ចេញបានតែមួយថ្ងៃ ក៏ត្រូវបានក្រុមតន្ត្រីគ្រួសារខ្មែរ យកទៅច្រៀង។

យ៉ាងណាក៏ដោយ សម្តេច ហ៊ុន សែន ពុំបានដាក់ចំណងជើងឲ្យបទចម្រៀងទាំងពីរបទនេះទេ ដោយគេ នាំគ្នាសន្មតនិងហៅជាទូទៅថា «បទទទាយំឆ្លង»។

លោក សម រង្ស៊ី ជាអ្នកបបួលសម្តេច ហ៊ុន សែន ភ្នាល់គ្នា។ លោក អះអាងថា យ៉ាងយូរត្រឹមថ្ងៃទី៣ ខែមីនា ឆ្នាំ២០១៩ លោក កឹម សុខា នឹងត្រូវបានដោះលែង តែបើការអះអាងរបស់លោកខុស លោក សុខចិត្តដើរចូលស្រុក ឲ្យអាជ្ញាធរចាប់ខ្លួន។ ឮដូច្នេះ សម្តេច ហ៊ុន សែន ក៏ចេញមកទទួលយកការភ្នាក់នេះ។

សម្តេច ហ៊ុន សែន ប្រកាសថា សុខចិត្តចុះចេញពីតំណែង បើលោក កឹម សុខា ពិតជាត្រូវបានដោះលែង នៅត្រឹមថ្ងៃទី៣ ខែមីនា មែន តែបើលោក កឹម សុខា មិនត្រូវបានដោះលែងទេ លោក សម រង្ស៊ី ត្រូវវិលមកកម្ពុជា តាមការសន្យា។

គេ មិនទាន់ដឹងនោះទេ ថា អ្នកណា ជាអ្នកឈ្នះ ការភ្នាល់នេះ។ តែមានអ្នកខ្លះ ហ៊ានទស្សទាយមុនថា ប្រហែលជាសម្តេច ហ៊ុន សែន ដែលជាទទួលបានជ័យជម្នះក្នុងការភ្នាល់នេះ ហើយចំអកឲ្យលោក សម រង្ស៊ី ថា ប្រហែលជាមិនទាន់ចូលស្រុកនោះទេ បើទោះបីជាលោក កឹម សុខា មិនត្រូវបានដោះលែងក៏ដោយ៕