អន្តរជាតិ
អតីតប្រធានាធិបតីហ្គាណា ចេញសម្រួលចរាចរណ៍នៅលើផ្លូវដ៏មមាញឹកមួយ
× លោក Jerry John Rawlings ដែលជាអតីតប្រធានាធិបតីដែលបានកាន់អំណាចពីរទសវត្សរ៍នៅហ្គាណា កាលពីពេលថ្មីៗកន្លងមកនេះ បានចុះពីរថយន្តរបស់ខ្លួន ដើម្បីទៅសម្រួលចរាចរណ៍ដ៏មមាញឹកមួយក្នុងក្រុង Accra។ នេះបើតាមការផ្សាយរបស់ Ghana Web។
លោក Jerry Jonh Rawlings ដែលពលរដ្ឋហ្គាណា និយមហៅថា «Papa J ឬ JJ» នោះ បានធ្វើដំណើរពីក្រុង Accra ឆ្ពោះទៅកាន់ក្រុង Prampram ប៉ុន្តែចរាចរណ៍មានលក្ខណៈចង្អៀតយ៉ាងខ្លាំង ដោយរថយន្តជាច្រើនបានបើកបរមិនគោរពផ្លូវអាទិភាព។
អតីតប្រធានាធិបតីរូបនេះ បានចុះទៅសម្រួលចរាចរណ៍ផ្ទាល់ ប៉ុន្តែក្រោយវត្តមានរបស់លោក មិនមានរថយន្តផ្សេងទៀតហ៊ានឆ្លងកាត់ឡើយ។ ក្រោយរថយន្តរបស់លោក Rawlings ចាកចេញ ចរាចរណ៍ ដំណើរការស្រួលបួលធម្មតា។
អ្នកប្រើប្រាស់បណ្តាញសង្គមហ្គាណា បានបង្ហាញនូវការគោរពចំពោះអតីតមេដឹកនាំរបស់ខ្លួនដែលតែងតែយកចិត្តទុកដាក់លើសណ្តាប់ធ្នាប់សង្គម។ លោក Rawlings អាយុ៧១ឆ្នាំ ធ្លាប់ដឹកនាំប្រទេសហ្គាណា ចន្លោះពីឆ្នាំ១៩៨១ ដល់ឆ្នាំ២០០១ ដោយចាប់ផ្តើមពីរបបយោធា ហើយដល់ប្រជាធិបតីសេរីពហុបក្សចាប់ពីឆ្នាំ១៩៩២ ៕
© រក្សាសិទ្ធិដោយ thmeythmey.com