កីឡាជាតិ
ជាតិ
អ្នកជំនាញ៖ ព្រឹត្តិការណ៍កីឡាស៊ីហ្គេមឆ្នាំ២០២៣ កម្ពុជាអាចចំណាយ២០០លានដុល្លារ លោក វ៉ាត់ ចំរើន អគ្គលេខាធិការ CAMSOC ធ្វើបទបង្ហាញពីវឌ្ឍនភាពនៃដំណើររៀបចំស៊ីហ្គេម
× អ្នកជំនាញរៀបចំព្រឹត្តិការណ៍កីឡាស៊ីហ្គេមបានវាយតម្លៃថា កម្ពុជាអាចចំណាយថវិកាក្នុងរង្វង់ប្រមាណ២០០លានដុល្លារក្នុងការរៀបចំព្រឹត្តិការណ៍កីឡាស៊ីហ្គេមលើកទី៣២នៅឆ្នាំ២០២៣។ តែយ៉ាងណា ការចំណាយអាចមានចំនួនតិច ឬច្រើនជាងនេះ ព្រោះវាអាស្រ័យលើការរៀបចំរបស់ម្ចាស់ផ្ទះ។ កម្ពុជា ក៏គ្រោងបញ្ជូនកីឡាករ-កីឡាការិនី ទៅហ្វឹកហាត់ពង្រឹងសមត្ថភាពនៅតាមបណ្តាប្រទេសសក្តានុពលមួយចំនួននៅតំបន់អាស៊ី ដើម្បីត្រៀមព្រឹត្តិការណ៍នេះផងដែរ។
លោកសាស្ត្រាចារ្យ Sheik Kok Chi អ្នកជំនាញការរៀបចំព្រឹត្តិការណ៍កីឡាស៊ីហ្គេមបានវាយតម្លៃថា កម្ពុជាអាចចំណាយថវិកាប្រមាណ២០០លានដុល្លារសម្រាប់ការធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។ ថវិកាទាំងនេះ កម្ពុជាត្រូវចំណាយលើការបណ្តុះបណ្តាលមន្ត្រីបច្ចេកទេស និងការហ្វឹកហាត់របស់កីឡាករ និងការរៀបចំព្រឹត្តិការណ៍ប្រកួត។
« ក្នុងចំណោម២០០លានដុល្លារ លោកចែកចេញជាពីរ គឺ១០០លានដុល្លារចំណាយលើការបណ្តុះបណ្តាលបច្ចេកទេស និងហ្វឹកហាត់របស់កីឡាករកីឡាការិនី និង១០០លានដុល្លារទៀត គឺចំណាយក្នុងអំឡុងពេលរៀបចំព្រឹត្តិការណ៍កីឡាស៊ីហ្គេម»។ នេះជាការលើកឡើងរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលបានស្រង់សម្តីលោកសាស្ត្រាចារ្យ Sheik Kok Chi ផ្តល់បទសម្ភាសដល់អ្នកសារព័ត៌មានក្រោយកិច្ចប្រជុំគណៈកម្មាធិការជាតិរៀបចំព្រឹត្តិការណ៍កីឡាស៊ីហ្គេមកម្ពុជានៅវិមានសន្តិភាពកាលពីពេលថ្មីៗ។
លោក Sheik Kok Chi (អាវខ្មៅ)ពេលធ្វើបទបង្ហាញក្នុងកិច្ចប្រជុំលើកទី២របស់ CAMSOC នៅវិមានសន្តិភាព, រូបភាពពី NOCC
លោក វ៉ាត់ ចំរើន ដែលស្រង់សម្តីលោក Sheik Kok Chi បានអះអាងទៀតថា ការចំណាយនេះគ្រាន់តែជាតួលេខវាយតម្លៃបឋមតែប៉ុណ្ណោះ ខណៈការចំណាយជាក់ស្តែងអាចតិច ឬច្រើនជាងនេះអាស្រ័យលើតម្រូវការ និងទំហំរៀបចំរបស់ម្ចាស់ផ្ទះកម្ពុជា។ ក្នុងកិច្ចប្រជុំនោះដែរ អ្នកជំនាញរូបនេះ ក៏បានចែករំលែកបទពិសោធ ក៏ដូចជាប្រាប់ពីវិធីសាស្ត្របែងចែកតួនាទី និងយុទ្ធសាស្ត្រនៃដំណើរការរៀបចំកីឡាស៊ីហ្គេមដល់មន្ត្រីជំនាញរបស់ CAMSOK ផងដែរ។
ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមឆ្នាំ២០២៣ កម្ពុជា នឹងបញ្ជូនកីឡាករកីឡាការិនីនៃប្រភេទកីឡាមួយចំនួន ទៅហ្វឹកហាត់ពង្រឹងសមត្ថភាពនៅបណ្តាប្រទេសសក្តានុពលមួយចំនួននៅក្នុងតំបន់។ ប្រទេសគោលដៅធំៗដែលកម្ពុជាគ្រោងបញ្ជូនកីឡាករទៅហ្វឹកហាត់រួមមាន ចិន ជប៉ុន កូរ៉េ និងប្រទេសមួយចំនួនទៀតនៅតំបន់អាស៊ាន។ ប៉ុន្តែការបញ្ជូននេះ គឺវាអាស្រ័យលើការអនុញ្ញាតរបស់ម្ចាស់ផ្ទះ ព្រោះអាចមានប្រភេទកីឡាខ្លះទទួលបានការអនុញ្ញាត និងខ្លះទៀតមិនអនុញ្ញាត។
សម្តេច ទៀ បាញ់ ប្រធានគណៈកម្មាធិការជាតិរៀបចំព្រឹត្តិការណ៍កីឡាស៊ីហ្គេមកម្ពុជា ជំរុញឲ្យសមាជិកទាំងអស់ពន្លឿននីតិវិធីរៀបចំបង្កើតអគ្គលេខាដ្ឋាន CAMSOC ដើម្បីដំណើរការអង្គភាពមួយនេះ។ ទន្ទឹមនឹងនេះ សម្តេចប្រាប់ឲ្យសមាជិករៀបចំផែនការ និងកំណត់ហេតុផ្សេងៗនៃកិច្ចប្រជុំលើកទី២របស់ CAMSOC ពិសេសពីគម្រោងថវិកា ដើម្បីស្នើសុំការអនុម័តពីរាជរដ្ឋាភិបាលកម្ពុជា៕
Tag:
SEA Games 2023
វ៉ាត់ ចំរើន
© រក្សាសិទ្ធិដោយ thmeythmey.com