អន្តរជាតិ
ជនបរទេសប្រមាណ៣០ម៉ឺននាក់ទៅពិនិត្យជំងឺនៅវៀតណាមនាឆ្នាំ២០១៨
× មន្ទីរពេទ្យក្នុងស្រុករបស់វៀតណាម កាលពីឆ្នាំ២០១៨ ទទួលបានជនបរទេសប្រមាណ៣០ម៉ឺននាក់ ដែលត្រូវពិនិត្យសុខភាព ព្យាបាលជំងឺ និងការសង្គ្រោះផ្សេងៗ។ យោងតាមទីភ្នាក់ងារព័ត៌មាន VNA ក្រៅពីជនបរទេសដែលរស់នៅវៀតណាម អ្នកទៅពិនិត្យជំងឺភាគច្រើនមកពីកម្ពុជា និងឡាវ រួមទាំងជនជាតិវៀតណាមដែលរស់នៅក្រៅប្រទេស។
សេវាកម្មសុខាភិបាល ដែលពេញនិយមបំផុតនៅវៀតណាម រួមមាន ទណ្ឌសាស្ត្រ ការវះកាត់ជំងឺសរសៃឈាមបេះដូង ការព្យាបាលជំងឺមហារីក ការកែសម្ផស្ស និងរោគផ្សេងៗទៀត។
មន្ទីរពេទ្យឯកទេសជំងឺមហារីក Ho Chi Minh City Oncology Hospital កាលពីឆ្នាំ២០១៨ ទទួលពិនិត្យអ្នកជំងឺបរទេសជាង៦៦០នាក់ និងមានអ្នកសម្រាកព្យាបាល ជាង១២០០នាក់ ផងដែរ។
ជាមួយគ្នានេះផងដែរ VNA បានរាយការណ៍ឲ្យដឹងផងដែរថា មន្ទីរពេទ្យយោធា Military Central Hospital 108 របស់វៀតណាម ទទួលពិនិត្យអ្នកជំងឺកាន់តែច្រើនដែលមកពីរុស្ស៊ី អាមេរិក កូរ៉េខាងត្បូង និងចិន ជាដើម។
រដ្ឋមន្ត្រីក្រសួងសុខាភិបាលវៀតណាម លោក Nguyen Thi Kim Tien បានអះអាងថា អ្នកជំងឺបរទេស សុទ្ធតែបានវាយតម្លៃខ្ពស់ពីសេវាកម្មសុខាភិបាលនៅវៀតណាម ជាពិសេសការព្យាបាលប្រកបដោយគុណភាពពីសំណាក់គ្រូពេទ្យជំនាញ៕
© រក្សាសិទ្ធិដោយ thmeythmey.com