កីឡាជាតិ
ជាតិ
លោក សៅ សុខា មានជំនឿចិត្តខ្ពស់ចំពោះក្រុមបាល់ទាត់នៅស៊ីហ្គេមឆ្នាំ២០២៣
× ប្រធានសហព័ន្ធកីឡាបាល់ទាត់កម្ពុជាជឿជាក់ថា កម្ពុជានឹងលើកពានក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ បើសិនគម្រោងអភិវឌ្ឍន៍កីឡាបាល់ទាត់សាលាតម្រង់ទិស២៥រាជធានី-ខេត្តបញ្ចប់ជាស្ថាពរត្រឹមឆ្នាំ២០១៩នេះ។ ប៉ុន្តែបើគម្រោងនេះមិនបានបញ្ចប់ត្រឹមឆ្នាំនេះទេ នោះនឹងមានការប្រែប្រួលលទ្ធផលសម្រាប់កម្ពុជានៅឆ្នាំ២០២៣។ បច្ចុប្បន្នទីលានចំនួន៤បានបញ្ចប់ការសាងសង់ជាស្ថាពរ ៦កំពុងដំណើរការសាងសង់ ខណៈ១៥ទៀតស្ថិតក្នុងដំណាក់កាលពិភាក្សា។
លោក សៅ សុខា ប្រធានសហព័ន្ធកីឡាបាល់ទាត់កម្ពុជាមានប្រសាសន៍ថា នៅឆ្នាំ២០២៣ ពេលកម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ សហព័ន្ធសម្រេចយកវិញ្ញាសាកម្រិតអាយុក្រោម២២ឆ្នាំ ដាក់ឲ្យប្រកួតប្រជែងក្នុងព្រឹត្តិការណ៍ដ៏ធំប្រចាំតំបន់អាស៊ានមួយនេះ។ កត្តានេះបានធ្វើឲ្យ លោក ហាក់មានជំនឿចិត្តខ្ពស់លើក្រុមជម្រើសជាតិអាយុក្រោម២២ឆ្នាំ ក្នុងការក្លាយជាម្ចាស់ជើងឯកនៅឆ្នាំ២០២៣។
«និយាយរួមគោលដៅរបស់យើង គឺចង់លើកពាននៅឆ្នាំ២០២៣។ ហើយមូលហេតុអ្វីដែលអាចថាលើកពាននៅឆ្នាំ២០២៣? ដូចអង្គមហាសន្និបាតបានពិភាក្សានិងឯកភាពគ្នាហើយ នៅស៊ីហ្គេមឆ្នាំ២០២៣ គឺកីឡាករដែលត្រូវប្រកួតសម្រាប់បាល់ទាត់ គឺអាយុក្រោម២២ឆ្នាំ។ បើយើងចាប់ផ្តើមអភិវឌ្ឍនៅពេលនឹង គេក៏ចាប់ផ្តើមអភិវឌ្ឍដូចគ្នានឹងយើង.... មនុស្សដូចតែគ្នា អត់បញ្ហានោះទេ ដូច្នេះសម្រាប់បញ្ហារឿងពាននេះ ដឹងថាយកបានហើយ មិនទៅណារួចពីយើងនោះទេ យើងត្រូវតែយកពាននឹង»។ នេះជាការបង្ហាញគោលបំណងនិងភាពជឿជាក់របស់លោក សៅ សុខា ពេលផ្តល់បទសម្ភាសដល់អ្នកសារព័ត៌មានកាលពីពេលថ្មីៗ។
សម្រាប់លោក សៅ សុខា គោលបំណងទាំងនេះអាចសម្រេចទៅបាន លុះត្រាតែគម្រោងអភិវឌ្ឍន៍កីឡាបាល់ទាត់សាលាតម្រង់ទិស២៥រាជធានី-ខេត្តបញ្ចប់ការសាងសង់ជាស្ថាពរត្រឹមឆ្នាំ២០១៩នេះ។ ព្រោះលោកយល់ថា សាលាតម្រង់ទិសជាប្រភពផ្តល់ធនធាននិងជាកន្លែងបណ្តុះបណ្តាលថ្នាលយុវជនដ៏សំខាន់ក្នុងការអភិវឌ្ឍវិស័យកីឡាបាល់ទាត់នៅកម្ពុជា។ ប៉ុន្តែលោកជឿជាក់ថា បើសិនគម្រោងនេះមិនបានបញ្ចប់តាមការគ្រោងទុក វានឹងធ្វើឲ្យមានការប្រែប្រួលលទ្ធផលនៅឆ្នាំ២០២៣។
បច្ចុប្បន្នគម្រោងសាងសង់ទីលានបាល់ទាត់នៅតាមសាលាទូទាំងរាជធានីខេត្ត មានមួយចំនួនសាងសង់រួចរាល់ជាស្ថាពរ មួយចំនួនកំពុងស្ថិតនៅក្នុងដំណាក់កាលសាងសង់ និងមួយចំនួនទៀតស្ថិតក្នុងការពិភាក្សា និងចុះកិច្ចព្រមព្រៀង។ «សាលាចំនួន៤យើងបានសាងសង់រួចរាល់ហើយនៅខេត្តចំនួន៤ ខណៈ៦ទៀតកំពុងដំណើរការ ៥ទៀតយើងកំពុងចុះកិច្ចសន្យានិងបំពេញនីតិវិធី ដើម្បីបង្គ្រប់១៥ នៅសល់១០ទៀត វាអាស្រ័យលើក្រុមហ៊ុនសាងសង់ បើក្រុមហ៊ុនសាងសង់នេះអាចធ្វើទាន់ យើងនឹងបង្ហើយទាំង២៥រាជធានី-ខេត្តនៅត្រឹមឆ្នាំ២០១៩»។ នេះជាការបន្ថែមរបស់លោក សៅ សុខា។
លោកបានបន្ថែមទៀតថា៖«យើងចង់ធ្វើឲ្យហើយនៅត្រឹមឆ្នាំ២០១៩នេះ ព្រោះអីពេលវេលាពីពេលនេះដល់ឆ្នាំ២០២៣ នៅកៀកណាស់ បើឆ្នាំ២០១៩ យើងអូសបន្លាយពេលវេលា គឺនៅឆ្នាំ២០២៣ យើងនឹងជួបបញ្ហាប្រឈមច្រើនពាក់ព័ន្ធនឹងលទ្ធផលប្រកួតរបស់យើង»។
កាលពីថ្ងៃទី១១ ខែមីនា ឆ្នាំ២០១៩ សហព័ន្ធកីឡាបាល់ទាត់កម្ពុជាបានរៀបចំមហាសន្និបាតបូកសរុបការងារដែលសម្រេចបានក្នុងឆ្នាំ២០១៨ និងដាក់ទិសដៅយុទ្ធសាស្ត្រអភិវឌ្ឍន៍ថ្មីសម្រាប់ឆ្នាំ២០១៩។ ការសាងសង់ហេដ្ឋារចនាសម្ព័ន្ធ និងអភិវឌ្ឍធនធានថ្នាលជាកត្តាចម្បងដែលសហព័ន្ធត្រូវធ្វើនៅឆ្នាំ២០១៩នេះ៕
Tag:
បាល់ទាត់
លោក សៅ សុខា
SEA Games 2023
© រក្សាសិទ្ធិដោយ thmeythmey.com