ចំនួនអាវុធនុយក្លេអ៊ែរនៅក្នុងពិភពលោក ត្រូវបានរំពឹងថា នឹងកើនឡើងនៅទសវត្សរ៍ខាងមុខ ខណៈរដ្ឋទាំង៩ ដែលកាន់កាប់អាវុធប្រភេទនេះ នៅតែបន្តធ្វើទំនើបកម្ម។ នេះបើតាមរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល (SIPRI)។

 

មន្រ្តីការទូតជាន់ខ្ពស់ចិន លោក យ៉ាង ជាឈី បានប្រាប់ទីប្រឹក្សាសន្តិសុខជាតិអាម៉េរិក លោក ជែក ស៊ូលីវែន ថា គោលនយោបាយរបស់អាម៉េរិកនាពេលថ្មីៗនេះ គឺមិនដូចទៅនឹងការសន្យារបស់ខ្លួន ដែលបានធ្វើឡើងនាពេលកន្លងមកឡើយ។ បើតាមលោក យ៉ាង អាម៉េរិក បានអះអាងថា ខ្លួនមិនបានស្វះស្វែងរកសង្រ្គាមត្រជាក់បែបថ្មីជាមួយចិនទេ ប៉ុន្តែបែរជាបន្តគាបសង្កត់ និងប្រឹងទប់ក្រុងប៉េកាំង។

 

 

ច្រកសមុទ្រតៃវ៉ាន់ ជាផ្លូវទឹកអន្តរជាតិ ហើយរដ្ឋាភិបាលតៃវ៉ាន់គាំទ្របេសកកម្មរបស់នាវាអាម៉េរិកក្នុងការបើកឆ្លងកាត់។ ក្រសួងការបរទេសតៃវ៉ាន់ បានបញ្ជាក់បែបនេះ។ បន្ទាប់ពីអះអាងបែបនេះ អាម៉េរិកក៏បានចេញសេចក្តីថ្លែងការណ៍មួយ ចាត់ទុកច្រកសមុទ្រតៃវ៉ាន់ ជាដែនទឹកអន្តរជាតិផង។ 

 

មន្រ្តីផ្នែកចរចាពាណិជ្ជកម្មរបស់ទីក្រុងតៃប៉ិ​ ព្រមានថា ការវាយប្រហាររបស់យោធាចិនទៅលើតៃវ៉ាន់ នឹងមានឥទ្ធិពលខ្លាំងលើលំហូរពាណិជ្ជកម្មសកលជាងសង្រ្គាមអ៊ុយក្រែនទៅទៀត​។

 

 

មន្រ្តីផ្នែកព័ត៌មានរបស់ស្ថានទូតរុស្ស៊ីប្រចាំនៅភ្នំពេញ លោក Rafael Iangareev បានអះអាងថា រុស្ស៊ីគោរពការសម្រេចចិត្តរបស់កម្ពុជា ដែលជារដ្ឋប្រកាន់គោលនយោបាយការបរទេសឯករាជ្យ​ ជុំវិញបញ្ហាអ៊ុយក្រែន។​ បើតាមមន្រ្តីព័ត៌មានដដែល រុស្ស៊ីនៅតែចាត់ទុកកម្ពុជាជាមិត្តជិតស្និទ្ធរូបនេះ ហើយរុស្ស៊ី នឹងព្យាយាមពន្យល់កម្ពុជាពីហេតុផល ដែលរុស្ស៊ីត្រូវបើកប្រតិបត្តិការយោធាពិសេសនៅអ៊ុយក្រែន។

 

រដ្ឋមន្រ្តីការពារជាតិជប៉ុន និងអូស្រ្តាលី បានប្តេជ្ញាពង្រឹងកិច្ចសហប្រតិបត្តិទ្វេភាគីនៅក្នុងតំបន់ឥណ្ឌូ-ប៉ាស៊ីហ្វិក ស្របពេលចិនកំពុងបង្កើនឥទ្ធិពលខ្លួននៅក្នុងតំបន់មួយនេះ តាមរយៈសេដ្ឋកិច្ច និងយោធា។ ប្រមុខការពារជាតិជប៉ុន បានយល់ឃើញថា អូស្រ្តាលី និងជប៉ុន មានការទទួលខុសត្រូវដ៏ធំ ក្នុងការថែរក្សា និងស្ថិរភាពក្នុងតំបន់។

 

 

មេដឹកនាំបារាំង អាល្លឺម៉ង់ និងអ៊ីតាលី បានទៅដល់ក្រុងកៀវហើយ ដើម្បីជួបមេដឹកនាំអ៊ុយក្រែនពិភាក្សាពីការឈ្លានពានរបស់រុស្ស៊ី និងទណ្ឌកម្ម។ ក្នុងទស្សនកិច្ចលើដំបូងនៅក្រុងកៀវចាប់តាំងពីសង្រ្គាមផ្ទុះឡើង លោក អេម៉ានុយអែល ម៉ាក្រុង ប្រធានាធិបតីបារាំង បានប្រាប់អ្នកសារព័ត៌មានថា វត្តមានរបស់មេដឹកនាំទាំងបី ជាការបង្ហាញពីការបង្រួបបង្រួមរបស់អឺរ៉ុប។

 

រដ្ឋមន្រ្តីការបរទេសឥណ្ឌា ស៊ូប្រាម៉ាន់យ៉ាំ ចៃសានកា បានលើកសរសើរថា តួនាទីអាស៊ានប្រហែលសំខាន់ជាងពេលណាទាំងអស់ ក្នុងការកំណត់ពីបញ្ហាភូមិសាស្រ្តនយោបាយ និងភាពមិនប្រាកដប្រជា ដែលពិភពលោកជួបប្រទះ។ ប្រមុខការទូតរូបនេះ បានលើកឡើងថា រដ្ឋាភិបាលក្រុងញូវដែលី គាំទ្រយ៉ាងពេញទំហឹងចំពោះអាស៊ាន ដែលមានតួនាទីស្នូលនៅក្នុងតំបន់ឥណ្ឌូ-ប៉ាស៊ីហ្វិក។

 

 

សមាជិកអង្គការពាណិជ្ជកម្មពិភពលោក (WTO) បានអនុម័តកញ្ចប់កិច្ចព្រមព្រៀងមួយទាក់ទិននឹងវ៉ាក់សាំងជំងឺកូវីដ-១៩ សន្តិសុខស្បៀង និងឧបត្ថម្ភធនលើការនេសាទជាដើម។ ប្រមុខអង្គការពាណិជ្ជកម្មពិភពលោក លោកស្រី Ngozi Okonjo-Iweala បានអះអាងថា កញ្ចប់នៃកិច្ចព្រមព្រៀងនេះ នឹងជួយកែលម្អជីវភាពប្រជាជននៅលើពិភពលោក។

 

មេដឹកនាំកូរ៉េខាងជើង គីម ជុងអ៊ុន និងមន្ត្រីជាន់ខ្ពស់ផ្សេងទៀត បានរៀបចំកញ្ចប់ជំនួយថ្នាំពេទ្យដើម្បីបញ្ជូនដល់គ្រួសារកូរ៉េខាងជើងប្រមាណ៨០០ ដែលកំពុងរងគ្រោះពីជំងឺពាក់ព័ន្ធនឹងមេរោគ​ពោះវៀន​ដែលមិនស្គាល់អត្តសញ្ញាណ ខណៈប្រទេសនេះក៏កំពុងប្រយុទ្ធនឹងជំងឺកូវីដ-១៩ ស្រាប់ផង ។ នេះបើតាមការរាយការណ៍របស់ប្រព័ន្ធផ្សព្វផ្សាយរដ្ឋកូរ៉េខាងជើង៕