Leandro Trossard ជាអ្នកសម្រេចទីគ្រាប់បាល់ជ័យជម្នះ តាមរយៈការបញ្ជូនដ៏ល្អរបស់មិត្តរួមក្រុម Kai Havertz ដើម្បីជួយឱ្យក្រុមកាំភ្លើងធំទទួលបាន៣ពិន្ទុ ពីបិសាចក្រហមនៅ Old Trafford។
 

៣ពិន្ទុដ៏សំខាន់នេះ រុញក្រុមលោក Mikel Arteta ដណ្តើមបានចំណាត់ថ្នាក់កំពូលតារាងលីគកំពូលអង់គ្លេសពី Man City វិញ ដោយមានគម្លាតនាំមុខចំនួន១ពិន្ទុ។ ៣៧ប្រកួត Arsenal រកបាន៨៦ពិន្ទុ ខណៈក្រុមលោក Pep Guardiola មាន៨៥ពិន្ទុ តែទើបប្រកួត៣៦លើកប៉ុណ្ណោះ។
 

ក្រុមម្ចាស់ការពារជើងឯក Man City នឹងត្រូវប្រកួតសប្តាហ៍ទី៣៧របស់ខ្លួនទល់នឹង Tottenham Hotspur នៅរាត្រីថ្ងៃទី១៤ ខែឧសភា។ បើទោះលទ្ធផលប្រកួតក្នុងជំនួបនេះបែបណា ក៏ការប្រជែងពានលីគកំពូលអង់គ្លេសរដូវកាល ២០២៣-២៤ រវាង Man City និង Arsenal នឹងត្រូវកាត់ក្តីនៅក្នុងការប្រកួតបិទរដូវកាល។