ជាតិ
សម្តេច ហ៊ុន ម៉ាណែត នឹងធ្វើទស្សនកិច្ចនៅកូរ៉េខាងត្បូង ពីថ្ងៃទី១៥-១៩ ឧសភា
× សម្តេច ហ៊ុន ម៉ាណែត នាយករដ្ឋមន្ត្រីកម្ពុជា នឹងដឹកនាំប្រតិភូជាន់ខ្ពស់ទៅបំពេញទស្សន កិច្ច ផ្លូវការនៅសាធារណរដ្ឋកូរ៉េ រយៈពេល៤ថ្ងៃ គឺចាប់ពីថ្ងៃទី១៥ ដល់ ១៩ ខែឧសភា ឆ្នាំ២០២៤។ ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ លោក យួន សកយ៉ល (Yoon Suk Yeol) ប្រធានាធិបតី នៃសាធារណរដ្ឋកូរ៉េ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា នៅថ្ងៃទី១៣ ខែឧសភា។
អមដំណើរសម្តេច ហ៊ុន ម៉ាណែត និងភរិយា មានលោកស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា, លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងរដ្ឋមន្ត្រី មន្ត្រីសំខាន់ៗនៃរាជរដ្ឋាភិបាល និងតំណាងពីសភាពាណិជ្ជកម្មកម្ពុជា។
បើតាមសេចក្តីប្រកាសព័ត៌មានដដែល ក្នុងដំណើរទស្សនកិច្ចនេះ សម្តេច ហ៊ុន ម៉ាណែត នឹងមានជំនួបទ្វេភាគីជាមួយ លោក ប្រធានាធិបតី យួន សកយ៉ល ពិភាក្សាស៊ីជម្រៅនូវភាពជាដៃគូ និងពង្រីកកិច្ចសហប្រតិបត្តិការ ពហុវិស័យ ដើម្បីលើកកម្ពស់ទំនាក់ទំនងនៃប្រទេសទាំងពីរ ឱ្យឈានទៅកម្រិតថ្មី។ «ថ្នាក់ដឹកនាំទាំងពីរ នឹងអញ្ជើញធ្វើជាអធិបតីដ៏ខ្ពង់ខ្ពស់ក្នុងពិធីចុះហត្ថលេខាលើឯកសារមួយចំនួនពាក់ព័ន្ធនឹងការអភិវឌ្ឍ សេដ្ឋកិច្ច និងហេដ្ឋារចនាសម្ព័ន្ធ»។ នេះបើតាមសេចក្តីប្រកាសពត៌មានក្រសួងការបរទេសកម្ពុជា ដែលបានបន្តទៀតថា សម្តេចនាយករដ្ឋមន្ត្រី ក៏នឹងមានជំនួបដាច់ដោយឡែកជាមួយ នាយករដ្ឋមន្ត្រី លោក ហាន់ ដុកស៊ូ (Han Duck-soo) និង ប្រធានរដ្ឋសភា លោកគីម ជីនផ្សំ (Kim Jin-pyo)។
ប្រមុខរាជរដ្ឋាភិបាលកម្ពុជា ក៏នឹងអញ្ជើញចូលរួមក្នុងវេទិកាធុរកិច្ចកម្ពុជា-កូរ៉េ និងជួបជាមួយក្រុមហ៊ុនកូរ៉េសំខាន់ៗមួយចំនួន ព្រមទាំងជួបសំណេះសំណាលជាមួយសហគមន៍ខ្មែរនៅកូរ៉ខាងត្បូងផងដែរ។ នេះបើតាមក្រសួងការបរទេសកម្ពុជា៕
© រក្សាសិទ្ធិដោយ thmeythmey.com