ព្រៃកោងកាងប្រមាណ ៤០ហិកតា ជាឆ្នាំងបាយដ៏សំខាន់របស់ប្រជាសហគមន៍ត្រពាំងសង្កែជិត ៦០គ្រួសារ តាមរយៈការមកកម្សាន្តរបស់ទេសចរ។ ព្រៃនេះ ជាជម្រកដ៏សំខាន់របស់ជីវចម្រុះដូចជា សត្វ ក្តាម បង្កង។ ក្រៅពីនេះ ព្រៃកោងកាង ក៏ជាសម្បុកសត្វស្លាបជាច្រើនប្រភេទ ដែលមានវត្តមាននៅជាប់មាត់សមុទ្រនៃខេត្តកំពត។
 

ដើម្បីអាចទៅដាំកូនកោងកាងបាន ទេសចរត្រូវជិតទូក ប្រមាណ៤គីឡូម៉ែត្រ និងប្រើថេរវេលា ១៥នាទី តាមព្រែកក្បាលរមាស។ ទូកទេសចរណ៍ចំនួន១៦ទូក បានតម្រៀបជាជួរនៅសហគមន៍ ដោយបើកបរដោយប្រជាសហគមន៍ក្មេងចាស់។ ទូកមួយមានតម្លៃ ៦ម៉ឺនរៀល ផ្ទុកមនុស្សបានប្រហែល១០នាក់។ អ្នកបើកទូក មមាញឹកខ្លាំងនារដូវបុណ្យទាន និង ថ្ងៃចុងសប្តាហ៍។ ភ្ញៀវដែលមកកម្សាន្តច្រើនគឺជាភ្ញៀវជាតិ មកពីបណ្តាខេត្តនានា  និងភាគច្រើនមកពីរាជធានីភ្នំពេញ៕