គិតត្រឹមថ្ងៃទី២១ ខែឧសភា ក្លិបគិរីវង់សុខសែនជ័យ បានចែកផ្លូវជាមួយកីឡាករ ៨រូប រួមមាន៖ Zenivio Concelcao Mota, Anto Okamura, Elsayed Abdelfattah, ម៉ុន វ៉ាន់ដា, ឡាយ អៀងលី, ទួត សារ៉ូត, ជា វ៉ានសាក់ និងកីឡាករ Nobiraki Deiransupensa។
 

លោក សាប៊ូន វិនតា បានប្រាប់សារព័ត៌មានថ្មីៗ តាមហ្វេសប៊ុកថា កំណែទម្រង់ប្រព័ន្ធលេង គឺមិនប៉ះពាល់ក្នុងការត្រៀមខ្លួនសម្រាប់រដូវកាលក្រោយឡើយ ព្រោះកំណែទម្រង់នេះ ជាផែនការគ្រោងទុកអំឡុងពេលដែលលីគរដូវកាលមុន មិនទាន់បញ្ចប់។ ការតាមដានកីឡាករបណ្ដាក្លិបផ្សេងៗ និងការវាយតម្លៃកីឡាករក្នុងក្លិបគិរីវង់សុខសែនជ័យ គឺជាផែនការ ដែលគ្រូបង្វឹករូបនេះ បានធ្វើសម្រាប់កំណែទម្រង់នេះ។
 

គ្រូបង្វឹកវ័យក្មេងរូបនេះ លើកឡើងថា៖«សមិទ្ធផល នៃរដូវកាលនេះ យើង ធ្វើមិនបានទៅលើអ្វី ដែលយើងចង់បាន។ យើងបាន វាយតម្លៃទៅលើបច្ចេកទេស ការផ្លាស់ប្ដូរកីឡាករមួយចំនួន ដើម្បីបង្កើនគុណភាព នៃការលេងរបស់ក្រុមត្រៀមរដូវកាលក្រោយ។ យើងមានពេលវេលាគ្រប់គ្រាន់ ដោយសារពេលកំពុងប្រកួតប្រជែង យើងបានវាយតម្លៃកីឡាករក្នុងក្រុមខ្លួនឯង ហើយយើងក៏តាមដានកីឡាករផ្សេងទៀត ដែលយើងបានដាក់ក្នុងបញ្ជីរបស់យើងរួចមកហើយ។ អ៊ីចឹង ពេលចប់រដូវកាលភ្លាម យើងចាប់ផ្ដើមចរចារកីឡាករទាំងអស់នោះ។ សម្រាប់ការវាយតម្លៃ បើយើងគិតថា កីឡាករ គាត់មិនអាចជួយយើងបន្ដទៀតបានទេ យើងក៏ផ្លាស់ប្ដូគាត់ ជំនួសកីឡាករមួយចំនួន ដែលយើងគិតថា យើងយកមកអាចជួយក្លិបយើង។»។