សហព័ន្ធកីឡាយានយន្ដកម្ពុជា បានបញ្ជូនរថយន្ដប្រណាំង២គ្រឿង និងរថយន្ដក្រុមការងារ ៦គ្រឿង ចូលរួមប្រកួតព្រឹត្តិការណ៍ Off-Road នៅខេត្តត្រាត ប្រទេសថៃ កាលពីថ្ងៃទី១ ខែឧសភា ឆ្នាំ២០២៤។ ក្រុម VKH Team ដែលកីឡាករ វង្ស គឹមហួត និងជំនួយការ ហេង បញ្ញា ដណ្ដើមបានចំណាត់ថ្នាក់លេខ១ លើការប្រណាំងរថយន្ដឆ្លងឧបសគ្គ Off-Road ដោយមានរថយន្ដចូលរួមប្រកួតសរុប ២៨គ្រឿង។ ដោយឡែក ជារឿងគួរឲ្យសោកស្ដាយ កីឡាករកម្ពុជា ២រូបផ្សេងទៀត គឺ ព្រំ រស្មី និង លាភ ហេង បរាជ័យ ដោយសារបញ្ហាម៉ាស៊ីនឡានខូច។
 

លោក វង្ស គឹមហួត បានបញ្ជាក់ថា ជ័យជម្នះនេះ បានមកដោយសារស្មារតីសាមគ្គីជាក្រុម ដែលបានមកពីការរួមចំណែកពីក្រុមការងារបច្ចេកទេស ការលើកទឹកចិត្តពីប្រធានក្រុមដឹកនាំ លោក ឈិន ឈុំសីហា និងក្រុមការងារពាក់ព័ន្ធផ្សេងទៀត។ 
  

កីឡាករប្រណាំងរថយន្ដរូបនេះ បន្ថែមទៀតថា ការប្រណាំងនេះ មានឧបសគ្គ ដូចជាភ្លៀងធ្លាក់ខ្លាំង ស្ថានភាពផ្លូវលិចទឹក ភក់ជ្រៅ ដីល្បាប់ និងគ្រលុកជ្រៅៗ។ ឧបសគ្គទាំងនេះ បានធ្វើឲ្យកីឡាករចូលរួមខ្លះ បោះបង់ចោលការប្រកួត។
 

ម្ចាស់ពានរង្វាន់នេះ បន្ដទៀតថា ជោគជ័យនេះ គឺជាកត្តាជម្រុញសមត្ថភាពក្រុមការងារទាំងអស់ឲ្យកាន់តែស្ទាត់ជំនាញច្បាស់លាស់ និងបំពេញនូវអ្វី ដែលខ្វះខាត ដើម្បីពង្រឹងសមត្ថភាពត្រៀមប្រកួតព្រឹត្តិការណ៍អន្ដរជាតិនានា នៅពេលក្រោយទៀត។
 

«ជោគជ័យនេះ ជាកត្តាមួយដ៏ល្អសម្រាប់ជម្រុញសមត្ថភាពក្រុមការងារទាំងអស់អោយកាន់តែស្ទាត់ជំនាញច្បាស់លាស់ ដើម្បីពង្រឹងអ្វីដែលខ្វះខាត ជាពិសេសក៏ជាឱកាសសាកល្បងរថយន្តប្រណាំងឱ្យខ្លាំង និងរួចរាល់ត្រៀមការប្រណាំងលើកក្រោយទៀត ដូចជា ការប្រណាំងនៅខេត្តកាន់ឆាណាក់បូរី និងខេត្តត្រាងផងដែរ។»។ វង្ស គឹមហួត បាននិយាយដូច្នេះ៕