ក្នុងដំណើរទស្សនកិច្ចនៅកម្ពុជា នៅថ្ងៃទី៤ ខែមិថុនា លោក ឡយ អូស្ទីន ប្រមុខការពារជាតិអាម៉េរិក បានលើកយកប្រធានបទពាក់ព័ន្ធនឹងការពារជាតិ និងប្រធានបទផ្សេងទៀត ទៅពិភាក្សាជាមួយសម្តេច ហ៊ុន ម៉ាណែត ប្រមុខរដ្ឋាភិបាលកម្ពុជា។ នៅចំពោះមុខរដ្ឋមន្រ្តីការពារជាតិអាម៉េរិក សម្តេច ហ៊ុន ម៉ាណែត បានស្នើបន្តឡើងវិញនូវកិច្ចសហប្រតិបត្តិការលើការធ្វើសមយុទ្ធកងទ័ពកម្ពុជា និងអាម៉េរិក។ កម្ពុជា និងអាម៉េរិក បានផ្អាកសមយុទ្ធយោធាទ្វេភាគី ចាប់តាំងពីឆ្នាំ២០១៧ មក។

 

«សម្តេច បានស្នើរដ្ឋមន្រ្តីការពារជាតិបន្តកិច្ចសហប្រតិបត្តិការឡើងវិញលើវិស័យមួយចំនួន ដូចជាការផ្លាស់ប្តូរនិស្សិតផ្នែកកងទ័ពប្រទេសទាំងពីរ និងកិច្ចសហប្រតិបត្តិការលើការធ្វើសមយុទ្ធយោធារវាងកម្ពុជា និងអាម៉េរិក»។ នេះបើតាមសំណេរមួយបង្ហោះលើបណ្តាសង្គមប្រមុខរដ្ឋាភិបាលកម្ពុជា នៅថ្ងៃទី៤ ខែមិថុនា ក្រោយជំនួបភាគីអាម៉េរិក និងកម្ពុជា។ 

 

បើតាមសម្តេច​ ហ៊ុន ម៉ាណែត ដំណើរទស្សនកិច្ចលើកទីពីររបស់លោក អូស្ទីន នៅកម្ពុជា នឹងជួយរឹតចំណងទំនាក់ទំនងទ្វេភាគីបន្ថែមទៀត ជាពិសេសលើវិស័យការពារជាតិ។ មេដឹកនាំកម្ពុជា បានបង្ហាញក្តីសង្ឃឹមថា វត្តមានរបស់ លោក អូស្ទីន នៅកម្ពុជា នឹងជាឱកាសថ្មីមួយ ក្នុងការពង្រីកកិច្ចសហប្រតិបត្តិការការពារជាតិ ជាពិសេសការប្រយុទ្ធប្រឆាំងភេរវកម្ម ការជួញដូរមនុស្ស និងការជួញដូរគ្រឿងញៀន។ 

 

ចំណែកប្រមុខការពារជាតិអាម៉េរិក​ បានបញ្ជាក់ថា ដំណើរទស្សនកិច្ចរបស់លោក នឹងពង្រឹងកិច្ចសហប្រតិបត្តិការលើវិស័យជាច្រើន ជាពិសេសវិស័យការពារជាតិ។ លោកអូស្ទីន បានអរគុណកម្ពុជា ចំពោះការទទួលយ៉ាងកក់ក្តៅពីភាគីកម្ពុជា។ អតីតនិស្សិតនៅបណ្ឌិត្យសភាយោធាអាម៉េរិក West Point ទាំងពីរ បានពិភាក្សាពីបញ្ហានៅក្នុងតំបន់ផង។

 

នៅក្នុងថ្ងៃដដែល រដ្ឋមន្រ្តីការពារជាតិអាម៉េរិក បានជួបជាមួយសម្តេច​ ហ៊ុន សែន ប្រធានព្រឹទ្ធសភាកម្ពុជា។ ក្នុងជំនួបនោះ សម្តេច ហ៊ុន សែន បានស្នើអាម៉េរិក កុំដាក់កម្ពុជាទៅក្នុងជម្លោះភូមិសាស្រ្តនយោបាយ និងកុំយកកម្ពុជា ធ្វើជាកន្លែងប្រយុទ្ធ។ ថ្នាក់ដឹកនាំប្រទេសទាំងពីរ ក៏បានជជែកពីបញ្ហាសមុទ្រចិនខាងត្បូង សង្រ្គាមនៅអ៊ុយក្រែន និងជម្លោះនៅតំបន់មជ្ឈិមបូព៌ាផងដែរ៕