តៃវ៉ាន់ ជាដែនដីមួយ ដែលចិនចាត់ទុកជាផ្នែកមួយរបស់ខ្លួន តាមរយៈគោលនយោបាយ «ចិនតែមួយ» ហើយប្តេជ្ញាបង្រួមបង្រួមដែនដីទាំង២ ឱ្យខាងតែបាន។ យ៉ាងណាមិញ តៃវ៉ាន់ តែងជំទាស់ ហើយមិនចង់ស្ថិតនៅក្រោមការដឹកនាំរបស់រដ្ឋាភិបាលចិនឡើយ។ 

 

ពីក្នុងសន្និសីទសារព័ត៌មានមួយ ក្នុងខែដំបូងដែលចូលកាន់តំណែងជាប្រធានាធិបតី លោក William Lai បានលើកឡើងថា ការបង្រួមបង្រួមដែនដីតៃវ៉ាន់ ជាគោលនយោបាយរបស់ចិន ហើយយោធាចិន តែងប្រើកម្លាំងបាយ ដើម្បីដាក់សម្ពាធឱ្យតៃវ៉ាន់ ស្ថិតក្រោមការដឹកនាំរបស់ខ្លួន។ 

 

«យ៉ាងណាក៏ដោយ តៃវ៉ាន់ នឹងមិនឱនគោរពនៅចំពោះមុខសម្ពាធចិន»។ លោក Lai បានសង្កត់ធ្ងន់បែបនេះ នៅក្នុងថ្ងៃទី១៩ ខែមិថុនា ដោយបន្តប្រើពាក្យខ្លាំងៗថា ប្រជាជនតៃវ៉ាន់ នឹងការពារអធិបតេយ្យជាតិ ហើយប្រកាន់យកប្រជាធិបតេយ្យ និងសេរី។ 

 

ទោះជាមានការប្រឈមមុខជាមួយចិនដីគោកក្តី មេដឹកនាំតៃវ៉ាន់ថ្មី​ បានប្តេជ្ញាមិនស្វែងរកជម្លោះនោះឡើយ។ 

 

«ប្រជាជនតៃវ៉ាន់ស្រលាញ់សន្តិភាព និងចិត្តល្អចំពោះអ្នកដទៃ»។ លោក Lai បានបញ្ជាក់បែបនេះ ដោយបន្តថា បើចង់បានសន្តិភាព តៃវ៉ាន់ចាំបាច់ ត្រូវតែមានកម្លាំងខ្លាំង ដែលមិនមែនខ្លាំងត្រឹមតែពាក្យសម្តី។  

 

លោក Lai រួមទាំងមន្រ្តីបក្ស​ប្រជាធិបតេយ្យ​ជឿនលឿន (DPP) ផ្សេងទៀត ត្រូវបានចាត់ទុកជាកម្លាំងគាំទ្រចលនាផ្តាច់ទឹកដី។ កន្លងមក ចិន បានសន្យប្រើគ្រប់មធ្យោបាយទាំងអស់ ដោយមិនបានច្រានចោលការប្រើប្រាស់យោធាផង ដើម្បីទប់ស្កាត់ឯករាជ្យភាពតៃវ៉ាន់។ 

 

ប្រធានបទតៃវ៉ាន់ ជាបញ្ហាដ៏ក្តៅមួយរវាងចិន ជាមួយបណ្តាប្រទេសផ្សេងជាពិសេសអាម៉េរិក ដែលតែងផ្តល់ភ្លើងបៃតង ក្នុងការលក់អាវុធដើម្បីពង្រឹងការការពារខ្លួន៕