ជាលើកដំបូង ក្នុងរយៈពេល ២៤ឆ្នាំ លោកវ្ល៉ាឌីមៀ ពូទីន ប្រធានាធិបតីរុស្ស៊ី ដែលទើបស្បថចូលកាន់តំណែងប្រធានាធិបតីនៅអាណត្តិទី៥ បានបំពេញទស្សនកិច្ចនៅកូរ៉េខាងជើង និងជួបជាមួយមេដឹកនាំ លោក​ គីម ជុងអ៊ុន។ បន្ទាប់ពីកិច្ចពិភាក្សានៅក្នុងក្រុងព្យុងយ៉ាង នៅថ្ងៃទី១៩ ខែមិថុនា មេដឹកនាំប្រទេសទាំងពីរ បានចុះហត្ថលេខាលើកិច្ចព្រមព្រៀងមួយ ដើម្បីពង្រឹងទំនាក់ទំងនទ្វេភាគី។ 

 

«រុស្ស៊ី និងកូរ៉េខាងជើង បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្រ្តគ្រប់ជ្រុងជ្រោយ»។ ទីភ្នាក់ងារព័ត៌មានរដ្ឋរុស្ស៊ី RIA Novosti បានចុះផ្សាយបែបនេះ ដោយស្រង់ប្រភពពីអ្នកឆ្លើយឆ្លងមួយរូប។ 

 

ក្នុងដំណើរទស្សនកិច្ច លោកពូទីន បានផ្តល់អំណោយដល់លោកគីម ជាពែងតែ និងរថយន្តទំនើប Aurus ដែលផលិតនៅរុស្ស៊ីមួយគ្រឿង។ លោក Yuri Ushakov ទីប្រឹក្សាប្រធានាធិបតីរុស្ស៊ី បានបញ្ជាក់។ យ៉ាងណាមិញ ទីប្រឹក្សាមេដឹកនាំរុស្ស៊ី មិនបានប្រាប់ឡើយ ថាតើលោកពូទីនទទួលបានអំណោយអ្វី។​ នេះបើតាមការចុះផ្សាយរបស់ទីភ្នាក់ងារ AFP។ 

 

ការចុះហត្ថលេខាលើសន្ធិសញ្ញាភាពជាដៃគូយុទ្ធសាស្រ្តគ្រប់ជ្រុងជ្រោយរវាងក្រុងមូស្គូ និងក្រុងព្យុងយ៉ាង ធ្វើឡើងស្របពេលប្រទេសលោកខាងលិច បារម្ភពីការដោះដូរអាវុធ និងបច្ចេកវិទ្យាយោធារវាងប្រទេសទាំងពីរ។ កន្លងមក កូរ៉េខាងជើង បានចោទប្រកាន់ជាច្រើនលើកពាក់ព័ន្ធនឹងការបញ្ជូនអាវុធឱ្យរុស្ស៊ី សម្រាប់បន្តធ្វើសង្រ្គាមនៅអ៊ុយក្រែន ដែលកើតមានចាប់តាំងពីឆ្នាំ២០២២ មក។ 

 

នៅក្នុងថ្ងៃទី១៩ ខែមិថុនា ដដែល លោកគីម បានថ្លែងទៅកាន់លោកពូទីនថា លោកគាំទ្រប្រតិបត្តិការយោធានៅអ៊ុយក្រែនយ៉ាងមុតមាំ។ ជាការឆ្លើយតប លោកពូទីន បានសម្តែងការអរគុណ ហើយសង្ឃឹមថា នឹងមានកិច្ចប្រជុំកំពូលរវាងមេដឹកនាំប្រទេសទាំងពីរនៅទីក្រុងមូស្គូវិញ។ 

 

ជំនួបរវាងមេដឹកនាំកូរ៉េខាងជើង ដែលហ៊ុមព័ទ្ធដោយទណ្ឌកម្មរបស់សហគមន៍អន្តរជាតិ និងរុស្ស៊ី កើតមាននៅរយៈពេល ៩ខែក្រោយ លោក គីម បានបំពេញទស្សនកិច្ចនៅតំបន់ភាគខាងកើតរុស្ស៊ី។

 

ទំនាក់ទំនងកូរ៉េខាងជើង និងរុស្ស៊ី មានទំនាក់ទំនងល្អតាំងពីសម័យសហភាពសូវៀតមកម្លេះ។ ទន្ទឹមនេះ រុស្ស៊ី ជាអ្នកការពារកូរ៉េខាងជើងយ៉ាងមុតមាំមួយនៅលើឆាកអន្តរជាតិ ជាពិសេសនៅក្រុមប្រឹក្សាសន្តិសុខអង្គការសហប្រជាជាតិ តាមរយៈសិទ្ធិវេតូ។ បន្ទាប់ពីកូរ៉េខាងជើង លោកពូទីន នឹងបន្តទស្សនកិច្ចនៅវៀតណាម ក្នុងថ្ងៃទី១៩ ខែមិថុនា៕