សំណុំរឿងឯកឧត្តម សម រង្ស៊ី ដែលប្តឹងដោយសម្តេច ហ៊ុន សែន ត្រូវបានបញ្ជូនទៅកាត់ក្តី

ជាតិ

នយោបាយជាតិ

សំណុំរឿងឯកឧត្តម សម រង្ស៊ី ដែលប្តឹងដោយសម្តេច ហ៊ុន សែន ត្រូវបានបញ្ជូនទៅកាត់ក្តី

04, Nov 2016 , 10:39 pm

រូបភាព

ដោយ: ម៉ៅ សុផា

ភ្នំពេញ៖ ព្រះរាជអាជ្ញា បានសម្រេចបញ្ជូនសំណុំរឿងរបស់ឯកឧត្តម សម រង្ស៊ី ទៅជំនុំជម្រះផ្ទាល់ កាលពីពេលថ្មីៗនេះ។ សម្តេច ហ៊ុន សែន បានប្តឹងឯកឧត្តម សម រង្ស៊ី ដែលចោទរដ្ឋាភិបាលថា នៅពីក្រោយឃាតកម្មលើលោក កែម ឡី។

លោក លី សុផាណា ព្រះរាជអាជ្ញារងនៃអយ្យការអមសាលាដំដូងរាជធានីភ្នំពេញ បានបញ្ជូនសំណុំរឿងរបស់ឯកឧត្តម សម រង្ស៊ី ប្រធានគណបក្សសង្គ្រោះជាតិ ដែលប្តឹងដោយសម្តេច ហ៊ុន សែន ទៅជំនុំជម្រះតែម្តង ដោយមិនឆ្លងកាត់ដំណាក់កាលនៃការស៊ើបសួរនោះទេ។ លោក លី សុផាណា ដែលជាអ្នកកាន់សំណុំរឿងនេះ បានចោទឯកឧត្តម សម រង្ស៊ី ពីបទ «បរិហារកេរ្តិ៍ជាសាធារណៈ» និងបទ «ញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។

ទាក់ទងនឹងកាលបរិច្ឆេទនៃការជំនុំជម្រះ លោក លី សុផាណា មិនបានបញ្ជាក់នោះទេ។

ការរងបទចោទបែបនេះ គឺដោយសារតែឯកឧត្តម សម រង្ស៊ី បានបង្ហោះសារក្នុងបណ្តាញសង្គមហ្វេសប៊ុក ដោយចោទរដ្ឋាភិបាល ថានៅពីក្រោយខ្នង នៃអពើឃាតកម្មលើលោក កែម ឡី។ ក្នុងនាមជាប្រមុខរដ្ឋាភិបាល សម្តេច ហ៊ុន សែន ក៏បានពឹងពាក់លោកមេធាវី គី តិច ដើម្បីប្តឹងឯកឧត្តម សម រង្ស៊ី ចំពោះការចោទប្រកាន់ខាងលើ។

ក្រៅពីប្តឹងឯកឧត្តម សម រង្ស៊ី លោក គី តិច ក៏បានប្តឹងលោកស្រី ថាក់ ឡានី សមាជិកាព្រឹទ្ធសភាពីគណបក្ស សម រង្ស៊ី ថែមទៀត។ លោក គី តិច បានប្តឹងលោកស្រីថាក់ ឡានី ដោយយោងទៅលើវីដេអូឃ្លីបមួយ ដែលត្រូវបានបង្ហោះក្នុងបណ្តាញសង្គមហ្វេសប៊ុក។

បើតាមវីដេអូឃ្លាបនោះ លោកស្រី ថាក់ ឡានី បាននិយាយថា សម្តេច ហ៊ុន សែន ជាអ្នកនៅពីក្រោយខ្នងនៃអំពើឃាតកម្មលើលោក កែម ឡី។ ក្រោយមក តុលាការ ក៏បានចោទលោកស្រី ដូចទៅនឹងបទចោទរបស់ឯកឧត្តម សម រង្ស៊ី ដែរ។

សាលាដំបូងរាជធានីភ្នំពេញ បានបើកសវនាការ ជំនុំជម្រះលើសំណុំរឿងរបស់លោកស្រី ថាក់ ឡានី រួចហើយ កាលពីថ្ងៃទី២ ខែវិច្ឆិកា ឆ្នាំ២០១៦។ ប៉ុន្តែ ចៅក្រមជំនុំជម្រះ មិនទាន់ប្រកាសសាលក្រមនោះទេ ដោយរង់ចាំប្រកាសនៅថ្ងៃទី១៧ ខែវិច្ឆិកា ឆ្នាំ២០១៦ ឯណោះ៕