ជាតិ
Guinness Records៖ វីរកណ្តុរ Magawa ម្ចាស់កំណត់ត្រាហិតមីនបានច្រើនជាងគេបំផុត ប្រភពរូបថត៖ CMAC និង APOPO
× រាវរកហិតគ្រាប់មីន និងយុទ្ធភណ្ឌមិនទាន់ផ្ទុះ បាន៧១គ្រាប់ នាអំឡុងប្រតិបត្តិការ៥ឆ្នាំនៅកម្ពុជា ជាពិសេសក្នុងខេត្តសៀមរាប និងព្រះវិហារ នាំឲ្យ Magawa ក្លាយជាម្ចាស់កំណត់ត្រា The Most Landmines Detected by A Rat (កណ្តុរដែលរកឃើញមីនច្រើនជាងគេបំផុត)។ សៀវភៅកំណត់ត្រា Guinness World Records បានលើកឡើងយ៉ាងដូច្នេះ ដោយបានសំដែងការសោកស្តាយចំពោះការបាត់បង់ជីវិតវីរកណ្តុរមួយក្បាលនេះក្នុងអាយុ៨ឆ្នាំ។
«Magawa វីរកណ្តុរហិតមីន HeroRat បានបាត់បង់ជីវិតដ៏គួរឲ្យសោកស្តាយក្នុងអាយុ៨ឆ្នាំ។ គេជាម្ចាស់កំណត់ត្រាកណ្តុរដែលរកឃើញមីនច្រើនជាងគេបំផុតក្នុងអាជីពរបស់ខ្លួន ពោលគឺ៧១គ្រាប់»។ នេះជាការកត់សម្គាល់របស់ Guinness World Records។
ក្រៅពីម្ចាស់កំណត់ត្រាក្នុង Guinness Book កណ្តុរយក្សអាហ្វ្រិកមួយក្បាលនេះ គឺជាសត្វដំបូងបំផុតក្រៅពីសុនខ ដែលទទួលបានមេដាយមាសការងារ PDSA Gold Medal ពីអង្គការសប្បុរសធម៌សត្វព្រៃ (PDSA) នៃចក្រភពអង់គ្លេស។ មេដាយនេះ មានតម្លៃស្មើមេដាយ George Cross Medal សម្រាប់មនុស្សផងដែរ។
មរណភាពរបស់ វីរកណ្តុរម៉ាហ្គាវ៉ា (HeroRAT) កើតឡើងប៉ុន្មានខែប៉ុណ្ណោះ ក្រោយការចូលនិវត្តន៍ពីបេសកកម្មដោះមីនរយៈពេល៥ឆ្នាំនៅកម្ពុជាចន្លោះពីឆ្នាំ២០១៧ ដល់ឆ្នាំ២០២១ ជាពិសេសក្នុងមូលដ្ឋានខេត្តសៀមរាប និងព្រះវិហារ។
ក្រៅពីរុករកហិតគ្រាប់មីន និងយុទ្ធភណ្ឌមិនទាន់ផ្ទុះ បាន៧១គ្រាប់ក្នុងប្រតិបត្តិការខ្លួន វីរកណ្តុរ Magawa ក៏ធ្លាប់រកឃើញសំណល់ជាតិផ្ទុះពីសង្គ្រាម ERW ចំនួន៣៨ផ្សេងទៀត ក្នុងនោះរួមមាន កាំភ្លើងត្បាល់ និងគ្រាប់បែកដៃមិនទាន់ផ្ទុះផងដែរ។
ចាប់កំណើតនៅសាកលវិទ្យាល័យកសិកម្ម Sokoine University of Agriculture ក្នុងប្រទេសតង់ហ្សានី នាខែវិច្ឆិកា ឆ្នាំ២០១៣ ម៉ាហ្គាវ៉ា ជាកណ្តុរដែលត្រូវបានបង្វឹកដោយអង្គការសប្បុរសធម៌បែលហ្ស៊ិក APOPO លើជំនាញហិតមីន។ ម៉ាហ្គាវ៉ា បានមកដល់កម្ពុជានៅឆ្នាំ២០១៦ ដោយផ្តើមបំពេញបេសកកម្មនៅសៀមរាប ឧត្តរមានជ័យ និងព្រះវិហារ ក្រោមការគ្រប់គ្រងរបស់អង្គការស៊ីម៉ាក់ និងអង្គការ APOPO។
ការរួមចំណែកដ៏ធំធេងរបស់ម៉ាហ្គាវ៉ា ដែលបានចូលនិវត្តកាលពីខែមិថុនា ឆ្នាំ២០២១ រួមចំណែកជួយដល់ពលរដ្ឋកម្ពុជាជាច្រើនរស់នៅដោយរីករាយ និងគ្មានការភ័យខ្លាច។ កាលពីថ្ងៃទី១១ ខែមករា អង្គការ APOPO បានប្រកាសពីដំណឹងមរណភាពរបស់វីរកណ្តុរ ក្រោយពីការចុះខ្សោយសុខភាព ដោយស៊ីតិច និងដេកច្រើន។
«សូមអរគុណអ្នកទាំងអស់ ម៉ាហ្គាវ៉ា នឹងបន្សល់ទុកនូវមរតកដ៏យូរអង្វែងមួយក្នុងជីវិត តាមរយៈបេសកកម្មរាវរកមីននៅកម្ពុជា»។ APOPO បានសរសេរយ៉ាងដូច្នេះនៅលើគេហទំព័ររបស់ខ្លួន៕
© រក្សាសិទ្ធិដោយ thmeythmey.com