អន្តរជាតិ
មេដឹកនាំកូរ៉េខាងជើង ជំរុញឱ្យពង្រីកកម្លាំងយោធាបន្ថែមទៀតបន្ទាប់ពីតេស្ដមីស៊ីលលឿនជាងសំឡេង ប្រមុខដឹកនាំកូរ៉េខាងជើង ត្រួតពិនិត្យការបាញ់មីស៊ីលនៅថ្ងៃទី១១ ខែមករា។ រូបថត KCNA
× ប្រមុខដឹកនាំកូរ៉េខាងជើង គីម ជុងអុន បានជំរុញឱ្យពង្រីកកម្លាំងយោធាបន្ថែមទៀត បន្ទាប់ពីបានចូលរួមត្រួតពិនិត្យការបាញ់សាកល្បងមីស៊ីលល្បឿនលឿនជាងសំឡេង។ ទីភ្នាក់ងាររដ្ឋកូរ៉េខាងជើង KCNA រាយការណ៍បែបនេះ នៅថ្ងៃទី១២ ខែមករា។
នៅថ្ងៃទី១១ ខែមករា កូរ៉េខាងជើងបានបាញ់ មីស៊ីលសាកល្បងជាលើកទី២សម្រាប់ឆ្នាំ២០២២ ដែលត្រូវបានប្រព័ន្ធផ្សព្វផ្សាយរដ្ឋបញ្ជាក់ថា ជាមីស៊ីលល្បឿនលឿនជាងសំឡេង។ បន្ទាប់ពីការតេស្តនេះ សហគមន៍អន្តរជាតិ បានថ្កោលទោសកូរ៉េខាងជើងយ៉ាងខ្លាំង ហើយអគ្គលេខាធិការអង្គការ សហប្រជាជាតិ និងក្រសួងការបរទេសអាម៉េរិក ក៏បានបង្ហាញការព្រួយបារម្ភជាខ្លាំងចំពោះទង្វើគំរាមស្ថិរភាពតំបន់។
«ការបាញ់សាកល្បងនេះ ផ្ដោតទៅលើការផ្ទៀងផ្ទាត់ចុងក្រោយនៃលក្ខណៈបច្ចេកទេសទូទៅនៃមីស៊ីលល្បឿនលឿនជាងសំឡេងដែលបានអភិវឌ្ឍរួច»។ KCNA អះអាងថាបែបនេះ មុនរាយការណ៍ទៀតថា មីស៊ីលនេះ ត្រូវបានបាញ់ចេញពីជើងទម្រ ហើយបានវាយប្រហារទៅលើគោលដៅក្នុងសមុទ្រខាងកើតដែលមានចម្ងាយ១ពាន់គីឡូម៉ែត្រពីចំណុចដែលបានបាញ់ចេញ។ មីស៊ីលល្បឿនលឿនជាងសំឡេងនេះ ក៏បានបង្ហាញពីការហោះហើរចុះឡើងផងដែរ។
មេដឹកនាំកូរ៉េខាងជើង គីម ជុងអ៊ុន បានចូលរួមត្រួតពិនិត្យការតេស្ដមីស៊ីលនេះដែរ ដែលជាលើកដំបូងក្នុងរយៈពេលជិតពីរឆ្នាំកន្លងមក។ បន្ទាប់ពីមើលការសាកល្បងរួច លោក គីម បានជំរុញឱ្យអ្នកវិទ្យាសាស្ត្រនៃយោធាកូរ៉េខាងជើងពន្លឿនកិច្ចខិតខំប្រឹងប្រែងបន្ថែមទៀតដើម្បីពង្រីកកម្លាំងយោធាយុទ្ធសាស្ត្ររបស់ប្រទេស ទាំងគុណភាព និងបរិមាណ ព្រមទាំងធ្វើទំនើបកម្មកងទ័ពបន្ថែមទៀតផង។
ចំពោះការតេស្តលើកទី២នេះដែរ កូរ៉េខាងត្បូង អះអាងថា សមត្ថភាពមីស៊ីលកូរ៉េខាងជើងហាក់ប្រសើរឡើង ដោយមីស៊ីលនោះបានឈានដល់ល្បឿនអតិបរមាដែលមានល្បឿន១០ដងនៃល្បឿនសំឡេង ឬ១២,៣៤៨គីឡូម៉ែត្រក្នុងមួយម៉ោង៕
© រក្សាសិទ្ធិដោយ thmeythmey.com