អន្តរជាតិ
WHO៖ ការចាត់ទុកជំងឺកូវីដ-១៩ ដូចជំងឺគ្រុនផ្ដាសាយធម្មតាគឺលឿនពេកហើយ
× អង្គការសុខភាពពិភពលោក (WHO) ប្រចាំអឺរ៉ុប នៅថ្ងៃទី១១ ខែមករា បានរិះគន់ការចាត់ទុកជំងឺកូវីដ-១៩ ជាជំងឺគ្រុនផ្ដាសាយធម្មតា ទោះបីជាវីរុសបំប្លែងខ្លួនថ្មីអូមីក្រុងដែលបង្កជាជំងឺកូវីដ-១៩ មិនបានបង្កើនករណីអ្នកស្លាប់ក៏ដោយ។ មន្ត្រី WHO អះអាងថា វាជារឿងលឿនពេកដែលចាត់ទុកកូវីដ-១៩ ដូចផ្ដាសាយនោះ។
ប្រទេសចំនួន៥០ក្នុងចំណោមប្រទេសចំនួន៥៣នៅអឺរ៉ុប និងអាស៊ីកណ្តាល បានកត់ត្រាករណីឆ្លងវីរុសអូមីក្រុងនេះ ហើយនៅប៉ែកអឺរ៉ុប ករណីឆ្លងថ្មីជាង៧លានករណីឯណោះ ត្រូវបានរកឃើញនៅក្នុងសប្តាហ៍ដំបូងនៃឆ្នាំ២០២២។ ទិន្នន័យដែលកំពុងមានបច្ចុប្បន្នបង្ហាញថា វីរុសមួយនេះប៉ះពាល់ផ្លូវដង្ហើមខាងលើច្រើនជាងផ្នែកខាងក្រោមដូចជាសួតជាដើម ហើយបង្ករោគសញ្ញាស្រាលជាងវីរុសទម្រង់ផ្សេងៗពីមុន។ WHO ព្រមានថា ការសិក្សាបន្ថែមទៀតនៅតែត្រូវការដើម្បីបញ្ជាក់ពីការសន្និដ្ឋាននេះ។
នៅថ្ងៃទី១០ ខែមករា នាយករដ្ឋមន្ត្រីអេស្ប៉ាញ Pedro Sanchez សំអាងថា វាប្រហែលជាដល់ពេលដែលត្រូវផ្លាស់ប្តូររបៀបនៃការតាមដានការវិវត្តរបស់ជំងឺកូវីដ-១៩ ដោយជំនួសដោយការប្រើវិធីសាស្ត្រស្រដៀងនឹងជំងឺផ្តាសាយ ពីព្រោះការបង្កឱ្យអ្នកជំងឺស្លាប់មានការធ្លាក់ចុះ។ លោក Pedro ទំនងមានន័យថា ជំងឺកូវីដ-១៩ គួរត្រូវចាត់ទុកជាជំងឺទូទៅធម្មតាជាជាងជំងឺឆ្លង ហើយប្រទេសទាំងអស់មិនចាំបាច់កត់ត្រាគ្រប់ករណីឆ្លង និងធ្វើតេស្តរាល់អ្នកដែលមានរោគសញ្ញានោះទេ។
យ៉ាងណាមិញ មន្ត្រីជាន់ខ្ពស់របស់ WHO ប្រចាំអឺរ៉ុប លោកស្រី Catherine Smallwood នៅថ្ងៃទី១១ ខែមករា បានច្រានចោលការលើកឡើងបែបនេះ ហើយសង្កត់ធ្ងន់ថា ការចាត់ទុកជំងឺកូវីដ-១៩ជាជំងឺគ្រុនផ្ដាសាយធម្មតាគឺលឿនពេកហើយ។ លោកស្រី Smallwood បញ្ជាក់ថា៖ «យើងនៅមានរឿងជាច្រើនទៀតដែលមិនមានភាពប្រាកដប្រជា ហើយក៏មានទាំងវីរុស(ទម្រង់អូមីក្រុង) ដែលឆ្លងយ៉ាងឆាប់រហ័ស និងកំពុងតែបង្កបញ្ហាប្រឈមថ្មីៗ។ យើងពិតជាមិននៅចំណុចមួយដែលយើងអាចហៅវាជាជំងឺឆ្លងធម្មតានោះទេ»។
មន្ត្រី WHO រូបនោះក៏បានបន្តថា ជំងឺកូវីដ-១៩ នៅពេលអនាគតអាចនឹងក្លាយជាជំងឺឆ្លងធម្មតា ប៉ុន្តែការណ៍អាចនឹងពិបាកនឹងកើតឡើងក្នុងឆ្នាំ២០២២នេះ៕
© រក្សាសិទ្ធិដោយ thmeythmey.com