រថយន្ត
អន្តរជាតិ
×![]()
ដោយ: ធីតា
ឧស្សាហកម្មយានយន្តតួកគី បានធ្លាក់ចុះ ១,៦ភាគរយលើការនាំចេញនាខែមករា កន្លងមក ប៉ុន្តែចំណូល ២,២ពាន់លានដុល្លារអាម៉េរិកនៅតែជាការរួមចំណែកដ៏ធំនៃសេដ្ឋកិច្ចរបស់ប្រទេសមួយនេះ រយៈពេល១៦ឆ្នាំជាប់គ្នា។ នេះបើតាមទិន្នន័យដែលផ្សព្វផ្សាយសមាគមឧស្សាហកម្មនាំចេញយានយន្ត Uludag (OIB)។
របាយការណ៍បានបង្ហាញថា ទោះបីមានការធ្លាក់ចុះ ប៉ុន្តែចំណូល ២,២ពាន់លានដុល្លារអាម៉េរិក ពីការនាំចេញយានយន្តរបស់តួកគី នៅតែឈរលំដាប់ថ្នាក់ទីមួយ លើការនាំចេញផលិតផលទាំងអស់ទូទាំងប្រទេស ពោលគឺរួមចំណែកដល់ទៅ ១២,៧ភាគរយឯណោះ។
លោក Baran Celik ប្រធានសមាគម OIB បានបញ្ជាក់ថា ខែដំបូងនៃឆ្នាំ២០២២ ពិភពលោកនៅតែបន្តប្រឈមនឹងវិបត្តិផ្សេងៗទាក់ទង បន្ទះឈីបរថយន្ត និងគ្រឿងបន្លាស់នានា ជាពិសេសការដំឡើងថ្លៃខ្ពស់។ លោកបានបញ្ជាក់ថា៖ «យើងមានកំណត់ត្រានាំចេញខ្ពស់ជាង៤០ភាគរយទៅបណ្តាប្រទេសមួយចំនួន ដូចជា ចក្រភពអង់គ្លេស សហរដ្ឋអាម៉េរិក និងអេហ្ស៊ីប»។
របាយការណ៍បានបញ្ជាក់ថា ការនាំចេញឧស្សាហកម្មផ្គត់ផ្គង់ កើន៧ភាគរយ នៅខែមករា ខណៈការនាំចេញរថយន្តដឹកអ្នកដំណើរ ថយចុះ ២១ភាគរយ ។ រីឯការនាំចេញយានយន្តសម្រាប់ដឹកទំនិញ កើន៣ភាគរយ និងការនាំចេញរថយន្ត Bus, Minibus និង Midibus កើនដល់ទៅ ៣៩ភាគរយផងដែរ។
ឧស្សាហកម្មផ្គត់ផ្គត់យានយន្តតួកគី ក៏មានកំណើនលក់ចេញទៅកាន់ទីផ្សារ រុស្ស៊ី ប៉ូឡូញ ស្លូវេនី ហូឡង់ និងអាល្លឺម៉ង់ ផងដែរ ប៉ុន្តែបានធ្លាក់ចុះនៅទីផ្សារម៉ារុក និងហុងគ្រី៕
© រក្សាសិទ្ធិដោយ thmeythmey.com
