ជាតិ
វីដេអូ
«ប្រហុកខ្មែរទំនើប»ត្រៀមនាំចេញទៅក្រៅប្រទេសជាផ្លូវការ
× ភ្នំពេញ៖ ប្រហុក គឺជាអាហារមូលដ្ឋាន និងជាអាហារប្រពៃណីរបស់ខ្មែរតាំងពីច្រើនរយពាន់ឆ្នាំមកហើយ។ គ្មានកូនខ្មែរណាម្នាក់មិនស្គាល់ប្រហុកនោះទេ។ ប្រហុកអាចត្រូវបានគេប្រើប្រាស់ និងពិសាសុទ្ធតែម្តង ឬត្រូវបានគេប្រើប្រាស់ជាគ្រឿងផ្សំគាំទ្រសម្រាប់ធ្វើម្ហូបអាហារផ្សេងៗទៀត។
ដើម្បីទទួលបានព័ត៌មានលម្អិតបន្ថែម សូមអញ្ជើញស្តាប់បទសម្ភាសរវាងលោក គី សុខលីម អ្នកសារព័ត៌មានឌីជីថលថ្មីៗ និងលោក ហៃ លីអ៊ាង ស្ថាបនិកសហគ្រាស Confirel ដូចតទៅ៖
អស់រយៈពេលជាច្រើនរយពាន់ឆ្នាំមកហើយ ដែលប្រហុកបុរាណខ្មែរមានទម្រង់ ក្លិន និងរសជាតិនៅដដែល។ ប្រហុកខ្មែរបែបបុរាណនៅតែមានតម្លៃប្រវត្តិសាស្រ្តរបស់វាដដែល។ ប៉ុន្តែដើម្បីឆ្លើយតបទៅនឹងតម្រូវការនៃសម័យទំនើប សហគ្រាស Confirel (ខនហ្វីរេល) ដែលជំនាញខាងផលិតផលិតផលខ្មែរ បានសម្រេចចិត្តផលិតប្រហុកខ្មែរទំនើប ឬប្រហុកស្ងួតខ្មែរ។ អ្នកប្រើប្រាស់អាចយកប្រហុកខ្មែរទំនើបនេះ ទៅធ្វើជាប្រហុកខ្ទិះ ទឹកប្រហុក បាយឆាប្រហុកបានភ្លាមៗដោយមិនចាំបាច់ចំណាយពេលយូរឡើយ។
លោក ហៃ លីអ៊ាង ស្ថាបនិករោងចក្រឱសថ PPM និងសហគ្រាស Confirel សង្ឃឹមថា ប្រហុកខ្មែរទំនើបនេះ នឹងអាចទទួលបានកម្មសិទ្ធិបញ្ញាអន្តរជាតិនាពេលអនាគតដ៏ខ្លីខាងមុខនេះ។ ស្របពេលជាមួយគ្នា ប្រហុកខ្មែរទំនើប ក៏បានចាប់ផ្តើមចរាចរនៅលើទីផ្សារក្នុងប្រទេស និងក្រៅប្រទេសបន្តិចម្តងៗផងដែរ។ លោក លីអ៊ាង បានបញ្ជាក់ថា ប្រហុកខ្មែរបែបប្រពៃណីនៅតែមានតម្រូវការដដែល។ ប៉ុន្តែ ប្រហុកខ្មែរទំនើប គឺជាផលិតផលខ្មែរចេញពីគំនិតច្នៃប្រឌិតថ្មីមួយទៀតដើម្បីឆ្លើយតបទៅនឹងតម្រូវការនៃអតិថិជនជាតិ និងអន្តរជាតិមួយចំណែកផ្សេងទៀត។ លោក បន្ថែមទៀតថា លោកមិនចង់ឃើញប្រទេសដទៃទិញត្រីពីស្រុកខ្មែរ ផលិតប្រហុកនៅស្រុកគេ រួចហើយនាំចេញទៅទីផ្សារក្រៅប្រទេសឡើយ៕
Tag:
ប្រហុក
លោក ហៃ លីអ៊ាង
© រក្សាសិទ្ធិដោយ thmeythmey.com