លោក វ៉ន សំភាស់ នាយកប្រចាំប្រទេសអង្គការ អេដ អេ អាកស្យុង មាន​ប្រសាសន៍​ថា  ក្នុងរយៈពេល២ទសវត្សរ៍នេះ  អង្គការ អេដ អេ អាកស្យុង  បាន​វិនិយោគជិត​៦០​លានដុល្លារ ​ក្នុងការផ្តល់នូវការអប់រំប្រកប​ដោយគុណភាព និងបរិយាបន្នដល់កុមារ​កម្ពុជា​។ «យើងមានមោទកភាព ចំពោះលទ្ធផល​ដែលយើងសម្រេច​បានក្នុង​រយៈពេល​២ទសវត្សរ៍មកនេះ។ វាជាកិត្តិយសណាស់​ក្នុងការ​បម្រើសហគមន៍កម្ពុជា និងចូលរួមចំណែក​ដល់ការអភិវឌ្ឍក្នុងវិស័យអប់រំនៅក្នុងប្រទេស។»។ លោក វ៉ន សំភាស់ លើកឡើងដូច្នេះ ដោយបន្តបញ្ជាក់ពីប្តេជ្ញាបន្តឆ្ពោះទៅមុខដោយក្តីសង្ឃឹម តាមរយៈការពង្រីកឥទ្ធិពលវិជ្ជមានរបស់ខ្លួនលើជីវិតរបស់សិស្សរាប់ម៉ឺននាក់ ក្នុង​គោលដៅលើក​កម្ពស់​វិស័យអប់រំ និងការធានាឱ្យបាននូវគុណភាពអប់រំសម្រាប់​កុមារ​ដែលជួបការលំបាកនៅកម្ពុជា។