RFI
អន្តរជាតិ
ភរិយាមេម៉ាយរបស់លោកណាវ៉ាល់នី សន្យាបន្តបុព្វហេតុតស៊ូដើម្បីសេរីភាពរុស្ស៊ី
ភរិយាមេម៉ាយរបស់លោកណាវ៉ាល់នី សន្យាបន្តការតស៊ូដើម្បីសេរីភាពរុស្ស៊ី AP
×![]()
ដោយ៖អៀង សុខម៉ិញ/RFI ខេមរភាសា
អ្នកស្រីជូលីយ៉ា ណាវ៉ាល់ណាញ៉ា ភរិយាមេម៉ាយរបស់លោកអាឡិចសី ណាវ៉ាល់នី បានប្រកាសប្តេជ្ញាបន្តបុព្វហេតុនយោបាយរបស់ស្វាមី ក្នុងការតស៊ូប្រឆាំងនឹងលោកវ្លាដេមៀ ពូទីន និងបានអំពាវនាវឱ្យសកម្មជនប្រឆាំងទាំងអស់បន្តសកម្មភាពជាមួយអ្នកស្រីដើម្បីសេរីភាពប្រទេសរុស្ស៊ី។
នៅក្នុងសារវីដេអូ៩នាទី បង្ហោះផ្សាយនៅល្ងាចថ្ងៃចន្ទទី១៩ កុម្ភៈ អ្នកស្រី ជូលីយ៉ា ណាវ៉ាល់ណាញ៉ា ភរិយាមេម៉ាយរបស់លោកអាឡិចសី ណាវ៉ាល់នី បានស្បថសច្ចាបន្តបុព្វហេតុតស៊ូ ដើម្បីសេរីភាពរុស្ស៊ី ជាមួយសកម្មជនទាំងឡាយ៖ “យើងត្រូវតែរួបរួមគ្នាជាធ្លុងមួយដើម្បីវាយផ្តួលលោកពូទីន និងក្រុមមិត្តភឿន ពុករលួយ ព្រមទាំងពួកចោរឃាតករដែលចង់បំផ្លាញប្រទេស”។ ដោយត្រលប់មករៀបរាប់អំពីប្រវត្តិនិងទុក្ខវេទនារបស់ស្វាមី អ្នកស្រីចោទដោយត្រង់ៗថា លោកពូទីនជាអ្នកសម្លាប់លោកអាឡិចសី ណាវ៉ាល់នី ជាឪពុករបស់កូនៗគាត់ ហើយអាជ្ញាធរលាក់សព ដើម្បីបំបាត់ដាននៃការប្រើថ្នាំគីមីបំពុលNovitchok។ តែអ្នកស្រីបានធានាថា មិនយូរទេគេនឹងរកឃើញជនដៃដល់ប្រព្រឹត្តអំពីឧក្រិដ្ឋនិងលក្ខខណ្ឌនៃការស្លាប់របស់លោកណាវ៉ាល់នី។ នេះបើតាមសារវីដេអូដដែល។
ភរិយាមេម៉ាយរបស់លោកណាវ៉ាល់នី ក៏បានជំរុញឱ្យសហភាពអឺរ៉ុបកុំទទួលស្គាល់លទ្ធផលបោះឆ្នោតប្រធានាធិបតីរុស្ស៊ីនៅថ្ងៃទី១៥-១៧មីនាដែលលោកពូទីនគ្រោងជាប់ឆ្នោតជាថ្មី។ បើតាមអ្នកស្រី ប្រធានាធិបតីដែលសម្លាប់គូប្រជែងនយោបាយដ៏ចម្បងរបស់ខ្លួន មិនសមជាប្រធានាធិបតីទេ។
ដោយមិនបង្អង់ អ្នកនាំពាក្យវិមានក្រេមឡាំងបានបញ្ចេញប្រតិកម្ម ច្រានចោលការចោទប្រកាន់របស់អ្នកស្រីជូលីយ៉ា ណាវ៉ាន់ណាញ៉ា ថាគ្មានមូលដ្ឋាន។ បើតាមអ្នកគ្រប់គ្រងពន្ធនាគារ លោកអាឡិចស៊ី ណាវ៉ាល់នី បានដួលបាត់ស្មារតីហើយស្លាប់ នៅម៉ោងចេញដើរលំហែក្នុងគុក ហើយការវិភាគសាកសពត្រូវការពេលយ៉ាងតិច១៤ថ្ងៃ និងអាចពន្យារពេលជាច្រើនសប្តាហ៍ទៀតដើម្បីអង្កេត។ នៅថ្ងៃអង្គារនេះ ម្តាយលោកណាវ៉ាល់នី អំពាវនាវទៅកាន់លោកពូទីនដោយផ្ទាល់តែម្តង ឱ្យប្រគល់សពកូនប្រុសដើម្បីធ្វើបុណ្យ។ ប៉ុន្តែគ្មានចម្លើយតបសោះ។
សូមបញ្ជាក់ថាមរណភាពរបស់លោកណាវ៉ាល់នី បានបង្កឱ្យភាពរំជើបរំជួលទាំងនៅក្នុងប្រទេសរុស្ស៊ី និងនៅបរទេស។ នៅម៉ូស្គូ ប៉ូលិសបានអនុញ្ញាតឱ្យពលរដ្ឋយកផ្កាទៅបូជាសពមេបក្សប្រឆាំងនៅវិមានរឭកវិញ្ញាណក្ខន្តជនរងគ្រោះនយោបាយ។ នៅអឺរ៉ុប បារាំង អាល្លឺម៉ង់ អេស្ប៉ាញ អ៊ីតាលី ដាណឺម៉ាក ស៊ុយអែត បានកោះហៅឯកអគ្គរដ្ឋទូតរុស្ស៊ីមកជួបតវ៉ាកាលពីថ្ងៃចន្ទ ប៉ូឡូញ ស្លូវ៉ានីបានកោះហៅនៅថ្ងៃអង្គារនេះ។ នៅក្នុងសេចក្តីថ្លែងការណ៍បារាំងស្នើសុំឱ្យមានការបើកអង្កេតឯករាជ្យនិងស៊ីជម្រៅរកមូលហេតុនៃការស្លាប់របស់មេបក្សប្រឆាំងណាវ៉ាល់នី។
ប្រធានាធិបតីអាមេរិកចូបៃដិន ថានឹងដាក់ទណ្ឌកម្មលើរុស្ស៊ីបន្ថែមទៀត៕
ប្រធានាធិបតីអាមេរិកចូបៃដិន ថានឹងដាក់ទណ្ឌកម្មលើរុស្ស៊ីបន្ថែមទៀត៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
