នាយករដ្ឋមន្រ្តីថៃ បានទៅបំពេញការងារនៅព្រឹកថ្ងៃទី២១ ខែកុម្ភៈ ដោយបើករថយន្តអគ្គិសនីម៉ូដែល Fiat Abarth 500 ពណ៌បៃតងខ្ចី។ លោកបានបើកឡាននេះ ពីផ្ទះនៅតំបន់ Asok Sukhumvit ទៅកាន់វិមានរដ្ឋាភិបាល ដើម្បីធ្វើជាប្រធានកិច្ចប្រជុំស្តីពីគោលនយោបាយរថយន្តអគ្គិសនី។

 

«ចំណង់ចំណូលចិត្តរបស់ខ្ញុំគឺការបើកបរម្តងម្កាល។ ខ្ញុំតែងតែបើកឡានដោយខ្លួនឯងនៅពេលខ្ញុំជាអ្នកជំនួញ។ រថយន្តអគ្គិសនីនេះជារបស់កូនស្រីខ្ញុំ មានពណ៌ដ៏ស្រស់ស្អាត និងគួរឱ្យស្រលាញ់។ ខ្ញុំចូលចិត្តវាខ្លាំងណាស់» ។ នេះបើតាមសំណេរលោក សេដ្ឋា នៅលើបណ្តាញសង្គម X ។

 

តម្លៃទីផ្សាររបស់រថយន្តអគ្គិសនី Fiat Abarth 500 ប្រហែល ៦៦៥០០ដុល្លារ។ ម៉ូដែលរថយន្តនេះប្រើប្រាស់ម៉ូទ័រអេឡិចត្រិចដែលមានកម្លាំង ១៥៥សេះ។ នេះបើតាមសារព័ត៌មាន Bangkok Post ។ 

 

បន្ទាបពីកិច្ចប្រជុំបញ្ចប់ រដ្ឋាភិបាលថៃបានប្រកាសពីការអនុម័តវិធានការគាំទ្រផ្នែកហិរញ្ញវត្ថុដើម្បីលើកទឹកចិត្តដល់ក្រុមហ៊ុនដឹកជញ្ជូនផ្លាស់ប្តូរទៅប្រើប្រាស់រថយន្តអគ្គិសនី ក៏ដូចជាការឧបត្ថម្ភធនសម្រាប់ក្រុមហ៊ុនផលិតអាគុយរថយន្តអគ្គិសនី។

 

គោលនយោបាយនេះ ត្រូវបានរំពឹងថានឹងពង្រឹងជំហររបស់ថៃដែលជាមជ្ឈមណ្ឌលផលិតរថយន្តអគ្គិសនីនៅក្នុងតំបន់ ខណៈការកាត់បន្ថយការបំពុលពីវិស័យដឹកជញ្ជូន និងផលិតកម្ម បានជួយឱ្យអាជីវកម្មសម្រេចបាននូវគោលដៅកាត់បន្ថយការបំភាយឧស្ម័ន។

 

ថៃដាក់គោលដៅផ្លាស់ប្តូរ ៣០ភាគរយនៃរថយន្ត ២,៥លានគ្រឿងជារៀងរាល់ឆ្នាំទៅជារថយន្តអគ្គិសនីនៅឆ្នាំ ២០៣០ ។ បច្ចុប្បន្នប្រទេសនេះ ជាទីផ្សាររថយន្តអគ្គិសនីដ៏ធំបំផុតមួយនៅអាស៊ីអាគ្នេយ៍៕