លោក ស្មាន សើ បានអះអាងប្រាប់សារព័ត៌មានថ្មីៗបន្ថែមទៀតថា ការនេសាទសមុទ្រផ្តល់ចំណូលក្រាសក្រែលជាងការបើកទូកទេសចរណ៍មែន ប៉ុន្តែជារបរដែលហត់នឿយខ្លាំង និងមានភាពប្រថុយប្រថានជីវិតខ្លាំងដែរ។ ជាពិសេសនៅអំឡុងខែកក្កដា និងសីហា ដែល សម្បូរព្យុះភ្លៀង។ លោក ស្មាន សើ បញ្ជាក់ដូច្នេះ៖ «ខ្ញុំរកស៊ីនៅសមុទ្រ ឧបសគ្គវាច្រើន។ ទី១ ខ្យល់ព្យុះ។ ខ្យល់ព្យុះ វាពិបាកដែរ ប៉ុន្តែវាមិនព្យុះរាល់ថ្ងៃទេ។ បើខែ៧ ខែ៨ គឺព្យុះសឹងរាល់យប់។ ពេលព្យុះមក យើងអាចរកកម្មវិធីម៉េចដែលយើងទប់ជាមួយហ្នឹងបាន ព្រោះអ្នករកស៊ីសមុទ្រ ទាល់តែយើងច្បាស់ខាងខ្យល់ព្យុះហ្នឹង បានរកស៊ីបាន»។ 

 

បើតាមលោក ស្មាន សើ ដើម្បីបញ្ចៀសកុំឱ្យទូកលិចក្នុងពេលមានព្យុះ ឬភ្លៀងខ្លាំង អ្នក នេសាទ ត្រូវបោះយុថ្កាផង និងបញ្ឆេះម៉ាស៊ីនទូកផង ដើម្បីទប់កុំឱ្យទូកមានបញ្ហាពេលដែលមានរលកដែលបោកបក់ខ្លាំង។ ក្នុងករណីខ្លះ អ្នកនេសាទ អាចបើកទូកសំដៅកោះដែលនៅក្បែរទីតាំងនេសាទរបស់ខ្លួនដើម្បីធានាសុវត្ថិភាព។