RFI
អន្តរជាតិ
ចិនបរិហារការអនុម័តច្បាប់ហាមឃាត់TikTok របស់អាមេរិកថាជាវិធីសាស្ត្រពាល
នបរិហារការអនុម័តច្បាប់ហាមឃាត់TikTok នៅអាមេរិកថាជាវិធីសាស្ត្រពាល REUTERS
×![]()
ដោយ៖អៀង សុខម៉ិញ/RFI ខេមរភាសា
សភាអាមេរិកបានបោះឆ្នោតអនុម័តលើគម្រោងច្បាប់សំដៅហាមឃាត់ការប្រើប្រាស់បណ្តាញសង្គមចិនTikTok ក្រោមហេតុផលសន្តិសុខជាតិ ក្នុងសំឡេងភាគច្រើននៅថ្ងៃពុធទី១៣មីនា២០២៤ម្សិលមិញ។ ប៉ុន្តែប៉េកាំងយល់ថាជាហេតុផលមិនត្រឹមត្រូវ និងបានបរិហារការប្រើច្បាប់នេះថាជាវិធីសាស្ត្រពាល។
ចិនមិនអាចទប់កំហឹងបានទេ នៅពេលឃើញសភាអាមេរិកអនុម័តច្បាប់ដែលស្នើសុំឱ្យបណ្តាញសង្គមកាត់ផ្តាច់ទំនាក់ទំនងជាមួយចិន។ “ច្បាប់សំដៅហាមឃាត់Tik Tokនេះ ដើរបញ្ច្រាសនឹងគោលការណ៍ប្រកួតប្រជែងនិងវិធានអន្តរជាតិក្នុងផ្នែកសេដ្ឋកិច្ចនិងពាណិជ្ជកម្ម” នេះជាប្រតិកម្មរបស់អ្នកនាំពាក្យក្រសួងការបរទេសចិន។ ចំណែកក្រសួងពាណិជ្ជកម្មវិញព្រមានថា សហរដ្ឋអាមេរិកត្រូវតែបញ្ឈប់ការដាក់សម្ពាធសំដៅកៀសដោយអយុត្តិធម៌ ក្រុមហ៊ុនបរទេសចេញពីទីផ្សារ ពុំទោះទេចិននឹងចាត់វិធានការចាំបាច់វិញដើម្បីការពារក្រុមហ៊ុនចិន។ តែគ្មានការលម្អិតថាតើជាចំណាត់ការបែបណាឡើយ។ មុនប្រតិកម្មផ្លូវការចិន អគ្គនាយកក្រុមហ៊ុនTik Tok លោក Shou Zi Chew បានអំពានាវឱ្យអ្នកប្រើប្រាស់បណ្តាញទាំងអស់បញ្ចេញសំឡេងប្រឆាំងនឹងគម្រោងច្បាប់ ដែលលោកយល់ថានឹងធ្វើឱ្យបាត់បង់ការងារប្រមាណ៣០ម៉ឺន ព្រមទាំងធ្វើឱ្យក្រុមហ៊ុនខ្នាតតូចរំពឹងលើTik Tok ខាតបង់ប្រាក់ចំណូលរាប់ពាន់លានដុល្លារ។
អាជ្ញាធរអាមេរិកសំឡឹងសំឡក់TikTok តាំងពីជាច្រើនខែមកហើយ ព្រោះយល់ថាបណ្តាញសង្គមប្រើវីដេអូខ្លីៗមួយនេះអាចជាឈ្នាន់សម្រាប់រដ្ឋាភិបាលចិនធ្វើចារកិច្ចនិងបង្វិលក្បាលពលរដ្ឋអាមេរិក។ សភាអ្នកតំណាងបានកោះហៅម្ចាស់ក្រុមហ៊ុនTik Tok ឱ្យចូលមកបំភ្លឺនៅចំពោះមុខគណៈកម្មការអំពីឥទ្ធិពលនៃកម្មវិធីចំពោះសុខភាពខួរក្បាលរបស់អ្នកប្រើប្រាស់ដែលមានចំនួនដល់ទៅ១៧០លាននាក់ ឬចំពោះការប្រើប្រាស់ទិន្នន័យបុគ្គល និងស្តីពីហានិភ័យចំពោះសន្តិសុខជាតិ។ គម្រោងច្បាប់បានចែងតម្រូវឱ្យ ByteDance ឈ្មោះក្រុមហ៊ុនដើមរបស់ Tik Tok ត្រូវតែលក់ភាគហ៊ុនមកសហគ្រាសអាមេរិក ក្នុងរយៈពេល១៨០ថ្ងៃយ៉ាងយូរ ពោលគឺផ្តាច់ចំណងជាមួយអាជ្ញាធរចិន បើមិនដូច្នេះទេTik Tok ត្រូវបណ្តេញចេញពីក្រុមហ៊ុនApple និងGoogleអាមេរិក។
សម្រាប់សភាអាមេរិក ច្បាប់មិនមែនជាការហាមឃាត់ទេ តែជាការផ្តល់ដំណោះស្រាយត្រឹមត្រូវ ដើម្បីសន្តិសុខជាតិនិងដើម្បីការពារទិន្នន័យរបស់អ្នកប្រើប្រាស់មិនឱ្យធ្លាក់ដល់ដៃបក្សកុម្មុយនិស្តចិន។ ច្បាប់បានឆ្លងកាត់សភាដោយជោគជ័យ នៅរសៀលថ្ងៃ ពុធទី១៣មីនា ដោយសមាជិកសភាអ្នកតំណាងអាមេរិកបានបោះឆ្នោតគាំទ្រក្នុងសំឡេងដ៏ច្រើនលើសលុបដែលកម្រកើតមានណាស់នៅក្នុងសភាខុនហ្ក្រេសអាមេរិក។ គឺ ដល់ទៅ៣៥២សំឡេងគាំទ្រទល់នឹង៦៥ប្រឆាំង។ ប៉ុន្តែបន្ទាប់ពីសភា គម្រោងច្បាប់នឹងត្រូវឡើង ព្រឹទ្ធសភាដែលមិនប្រាកដព្រមអនុម័តទេ ព្រោះឥស្សរជនគ្រាក់ៗប្រឆាំងនឹងការប្រើវិធានការក្តៅខ្លាំងលើកម្មវិធីដ៏ពេញនិយម។ លោកប្រធានាធិបតីអាមេរិក ចូ បៃដិន ដែលទើបបើកគណនី កាលពីខែកុម្ភៈ ដើម្បីទាក់ទាញយុវវ័យ បានប្រកាសចុះហត្ថលេខាផ្តល់សុពលភាពដល់ច្បាប់ភ្លាម បើច្បាប់ឆ្លងព្រឹទ្ធសភារួចនិងឡើងមកតុប្រធានាធិបតី៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
