ការបោះឆ្នោតប្រធានាធិបតីរុស្ស៊ីចាប់ពីថ្ងៃទី ១៥-១៧ ខែមីនា ឆ្នាំ២០២៤ ប្រព្រឹត្តិទៅដោយគ្មានសំឡេងប្រឆាំង។ ក្រុមអ្នកសង្កេតការណ៍បាននិយាយថា លោក វ៉្លាឌីមៀ ពូទីន ប្រាកដជាជាប់ឆ្នោតក្លាយប្រធានាធិបតីបន្តទៀតដែលកាន់អំណាចរហូតដល់ឆ្នាំ២០៣០។

 

នៅថ្ងៃដំបូងនៃការចាប់ផ្តើមការបោះឆ្នោត ទីភ្នាក់ងារព័ត៌មាន Tass របស់រុស្ស៊ី បានចុះផ្សាយថា លោកប្រធានាធិបតី ពូទីន បានបោះឆ្នោតតាមប្រព័ន្ធអេឡិចត្រូនិច។ នេះជាការបោះឆ្នោតតាមប្រព័ន្ធអនឡាញលើកដំបូងក្នុងការបោះឆ្នោតប្រធានាធិបតី។ 

 

«តាមខ្សែវីដេអូបង្ហាញថា លោកពូទីនបានដើរទៅកាន់កុំព្យូទ័រក្នុងការិយាល័យរបស់លោក និងបោះឆ្នោត ហើយបានញញឹមទៅកាន់កាម៉េរ៉ា»។ ទីភ្នាក់ងារព័ត៌មាន Tass បានចុះផ្សាយបែបនេះ ដោយបន្ថែមថា​ កុំព្យូទ័ររបស់លោក ក៏បានបង្ហាញពីសារជូនដំណឹងពីការបោះឆ្នោតទទួលបានជោគជ័យផងដែរ។ 

 

ក្នុងការបោះឆ្នោតលើកនេះ ទន្ទឹមនឹងលោកពូទីន បុគ្គល ៣រូបទៀតក៏បានឈរឈ្មោះជាបេក្ខជនប្រធានាធិបតីផងដែរ។ ក្នុងនោះមាន មេដឹកនាំបក្សប្រជាធិបតេយ្យសេរីរុស្ស៊ី លោក Leonid Slutsky, សមាជិកសភា Vladislav Davankov និងសមាជិកសភាមួយរូបទៀតគឺលោក Nikolay Kharitonov៕