សាកលវិទ្យាល័យចំនួន៦ នៅក្រៅរដ្ឋធានីសេអ៊ូលបានស្នើឱ្យកាត់បន្ថយកូតាចុះឈ្មោះចូលរៀនផ្នែកពេទ្យចំនួន ៥០ភាគរយនៅឆ្នាំក្រោយ ដោយព្រួយបារម្ភអំពីការមិនធានាគុណភាពនៃការបណ្តុះបណ្តាល។ សំណើនេះត្រូវបានរដ្ឋាភិបាលកូរ៉េខាងត្បូងទទួលយក។
សាកលវិទ្យាល័យទាំងនេះរួមមានសកលវិទ្យាល័យជាតិ Gangwon, Kyungpook, Kyungsang, Chungnam, Chungbuk និង Jeju ។ សំណើនេះត្រូវបានធ្វើឡើងក្នុងបរិបទជម្លោះរវាងរដ្ឋាភិបាល និងវេជ្ជកម្មសិក្សា មិនទាន់ត្រូវបានដោះស្រាយ។
តាមការចុះផ្សាយរបស់ព័ត៌មាន The Korea Times នៅថ្ងៃទី១៩ ខែមេសា សំណើនេះត្រូវបាននាយករដ្ឋមន្ត្រី Han Duck-soo ទទួលយក។
លោក Han Duck -soo បានប្រកាសថា ៖« រដ្ឋាភិបាលបានសម្រេចទទួលយកសំណើរបស់នាយកសាកលវិទ្យាល័យជាតិ ដើម្បីការពារសិទ្ធិជូននិស្សិតពេទ្យ និងធ្វើឱ្យមានការអប់រំធម្មតាក្នុងមហាវិទ្យាល័យពេទ្យនិងផ្តល់ជំហរសម្រាប់ដោះស្រាយជម្លោះជាមួយសហគមន៍វេជ្ជសាស្ត្រ» ។
នាយករដ្ឋមន្រ្តីកូរ៉េខាងត្បូងរូបនេះបន្ថែមថា ក្រៅពីសាកលវិទ្យាល័យទាំង៦ មហាវិទ្យាល័យផ្សេងទៀតដែលត្រូវបានបែងចែកចំនួនសិស្សចុះឈ្មោះចូលរៀននៅសាលាពេទ្យថ្មីសម្រាប់ឆ្នាំសិក្សា ២០២៥ ក៏នឹងត្រូវបានអនុញ្ញាតឱ្យកាត់បន្ថយការចូលរៀនរហូតដល់ពាក់កណ្តាលដែរ។
ចំនួននៃការចុះឈ្មោះសិស្សពេទ្យនៅឆ្នាំក្រោយ អាចធ្លាក់ចុះមកត្រឹម ១០០០នាក់ ពោលគឺពាក់កណ្តាលនៃផែនការដែលគ្រោងជ្រើសចំនួន ២០០០នាក់។
កន្លងមក កាលពីថ្ងៃទី១៨ ខែមីនា រដ្ឋមន្ត្រីក្រសួងសុខាភិបាលលោក Cho Kyoo-hong បានបញ្ជាក់សារជាថ្មីអំពីការប្តេជ្ញាចិត្តរបស់លោកចំពោះកំណែទម្រង់វិស័យសុខាភិបាលឥតឈប់ឈរ។ លោកថា នេះជាវិធានការចាំបាច់មួយដើម្បីការពារអាយុជីវិត និងសុខភាពរបស់ប្រជាពលរដ្ឋ ពង្រឹងសេវាវេជ្ជសាស្រ្តសំខាន់ៗ និងត្រៀមលក្ខណៈសម្រាប់អនាគតនៃប្រជាជនវ័យចំណាស់នាពេលអនាគត។
បន្ថែមពីលើការបង្កើនចំនួនចុះឈ្មោះចូលរៀន កូរ៉េខាងត្បូងក៏មានគម្រោងបង្កើនចំនួនជំនួយការគ្រូពេទ្យដើម្បីបំពេញសម្រាប់ការខ្វះខាត។ ជំនួយការគ្រូពេទ្យ ជាគិលានុបដ្ឋាយិកាដែលមានជំនាញខ្ពស់អាចជួយវេជ្ជបណ្ឌិតបានច្រើន ហើយក៏អាចចូលរួមក្នុងការបង្កើតផែនការព្យាបាល និងចេញវេជ្ជបញ្ជា។
គួរបញ្ជាក់ថា ចាប់ពីថ្ងៃទី២០ ខែកុម្ភៈ វេជ្ជបណ្ឌិតកម្មសិក្សាក្នុងស្រុកជាង ៩ពាន់នាក់ដែលជាកម្លាំងស្នូលដែលថែទាំសុខភាព និងព្យាបាលអ្នកជំងឺធ្ងន់ធ្ងររបស់កូរ៉េខាងត្បូង បានចាកចេញពីមន្ទីរពេទ្យដើម្បីតវ៉ាចំពោះគោលនយោបាយបង្កើនកូតាចុះឈ្មោះចូលរៀននៅសាលាពេទ្យ។ ការណ៍នេះធ្វើឲ្យកូរ៉េខាងត្បូងស្ថិតនៅលើជ្រោះនៃវិបត្តិសុខភាពដ៏ធំ។ វិបត្តិនេះបានរីករាលដាលដល់វិស័យបណ្តុះបណ្តាល ដោយសារតែនិស្សិតពេទ្យ និងគ្រូបង្រៀនសាលាពេទ្យជាច្រើនបានលាឈប់ពីការងារដើម្បីគាំទ្រការតវ៉ា។ ទន្ទឹមនោះ រដ្ឋាភិបាលបានចាប់ផ្តើមដកហូតអាជ្ញាប័ណ្ណអនុវត្តគ្រូពេទ្យជិត ៥០០០ នាក់ ខណៈពេលដែលកំពុងពិចារណាដាក់ទោសព្រហ្មទណ្ឌផង។
គ្រូពេទ្យកម្មសិក្សា បានតវ៉ាចំពោះកម្មវិធីកំណែទម្រង់ការបណ្តុះបណ្តាលវេជ្ជសាស្រ្តដែលបានស្នើឡើងរបស់រដ្ឋាភិបាល ដោយបង្កើនគោលដៅចុះឈ្មោះចូលរៀននៅសាលាពេទ្យចំនួន ២០០០ នាក់ ចាប់ពីឆ្នាំ ២០២៥។ ក្រុមបាតុករទាំងនោះនិយាយថា ផែនការបង្កើនចំនួនសិស្សសាលាពេទ្យនឹងប៉ះពាល់ដល់គុណភាពនៃសេវាវេជ្ជសាស្រ្ត ធ្វើឱ្យថ្លៃព្យាបាលអ្នកជំងឺកើនឡើង។ ជំនួសឱ្យការបង្កើនកូតាចុះឈ្មោះចូលរៀន រដ្ឋាភិបាលគួរតែដោះស្រាយប្រាក់ចំណូល និងលក្ខខណ្ឌការងាររបស់បុគ្គលិកពេទ្យបច្ចុប្បន្ន។
ចំណែករដ្ឋាភិបាលកូរ៉េខាងត្បូងវិញយល់ថា ការបង្កើនគោលដៅគឺចាំបាច់ដើម្បីទប់ទល់នឹងចំនួនប្រជាជនវ័យចំណាស់ និងពង្រឹងកម្លាំងវេជ្ជសាស្ត្រសម្រាប់វិស័យសំខាន់ៗដូចជា ពេទ្យកុមារ សង្គ្រោះបន្ទាន់ និងការវះកាត់។
នៅឆ្នាំ ២០៣៥ ប្រហែល ៣០ភាគរយនៃប្រជាជនកូរ៉េខាងត្បូងនឹងមានអាយុលើសពី ៦៥ឆ្នាំ។ យោងតាមស្ថិតិពីក្រុមហ៊ុនធានារ៉ាប់រងសុខភាពជាតិកូរ៉េខាងត្បូង តម្រូវការសម្រាកព្យាបាលនៅមន្ទីរពេទ្យរបស់មនុស្សចាស់នឹងកើនឡើងដល់១១ដងបើធៀបមនុស្សអាយុ ៣០ឆ្នាំដល់ ៤០ឆ្នាំ។ ជាមួយអត្រា ២០ភាគរយនៃចំនួនគ្រូពេទ្យសរុបអាយុលើសពី៧០ឆ្នាំ កូរ៉ខាងត្បូងពិតជាពិបាកក្នុងការបញ្ចៀសស្ថានភាពខ្វះខាតកម្លាំងពេទ្យយ៉ាងធ្ងន់ធ្ងរ។ ទីភ្នាក់ងារស្រាវជ្រាវនេះព្យាករថា ប្រទេសនេះនឹងខ្វះខាតគ្រូពេទ្យយ៉ាងហោចណាស់ ១ម៉ឺននាក់នៅឆ្នាំ ២០៣៥៕