ជាតិ
របាយការណ៍ជុំវិញការផ្ទុះឃ្លាំងគ្រាប់ ៖ យោធិន២០នាក់ពលី, ផ្ទះពលរដ្ឋ, ឃ្លាំងអាវុធ, អាវុធជាច្រើនខូចខាត
× នាយទាហាន ២០នាក់ បានពលីក្នុងហេតុការណ៍ ផ្ទុះឃ្លាំងគ្រាប់បច្ចេកទេសយោធភូមិភាគទី៣ ស្ថិតក្នុងក្រុងច្បារមន ខេត្តកំពង់ស្ពឺ ដែលកើតឡើងនៅម៉ោង២ និង២៥នាទីរសៀល ថ្ងៃទី២៧ ខែមេសានេះ។ នេះបើតាមរបាយការណ៍បឋម របស់មេបញ្ជាការរងកងទ័ពជើងគោក មេបញ្ជាការយោធភូមិ ភាគទី៣ ឧត្តមសេនីយ៍ឯក យឿង សុខុន។ របាយការណ៍បឋមនេះ បញ្ជាក់ថា៖«មនុស្សចំនួន២០នាក់(អាចស្លាប់ទាំងអស់) ក្នុងនោះមាននាយទាហានខេត្តកោះកុងចំនួន១៥នាក់ និងនាយទាហានទីបញ្ជាការយោធភូមិភាគ ចំនួន៥នាក់»។
យ៉ាងណាបាយការណ៍បឋមនេះ ពុំបានបញ្ជាក់ពីចំនួនមនុស្សដែលរងរបួសនោះទេ។ ជុំវិញឧបទ្ទវហេតុនេះ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានចូលរួមរំលែកមរណទុក្ខ ចំពោះក្រុមគ្រួសារយោធិនពលី និងសម្ដែងសមានទុក្ខ សោកស្ដាយចំពោះអ្នករងរបួស។ ក្រៅពីបញ្ជាក់ថារាជរដ្ឋាភិបាល នឹងរ៉ាប់រងចំណាយរៀបចំពិធីបុណ្យ សម្តេចនាយករដ្ឋមន្ត្រី ក៏ផ្តល់ការឧបត្ថម្ភថវិកាចំនួន២ម៉ឺនដុល្លារក្នុងមួយសព ជូនគ្រួសារយោធិនដែលពលី។
នៅក្នុងរបាយការណ៍បឋមរបស់មេបញ្ជាការយោធភូមិ ភាគទី៣ មាន រថយន្ត១គ្រឿង រួមទាំងអាវុធនៅលើរថយន្ត បានផ្ទុះខ្ទេចអស់ ខណៈរថយន្តមួយគ្រឿងទៀត ខូចធ្ងន់ធ្ងរផ្នែកខាងក្រៅ។ រថយន្តទាំងនេះ ជារថយន្ត២ ក្នុងចំណោមរថយន្ត ៥គ្រឿងដែលដឹកនាំអាវុធ-គ្រាប់មកពីខេត្តកោះកុង។
បើតាមរបាយការណ៍បឋមរបស់ ឧត្តមសេនីយ៍ឯក យឿង សុខុន ដែលឱ្យដឹងទៀតថា មិនទាន់មានការបូកសរុបអាវុធគ្រាប់នៅក្នុងឃ្លាំងបច្ចេកទេសទីបញ្ជាការយោធភូមិភាគដែលខូចខាតនៅឡើយ។
ក្រៅពីខូចខាត់អាវុធគ្រាប់ អគារ៤ខ្នង នៅទីបញ្ជាការយោធភូមិភាគខូចខាតទាំងស្រុង ក្នុងនោះមានអគារឃ្លាំងអាវុធគ្រាប់៣ខ្នង និងអគារស្នាក់នៅ១ ខ្នង។ ចំណែកអគារការិយាល័យក្នុងទីបញ្ជាការយោធភូមិភាគ ខូចខាតផ្នែកខាងក្រៅរួមមានទ្ធា បង្អួច និងដំបូល។
ហេតុការណ៍ផ្ទុះឃ្លាំងអាវុធគ្រាប់នេះ ក៏បានធ្វើឱ្យផ្ទះប្រជាពលរដ្ឋចំនួន ២៥ខ្នងនៅក្បែរទីបញ្ជាការយោធភូមិភាគនោះខូចខាតដែរ៕
© រក្សាសិទ្ធិដោយ thmeythmey.com