នៅក្នុងការបោះឆ្នោតប្រធានាធិបតីក្នុងខែមីនា លោក វ្ល៉ាឌីមៀ ពូទីន បេក្ខជនប្រធានាធិបតីឯករាជ្យនៅពេលនោះ ទទួលបានសន្លឹកឆ្នោតគាំទ្ររហូតដល់៨៧,៣២ភាគរយឯណោះ។ 

 

ក្រោយការបោះឆ្នោតដែលគ្មានសំឡេងប្រឆាំងដ៏សំខាន់ លោកពូទីន នៅថ្ងៃទី៧ ខែឧសភា បានស្បថចូលកាន់តំណែងជាប្រធានាធិបតីនៅអាណត្តិទី៥ ជាផ្លូវការ នាវិមានក្រេមឡាំង នៅចំពោះមុខអ្នកចូលរួមជាច្រើននាក់។ ប្រធានាធិបតីរុស្ស៊ីមាន១អាណត្តិចំនួន ៦ឆ្នាំ ដើម្បីដឹកនាំរុស្ស៊ី។ 

 

លោកពូទីន បានចាប់ផ្តើមកាន់តំណែងជាប្រធានាធិបតីនៅក្នុងឆ្នាំ១៩៩៩ ហើយបានកាន់តំណែងជានាយករដ្ឋមន្រ្តីនៅចន្លោះឆ្នាំ២០០៨ ដល់ឆ្នាំ២០១២ មុននឹងកាន់តំណែងជាប្រធានាធិបតីជាថ្មីរហូតដល់ពេលបច្ចុប្បន្ន។ 

 

យ៉ាងណាមិញ បណ្តាប្រទេសលោកខាងលិចដូចជា អាម៉េរិក កាណាដា អង់គ្លេស សមាជិកសហភាពអឺរ៉ុបមួយចំនួន មិនបានបញ្ជូនប្រេសិតរបស់ខ្លួនឱ្យចូលរួមឡើយ។ 

 

«យើងនឹងមិនបញ្ជូនប្រេសិតទៅចូលរួមពិធីស្បថចូលកាន់តំណែងទេ»។ លោក Matthew Miller អ្នកនាំពាក្យក្រសួងការបរទេសអាម៉េរិក បានបញ្ជាក់បែបនេះ ទៅកាន់អ្នកសារព័ត៌មាន ដោយបន្តចាត់ទុកការបោះឆ្នោតរុស្ស៊ីគ្មានលក្ខណៈសេរី និងត្រឹមត្រូវ។ 

 

ក្នុងអាណត្តិទី៥នេះ លោកពូទីន នៅតែបន្តជាប់ដៃធ្វើសង្រ្គាមជាមួយអ៊ុយក្រែន ខណៈទណ្ឌកម្ម បន្តហ៊ុមសេដ្ឋកិច្ចប្រទេសមួយនេះ។ យ៉ាងណាក៏ដោយ លោកពូទីន បានបន្លុយបើកច្រកសម្រាប់ចរចាជាមួយប្រទេសលោកខាងលិច ក្នុងកម្មវិធីស្បថចូលកាន់តំណែង។ បើតាមលោកពូទីន រុស្ស៊ីបើកចំហការអភិវឌ្ឍទំនាក់ទំនងជាមួយប្រទេសលោកខាងលិច ក្នុងលក្ខខណ្ឌស្មើភាព៕