ជាតិ
×![]()
ដោយ: ម៉ៅ សុផា
ភ្នំពេញ៖ ឯកឧត្តម កឹម សុខា ប្រធានគណបក្សសង្គ្រោះជាតិ បានលើកឡើងថា ការប្រើសារបែបគំរាមកំហែង ពីសំណាក់អ្នកនយោបាយ ស្មើនឹងការហែកសន្លឹកឆ្នោតចោល។ប្រធានគណបក្សប្រឆាំងធំជាងគេនៅកម្ពុជារូបនេះ បន្ថែមទៀតថា ការការពេញចិត្ត ឬមិនពេញចិត្ត ចំពោះការគំរាមកំហែងរបស់អ្នកនយោបាយ នឹងបង្ហាញនៅថ្ងៃបោះឆ្នោត។
ទោះជាមិននិយាយចំៗក្តី តែឯកឧត្តម កឹម សុខា ហាក់ចង់បញ្ជាក់ន័យថា អ្នកនយោបាយដែលចូលចិត្តប្រើសារគំរាមកំហែង នឹងមិនទទួលបានការគាំទ្រពីប្រជាពលរដ្ឋឡើយ។ ឯកឧត្តម កឹម សុខា បានចាត់ទុក ការគំរាមកំហែងរបស់អ្នកនយោបាយ ថាស្មើនឹងការហែកសន្លឹកឆ្នោតចោល។
មេបក្សសង្គ្រោះជាតិរូបនេះ និយាយដូច្នេះថា៖ «ខ្ញុំ យល់ថាប្រជាពលរដ្ឋ ជាអ្នកកាត់ទោស នៅថ្ងៃបោះឆ្នោតហ្នឹងហើយ។ សារណា សម្តីណាល្អ មិនល្អ អ្នកដឹកនាំណា និយាយគំរាម មិនគំរាម សូមឲ្យជនរួមជាតិខ្មែរ ដែលជាម្ចាស់ឆ្នោត ធ្វើការកាត់ក្តីតាមរយៈសន្លឹកឆ្នោត នៅថ្ងៃទី៤ ខែមិថុនា ឆ្នាំ២0១។ បញ្ហាហ្នឹង ខ្ញុំទុកឲ្យប្រជាពលរដ្ឋជាអ្នកកាត់ក្តីចុះ។ ប្រសិនបើគេ ធ្វើកាន់តែខុស ដូចគេហែកសន្លឹកឆ្នោតខ្លួនឯង ចោលអ៊ីចឹង»។
ការលើកឡើងដូច្នេះ គឺតបនឹងអ្នកសារព័ត៌មានដែលសួរថា «តើឯកឧត្តម យល់ឃើញយ៉ាងណា ចំពោះសារគំរាមកំហែងផ្សេងៗ របស់ប្រមុខរដ្ឋាភិបាល ក៏ដូចជាមន្ត្រីជាន់ខ្ពស់នៃកងយុទ្ធពលខេមរភូមិន្ទ?» អ្នកសារព័ត៌មាន បានស្កាត់សួរ ក្រោយឯកឧត្តម កឹម សុខា បញ្ចប់ការថ្លែងសារពីគោលនយោបាយរបស់គណបក្សសង្គ្រោះជាតិ ទៅកាន់អ្នកគាំទ្រ និងសកម្មជន នៅក្នុងយុទ្ធនាការនៃការឃោសនារកសំឡេងឆ្នោត នៅខេត្តពោធិ៍សាត់ នាថ្ងៃទី២៣ ខែឧសភា ឆ្នាំ២0១៧នេះ៕
Tag:
កឹម សុខា
ហុន សែន
បោះឆ្នោតឃុំ-សង្កាត់
គំរាម
© រក្សាសិទ្ធិដោយ thmeythmey.com
