អន្តរជាតិ
Amnesty៖ មីយ៉ាន់ម៉ាអនុវត្តគោលនយោបាយរើសអើងអាប៉ាថេតប្រឆាំងជនជាតិរ៉ូហ៊ីងយ៉ា
× អង្គការ Amnesty International បានចោទប្រកាន់ថា មីយ៉ាន់ម៉ាបានបង្កើតនិងអនុវត្តនយោបាយ រើសអើងពូជសាសន៍អាប៉ាថេត (Apartheid) នៅក្នុងរដ្ឋ Rakhine ប្រឆាំងនឹងប្រជាជនរ៉ូហ៊ីងយ៉ា។ នេះបើតាមរបាយការណ៍ស្រាវជ្រាវរបស់អង្គការអន្តរជាតិនេះដែលត្រូវបានចងក្រងឡើងអស់ ២ ឆ្នាំកន្លងមកនោះ។
វិបត្តិមនុស្សជាតិនៅរដ្ឋ Rakhine នៅតែបន្តទៅមុខដោយគ្មានដំណោះស្រាយពេញលេញ។ សហគមន៍អន្តរជាតិនៅតែទទូចឲ្យរដ្ឋាភិបាលមីយ៉ាន់ម៉ាប្រញាប់ដោះស្រាយបញ្ហា និងបញ្ឈប់រាល់សកម្មភាពណាដែលប៉ះពាល់ដល់សិទ្ធិ និងសុវត្ថិភាពប្រជាជនផងដែរ។ មកដល់បច្ចុប្បន្នវិបត្តិនេះបានធ្វើឲ្យមនុស្សជាង៦សែននាក់រត់ភៀសខ្លួនទៅជ្រកកោននៅបង់ក្លាដែសផងដែរ។
ពាក់ព័ន្ធស្ថានភាពនេះ អង្គការ Amnesty បានចេញរបាយការណ៍ស្រាវជ្រាវដែលមានកម្រាស់ ១០០ ទំព័រនៅដើមសប្តាហ៍នេះពាក់ព័ន្ធការធ្វើទុក្ខបុកម្នេញកាប់សម្លាប់ជនជាតិភាគតិចដែលវាជាដើមហេតុនៃបញ្ហាបច្ចុប្បន្នផង។ របាយការណ៍ដែលត្រូវបានរៀបចំឡើងអស់ពេលពីរឆ្នាំនេះបានបង្ហាញថា របៀបរបបគ្រប់គ្រងនិងធ្វើទុក្ខបុកម្នេញលើប្រជាជនជាជនជាតិភាគតិចម៉ូស្លីម វាមានទំហំស្មើនឹងបទឧក្រិដ្ឋប្រឆាំងមនុស្សជាតិនៃប្រព័ន្ធរើសអើងពូជសាសន៍ អាប៉ាថេត។
ប្រធានជាន់ខ្ពស់ផ្នែកស្រាវជ្រាវលោកស្រី Anna Neistat បានលើកឡើងដូច្នេះថា៖« បញ្ហានៅរដ្ឋ Rakhine ជាបញ្ហាឧក្រិដ្ឋ។ វាជាករណីដែលកើតឡើងតាំងយូរមកហើយមុនពេលមានយុទ្ធនាការយោធាដែលប្រើហិង្សាកាលពីបីខែមុនទៅទៀត។ អាជ្ញាធរមីយ៉ាន់ម៉ាបន្តរក្សាទុកស្ត្រី បុរស និងក្មេងជនជាតិរ៉ូហ៊ីងយ៉ាដាច់ពីគេឯងក្នុងប្រព័ន្ធអាប៉ាថេតដ៏ឃោរឃៅ»។
តាមពិតទៅចលនាប្រឆាំង និងស្អប់ខ្ពើមប្រជាជនភាគតិចរ៉ូហ៊ីងយ៉ាកើតមានឡើងតាំងពីយូរមកហើយពោលគឺចាប់ពីមានការអនុម័តច្បាប់សញ្ជាតិប្រឆាំងជនជាតិភាគតិចម៉ូស្លីមឆ្នាំ ១៩៨២ ដែលច្បាប់នេះមិនទទួលស្គាល់ប្រជាជនរ៉ូហ៊ីងយ៉ា។ ច្បាប់នេះត្រូវបានអនុម័តឡើងដោយរដ្ឋាភិបាលយោធា ហើយចាប់ពីពេលនោះមកច្បាប់នេះត្រូវបានគេប្រើប្រាស់ជាបន្តបន្ទាប់ដើម្បីបោសសម្អាតជនជាតិរ៉ូហ៊ីងយ៉ា និង បដិសេធសិទ្ធិរស់នៅស្របច្បាប់របស់ប្រជាជនទាំងនេះផង៕
Tag:
មីយ៉ាន់ម៉ា
Amnesty International
Rakhine
© រក្សាសិទ្ធិដោយ thmeythmey.com