ជាតិ
សេដ្ឋកិច្ច
របាយការណ៍ព័ត៌មាន៖ ពលរដ្ឋកោះកុង ព្រួយបារម្ភអំពីតម្លៃដីឡើងថ្លៃ ដោយសារផ្លូវយន្តហោះដែលចិនសាងសង់
រូបឯកសារ៖ បដាបង្ហាញគម្រោងសាងសង់អាកាសយានដ្ឋាននៅតំបន់អភិវឌ្ឍរបស់ក្រុមហ៊ុនចិន Union Development Group ក្នុងឧទ្យានជាតិបុទុមសាគរ ខេត្តកោះកុងកាលពីថ្ងៃទី៦ ខែឧសភា ឆ្នាំ២០១៨។ (Reuters)
×![]()
ដោយ: VOA
វ៉ាស៊ីនតោន ៖ ប្រជាពលរដ្ឋនៅក្នុងខេត្តកោះកុង សម្ដែងក្ដីព្រួយបារម្ភចំពោះឥទ្ធិពលសាយភាយកាន់តែច្រើនឡើងរបស់ចិននៅក្នុងខេត្តរបស់ពួកគេ ដោយសារតែការសាងសង់ផ្លូវយន្តហោះថ្មីមួយនៅក្នុងខេត្តជាប់មាត់សមុទ្ររបស់កម្ពុជាមួយនេះ។ នេះបើផ្អែកតាមសេចក្ដីរាយការណ៍ព័ត៌មានរបស់កាសែតជប៉ុន Nikkei Asian Review ដែលបានចេញផ្សាយកាលពីថ្ងៃច័ន្ទ ទី១១ខែវិច្ឆិកា។
ផ្លូវយន្តហោះដែលមានប្រវែង៣២០០ម៉ែត្រក្នុងអាកាសយានដ្ឋានអន្តរជាតិតារាសាគរ ដែលចិន កំពុងសាងសង់ គឺវែងល្មមអនុញ្ញាតឱ្យយន្តហោះខ្នាតធំដូចជា Airbus A380 អាចចុះចតនិងហោះឡើងបាន។ ផ្លូវយន្តហោះថ្មីនេះ វែងជាងផ្លូវយន្តហោះនៅឯអាកាសយានដ្ឋានអន្តរជាតិភ្នំពេញទៅទៀត។
កសិករវ័យ៣៩ឆ្នាំម្នាក់នៅក្នុងខេត្តកោះកុង បានប្រាប់កាសែតជប៉ុន Nikkei Asian Review ថា តម្លៃដីនៅទីនោះ បានឡើង១០ដង ច្រើនជាងពីរបីឆ្នាំមុន។
កោះកុងជាខេត្តជាប់មាត់សមុទ្រមួយទៀតរបស់កម្ពុជា ដែលចិនបានបោះទុនវិនិយោគ ក្នុងទ្រង់ទ្រាយធំ ក្រោយពីពលរដ្ឋចិនបានចូលកាន់កាប់ជំនួញកាស៊ីណូ សណ្ឋាគារ និងភោជនីយដ្ឋានស្ទើរតែទាំងស្រុងក្នុងក្រុងព្រះសីហនុនៃខេត្តព្រះសីហនុ ដែលនៅជាប់គ្នានោះ។ នេះ បើយោងតាមកាសែតជប៉ុនដដែល។
សហរដ្ឋអាមេរិក បានសម្ដែងក្តីព្រួយបារម្ភយ៉ាងខ្លាំងអំពីលទ្ធភាព ដែលចិនអាចនឹងប្រើប្រាស់ផ្លូវយន្តហោះថ្មីនោះ សម្រាប់គោលដៅយោធា ប៉ុន្តែកម្ពុជា បានបដិសេធម្តងហើយម្តងទៀតថា មិនមានរឿងបែបនេះកើតឡើងទេ។
តែទោះជាយ៉ាងនេះក្តី ពលរដ្ឋម្នាក់ទៀតនៅក្នុងខេត្តកោះកុង បានថ្លែងប្រាប់កាសែតជប៉ុនថា៖ «វាគ្មានប្រយោជន៍ក្នុងការនិយាយអំពីអនាគតនោះទេ។ មនុស្សជាច្រើនគិតថាបើពួកគេអាចក្លាយជាអ្នកមានបាន នោះអ្វីៗ ក៏អាចទៅរួចដែរ»៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
