អន្តរជាតិ
វិបត្តិបូលីវី៖ មេបក្សប្រឆាំងប្រកាសធ្វើប្រធានាធិបតីស្តីទីក្រោយលោក Morales រត់ទៅម៉ិកស៊ិក
លោកប្រធានាធិបតី Evo Morales (ឆ្វេង) និងលោកស្រី Jeanine Azez មេដឹកនាំបក្សប្រឆាំង (AFP)
×![]()
មេដឹកនាំបក្សប្រឆាំងបូលីវី លោកស្រី Jeanine Azez នៅថ្ងៃអង្គារ ១២ វិច្ឆិកា បានប្រកាសខ្លួនឯងធ្វើជាប្រធានាធិបតីស្តីទីរបស់ប្រទេសអាមេរិកឡាទីនមួយនេះ ក្រោយពីលោកប្រធានាធិបតី Evo Morales បានសុំលាលែងតំណែង។ ដោយបារម្ភពីសុវត្ថិភាពផ្ទាល់ខ្លួន អតីតមេដឹកនាំដែលកាន់អំណាចតាំងពីឆ្នាំ២០០៦មកនេះ បានរត់ភៀសខ្លួនទៅដល់ប្រទេសម៉ិកស៊ិក ក្រោយទទួលបានសិទ្ធិជ្រកកោននយោបាយនៅទីនោះ។ 
លោកស្រី Jeanine Anez ដែលជាអនុប្រធានព្រឹទ្ធសភា បានប្រកាសចូលគ្រប់គ្រងព្រឹទ្ធសភាបណ្តោះអាសន្ន ។ សម្រាប់តួនាទីនេះ វាអាចឲ្យលោកស្រីក្លាយជាប្រធានាធិបតី ។ យ៉ាងណាមិញ តំណាងរាស្ត្រមកពីបក្សរបស់លោក Morales បានធ្វើពហិកាអង្គប្រជុំព្រឹទ្ធសភា កាលពីថ្ងៃ ១២ វិច្ឆិកា ដែលនេះមានន័យថា គ្មានឡើយកួរ៉ុមសម្រាប់ការតែងតាំងរបស់លោកស្រី។
ក៏ប៉ុន្តែលោកស្រី Anez បានអះអាងឲ្យដឹងថា រដ្ឋធម្មនុញ្ញបូលីវី បានអនុញ្ញាតឲ្យលោកស្រីក្លាយជាប្រមុខរដ្ឋរបស់ប្រទេសនេះ ក្រោយពីការលាលែងតំណែងរបស់ប្រធានាធិបតី និងអនុប្រធានាធិបតី។ ម្យ៉ាងទៀត លោកស្រី សង្កត់ធ្ងន់ថា លោកស្រី មានគម្រោងរៀបចំការបោះឆ្នោតថ្មីមួយនាពេលឆាប់ៗខាងមុខ ហើយធានាថា ប្រទេសបូលីវី មិនធ្លាក់ចូលក្នុងស្ថានការណ៍នយោបាយមួយដែលគ្មានអ្នកគ្រប់គ្រងអំណាច។
ពីប្រទេសម៉ិកស៊ិក អតីតប្រធានាធិបតីបូលីវី លោក Morales បានថ្កោលទោសចំពោះការប្រកាសនេះ ដោយចាត់ទុកថា «រដ្ឋប្រហារដ៏អន្តរាយបំផុតក្នុងប្រវត្តិសាស្ត្រ»។ តាមការចុះផ្សាយរបស់ទីភ្នាក់ងារព័ត៌មាន AP លោក បានបញ្ជាក់ថា មេដឹកនាំបក្សប្រឆាំងរូបនោះ បានប្រកាសខ្លួនឯងជាប្រធានាធិបតីស្តីទី ដោយគ្មានគូរ៉ុមផ្នែកនីតីបញ្ញាតិ្ត ហើយគាំទ្រដោយពួកបក្ខខ្លួនដូចជាកងកម្លាំងប្រដាប់អាវុធនិងប៉ូលិស ដែលដាក់គំនាបលើប្រជាជនបូលីវី។
សូមជម្រាបថា លោក Evo Morales បានចុះចេញពីតំណែងជាប្រធានាធិបតីបូលីវី កាលពីថ្ងៃអាទិត្យកន្លងទៅ ក្រោយពីផ្ទុះបាតុកម្មជាច្រើនសប្តាហ៍ជុំវិញលទ្ធផលបោះឆ្នោត។ អង្គការរដ្ឋអាមេរិក បានចេញរបាយការណ៍ រកឃើញភាពមិនប្រក្រតីជាច្រើន នៅក្នុងការបោះឆ្នោតប្រធានាធិបតីបូលីវី កាលពីថ្ងៃទី ២០តុលាកន្លងទៅ។ ទាក់ទិននឹងការសម្រេចចិត្តនេះ អតីតមេដឹកនាំរូបនេះ អះអាងថា លោកត្រូវបានបង្ខំឲ្យលាលែងតំណែង ក៏ប៉ុន្តែលោកសង្កត់ធ្ងន់ថា លោកសម្រេចចាកចេញពីតំណែងកំពូលនេះដោយឆន្ទះមួយគឺដើម្បីបញ្ចៀសការបង្ហូរឈាម។នោះគឺព្រោះតែលោកបាត់ការគាំទ្រពីខាងកងទ័ព និងប៉ូលិសបូលីវីដែរ៕
Tag:
បូលីវី
ម៉ិកស៊ិក
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
