អន្តរជាតិ
លោកនាយករដ្ឋមន្ត្រី ប្រាយុទ្ធ ចន្ទអូចា ចុះត្រួតពិនិត្យដោយផ្ទាល់នៅព្រលានយន្តហោះ សុវណ្ណភូមិ កាលពីថ្ងៃពុធ ៣០ មករា ឆ្នាំ២០២០ (ប្រភពរូប ការិយាល័យរដ្ឋាភិបាលថៃ)
×![]()
ក្រុមវេជ្ជបណ្ឌិតថៃ បានបញ្ជាក់ថា លោកនាយករដ្ឋមន្ត្រី ប្រាយុទ្ធ ចន្ទអូចា ពុំបានឆ្លងណូវែលកូរ៉ូណាវីរុស បន្ទាប់ពីលោកបានទៅត្រួតពិនិត្យអ្នកដំណើរដោយផ្ទាល់ នៅព្រលានយន្តហោះ សុវណ្ណភូមិ ។ រដ្ឋមន្ត្រីសុខភាពសាធារណៈថៃ Anutin Charnvirakul បញ្ជាក់បែបនេះនៅថ្ងៃព្រហស្បតិ៍ ៣០ ខែមករា។
ពាក្យចចាមអារ៉ាម បានផ្សាយយ៉ាងសុះសាយថា លោក ប្រាយុទ្ធ ប្រហែលឆ្លងជំងឺរលាកសួតដែលបង្កឡើងដោយកូរ៉ូណាវីរុសប្រភេទថ្មី ក្រោយលោកបានដាក់ច្បាប់ឈប់សម្រាក កាលពីថ្ងៃព្រហស្បតិ៍ ទី៣០ ខែមករា។ ពោលគឺមួយថ្ងៃប៉ុណ្ណោះ ក្រោយលោកបានទៅចុះត្រួតពិនិត្យអ្នកដំណើរដោយផ្ទាល់នៅព្រលានយន្តហោះសុវណ្ណភូមិ។
តាមការចុះផ្សាយរបស់កាសែតថៃ បាងកកប៉ុស្តិ៍ លោករដ្ឋមន្ត្រីថៃ Anutin Charnvirakul បានទាត់ចោលព័ត៌មាននេះ ដោយអះអាងថា សុខភាពលោកនាយករដ្ឋមន្ត្រី ប្រាយុទ្ធ មានបញ្ហាដោយសារតែការងារច្រើនពេក ហើយការឈប់សម្រាកនេះ ធ្វើឡើងតាមការណែនាំរបស់វេជ្ជបណ្ឌិត។ ក្រោយលោក ប្រាយុទ្ធ ឈប់សម្រាកមួយរយៈ ការងារលោកខ្លះ ត្រូវផ្ទេរទៅឲ្យលោករដ្ឋមន្ត្រី Anutin និងអនុរដ្ឋមន្ត្រីការពារជាតិថៃ ចាត់ចែងបន្ត។
ម្យ៉ាងវិញទៀត មន្ត្រីជាន់ខ្ពស់ម្នាក់មកពីក្រសួងសុខភាពសាធារណៈថៃ លោក Chaiyaporn Suchatsoonthorn បានប្រាប់បាងកកប៉ុស្តិ៍ ថា ស្ថានភាពសុខភាពរបស់លោក ប្រាយុទ្ធ គឺមិនជាប់ពាក់ព័ន្ធនឹងកូរ៉ូណាវីរុសដែលផ្ទុះឡើងដំបូងក្នុងក្រុងវូហាន ប្រទេសចិននោះទេ ។ ត្រង់នេះ លោក ពន្យល់ថា វីរុសដ៏កាចសាហាវនេះ ត្រូវការពេលយ៉ាងហោចណាស់ ៤ ថ្ងៃ ទើបវាចេញរោគសញ្ញាមកក្រៅ។
សូមបញ្ជាក់ថា គិតមកត្រឹមថ្ងៃ៣១ មករា នេះ ប្រទេស ថៃ បានរកឃើញករណីឆ្លងណូវែលកូរ៉ូណាវីរុសចំនួន ១៤ ករណីហើយ ដែលជាតួលេខខ្ពស់បំផុតមួយ ក្រៅពីប្រទេសចិន។ បច្ចុប្បន្ន វីរុសនេះ បានសម្លាប់មនុស្សដល់២១៣នាក់ហើយ ដែលសុទ្ធតែក្នុងប្រទេសចិនទាំងស្រុង។ ចំណែកករណីឆ្លងនៅទូទាំងពិភពលោក ឡើងជិត១ម៉ឺនករណី៕
Tag:
ថៃ
ប្រាយុទ្ធ ចន្ទអូចា
កូរ៉ូណាវីរុស
វូហាន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
