ជាតិ
រដ្ឋាភិបាលបន្តផ្តល់ជំនួយគាំពារសង្គម ៣ខែទៀត ដើម្បីជួយសេដ្ឋកិច្ចក្នុងវិបត្តិកូវីដ-១៩
សម្ដេច ហ៊ុន សែន ក្នុងពិធីសម្ពោធមជ្ឈមណ្ឌលកម្សាន្ត «ព្រីនស៍ ម៉ាណ័រ» ថ្ងៃទី៧តុលា ឆ្នាំ២០២០។ (រូបពីទំព័រហ្វេសប៊ុករបស់ SPM)
×![]()
ដោយ: ឡាយ សុភាវតី
ភ្នំពេញ៖ រដ្ឋាភិបាលសម្រេចផ្ដល់ជំនួយសង្គមដល់កម្មករ គ្រួសារក្រីក្រ និងវិស័យរងគ្រោះ រយៈពេល៣ខែទៀត ដើម្បីស្ដារនិងជំរុញកំណើនសេដ្ឋកិច្ច នៅក្នុងវិបត្តិជំងឺកូវីដ-១៩។ នេះបើតាមការលើកឡើងរបស់សម្ដេច ហ៊ុន សែន នាយករដ្ឋមន្រី្ត ក្នុងពីធីសម្ពោធមជ្ឈមណ្ឌលកម្សាន្ត ខ្នាតយក្សដំបូងនៅកម្ពុជា «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល។
ចាប់តាំងពីមានវិបត្តិកូវីដ-១៩ កម្ពុជាបានប្រកាសឲ្យអនុវត្ត «វិធានបន្ថែមដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចនៅក្នុងបរិការណ៍នៃវិបត្តិ និងការស្ដារ និងជំរុញកំណើនសេដ្ឋកិច្ឋកម្ពុជា ក្រោយពីវិបត្តិនៃជំងឺកូវីដ-១៩» ជុំទី៦ហើយ ដើម្បីរក្សាលំនឹងជីវភាពរបស់ប្រជាជននិងប្រតិបត្តិការឡើងវិញដល់សកម្មភាពផលិតកម្ម និងអាជីវកម្មក្នុងវិស័យដែលរងផលប៉ះពាល់។
នៅថ្ងៃទី៧តុលានេះ សម្ដេច ហ៊ុន សែន បានបញ្ជាក់ថា រដ្ឋាភិបាលនឹងបន្តជួយពលរដ្ឋ និងវិស័យដែលរងគ្រោះដោយសារកូវីដ-១៩ រយៈពេល៣ខែបន្ថែទៀត គិតចាប់ពីខែតុលា ដល់ធ្នូ ឆ្នាំ២០២០។ វិស័យទាំងនោះ រួមមានវិស័យកាត់ដេរនិងទេសចរណ៍ ដែលអនុញ្ញាតឲ្យព្យួរកិច្ចសន្យាការងារបន្ត រួមទាំងឧបត្ថម្ភប្រាក់៤០ដុល្លារក្នុងមួយខែ ដល់កម្មករ១នាក់ ។ លើសពីនេះ ក៏មានការលើកលែងការបង់ពន្ធប្រចាំខែគ្រប់ប្រភេទដល់ក្រុមហ៊ុនទេសចរណ៍ផងដែរ។
ចំពោះវិស័យអាកាសចរណ៍ រដ្ឋាភិបាលនឹងបន្តលើកលែងបង់ពន្ធអប្បបរមា៣ខែ និងបន្តពន្យារការបង់ប្រាក់ជំពាក់កម្រៃអាកាសចរស៊ីវិល ២ខែបន្ថែមទៀត រហូតដល់ដំណាច់ខែធ្នូឆ្នាំ២០២០។ ចំណែកកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក៏រដ្ឋាភិបាលនៅតែបន្ត រយៈពេល៣ខែទៀត ៕
Tag:
ជំនួយសង្គម
© រក្សាសិទ្ធិដោយ thmeythmey.com
