ជាតិ
ក្រោយមរណភាព លោក ហ៊ុន ណេង ត្រូវបានផ្ដល់គោរមងារជា «សម្ដេចឧត្តមទេពញាណ ហ៊ុន ណេង» រូបភាពពីទទក
× ភ្នំពេញ៖ លោក ហ៊ុន ណេង បងប្រុសបង្កើតសម្ដេច ហ៊ុន សែន ត្រូវបានព្រះមហាក្សត្រផ្ដល់គោរមងារជា «សម្ដេចឧត្តមទេពញាណ ហ៊ុន ណេង»។ នេះបើតាមព្រះរាជក្រឹត្យចុះថ្ងៃទី៧ ឧសភានេះ។
«សម្ដេចឧត្តមទេពញាណ ហ៊ុន ណេង» ជាគោរមងាររបស់លោក ហ៊ុន ណេង ដែលព្រះមហាក្សត្របានផ្ដល់ឱ្យក្រោយទទួលមរណភាពកាលពីថ្ងៃទី៥ ឧសភា។ ព្រះរាជក្រឹត្យរបស់ព្រះបាទសម្ដេចព្រះបរមនាថ នរោត្តម សីហមុនី បញ្ជាក់ថា៖ «ឯកឧត្តម ហ៊ុន ណេង ជាអ្នកដឹកនាំមានស្វាមីភក្ដិចំពោះរាជបល្ល័ង្គ ការពារ និងគោរពព្រះពុទ្ធសាសនា ការពារយុត្តិធម៌សង្គម ដើម្បីនិរន្តរភាពរាជានិយម នៃព្រះរាជាណាចក្រកម្ពុជា»។
ក្រោយលោក ហ៊ុន ណេង ទទួលបានគោរមងារជា «សម្ដេចឧត្តមទេពញាណ ហ៊ុន ណេង» សម្ដេច ហ៊ុន សែន បានបង្ហោះសារលើហ្វេសប៊ុកផេកពីការចូលរួមថែរក្សា ការពារ និងស្មោះត្រង់ចំពោះព្រះមហាក្សត្រ ចំពោះរាជបល្ល័ង្គ និងរបបរាជានិយម របស់ក្រុមគ្រួសារត្រកូនហ៊ុន។ សម្ដេច ហ៊ុន សែន លើកឡើងដូច្នេះ៖ «បងប្រុសទោះបីបងបានចែកឋានទៅហើយក្តីតែកេរ្តិ៍ឈ្មោះរបស់បងបានស្ថិតនៅជាមួយជាតិ សាសនា និងព្រះមហាក្សត្រជានិច្ច។ មុននេះបន្តិចព្រះមហាក្សត្រជាទីគោរពសក្ដារៈរបស់យើងបានប្រោសប្រទាននូវគោរមងារសម្រាប់បងគឺជា(សម្តេចឧត្តមទេពញាណ ហ៊ុន ណេង)»។
ទន្ទឹមនឹងនេះ សម្ដេច ក៏រំឭកពីការចូលរួមរបស់លោក ហ៊ុន ណេង ក្នុងការចូលរួមធ្វើបាតុកម្មប្រឆាំងរដ្ឋប្រហារ និងទាមទារប្រគល់តំណែងថ្វាយសម្តេចឪ កាលពីថ្ងៃ២៣ មីនា ១៩៧០។ សំណេររបស់សម្ដេច ហ៊ុន សែន លើហ្វេសប៊ុកផេក បន្តថា៖ «ប្អូនជឿជាក់ថាកូនចៅយើងទាំងអស់ នឹងដើរតាមផ្លូវដែលយើងបានដើរកន្លងមកដោយធានាដល់កិច្ចការពាររបបរាជានិយមការពារព្រះមហាក្សត្រ និងព្រះរាជបល្ល័ង្គ ដោយការស្មោះត្រង់»។
សូមបញ្ជាក់ថា លោក ហ៊ុន ណេង ប្រធានគណៈកម្មការទី៤នៃរដ្ឋសភា បានទទួលមរណភាពក្នុងអាយុ ៧២ឆ្នាំ ដោយសារជំងឺបេះដូង៕
© រក្សាសិទ្ធិដោយ thmeythmey.com