ខ្សែបម្រើសញ្ជាតិអេស្ប៉ាញ ដែលធ្លាប់ប្រកបអាជីពឱ្យក្លិបបាល់ទាត់ចំនួន៥​ បានជួយជម្រើសជាតិឈ្នះជើងឯក FIFA World Cup ឆ្នាំ២០១០ ជួយ Chelsea ឈ្នះ Premier League ២សម័យ និង Barcelona ឈ្នះ La Liga មួយលើក។ Arsenal ជាក្លិបកម្រិតអាជីពដំបូងរបស់ Fabregas ឯ Como 1907 នៃលីគទីពីរអ៊ីតាលី Serie B ជាក្លិបចុងក្រោយ។
 

នៅថ្ងៃទី២ ខែកក្កដា Fabregas បានបង្ហោះនៅលើបណ្តាញសង្គម Instagram ខ្លួនអំពីការបញ្ចប់អាជីពជាកីឡាករបាល់ទាត់នៅត្រឹមវ័យ៣៦ឆ្នាំ។ «វាជារឿងសោកសៅបំផុត ដែលដល់ពេលដែលខ្ញុំត្រូវព្យួរស្បែកជើងពីអាជីពកីឡាករបាល់ទាត់»។ Fabregas ប្រកាសដូច្នេះ ក្រោយលេងឱ្យ Como បានរយៈពេល​មួយ​ឆ្នាំដំបូង ស្របពេល​​កិច្ចសន្យា​របស់គូ​ជាមួយ​ក្រុម Serie B មានសុពលភាព២ឆ្នាំ។
  

យ៉ាងណាក៏ដោយ អតីតខ្សែបម្រើឆ្នើមក្រុមកាំភ្លើងធំបញ្ជាក់ថា ចូល​និវត្តន៍ពីកីឡាករបាល់ទាត់ ប៉ុន្តែរូបគេទទួលបានការងារថ្មីនៅក្លិប Como ​ជាអ្នក​បង្វឹក​ក្រុម​បម្រុង ​និង​ក្រុម​យុវជន​របស់ក្លិបអ៊ីតាលីមួយនេះ។
 

«វាមិនមែនជារឿងសោកសៅទាំងអស់នោះទេ ព្រោះថាឥឡូវនេះខ្ញុំត្រូវចូលដល់បន្ទាត់ថ្មី ដោយចាប់ផ្តើមបង្វឹកក្រុមឈុត B និង Primavera របស់ក្រុម Como 1907»។ នេះជាការបញ្ជាក់របស់ Fabregas មុនបន្ថែមថារូបគេពិតជារំភើបចិត្តចំពោះ​គម្រោង​របស់ក្លិប Como ហើយថាក្លិប Como បានផ្តល់មន្តស្នេហ៍ និងអន្តងបេះដូងរបស់គេតាំងពីនាទីដំបូងក្នុងក្លិបនេះ។
 

Fabregas លេចធ្លោខ្លាំងនៅពេលលេងឱ្យ Arsenal អំឡុងឆ្នាំ២០០៣ ដល់ឆ្នាំ២០១១ មុនទៅចូលរួមជាមួយ Barcelona ដល់ឆ្នាំ២០១៤។ ឆ្នាំ២០១៤ រូបគេបានផ្លាស់ទៅអង់គ្លេសវិញដោយចូលរួមជាមួយ Chelsea រយៈពេល៥រដូវកាល។ ផ្លាស់ទៅក្លិបបារាំង Monaco បាន៣រដូវកាលពីឆ្នាំ២០១៩ដល់២០២២ Fabregas ត្រូវបន្តដំណើរទៅអ៊ីតាលីដោយចូលរួមជាមួយ Como នៅឆ្នាំ២០២២ បាន១ដូវកាល មុនប្រកាសចូលនិវត្តន៍៕