កញ្ញា ចំរើន វិនា មន្រ្តីបច្ចេកទេសនៃនាយកដ្ឋានអភិវឌ្ឍន៍ទេសចរណ៍ និងវប្បធម៌ បាន​បញ្ជាក់​​ថា ការងារ​វង់ទស្សនានេះ គឺផ្តោតលើ​ការកែលម្អបរិស្ថាន​នៅជុំវិញប្រាសាទ​​ ដូចជា​ការ​កាត់លះមែកឈើខ្លះៗ, រៀបចំផ្លូវថ្មើរជើងជុំវិញប្រាសាទ, ​រៀបចំផ្ទាំងព័ត៌មានស្តី​ពីប្រវត្តិ​​ប្រាសាទ និង​ដាក់ស្លាកសញ្ញាបង្ហាញទិសដែលអាចឱ្យភ្ញៀវទេសចរជាតិ និងអន្តរជាតិ​ ​ស្វែង​​យល់​ដោយខ្លួនឯងបាន។ មន្រ្តីបច្ចេកទេសដដែលបន្តថា ​រង់​ទស្សនា​នេះ នឹងនាំ​ទេសចរ​ទាំ​ងឡាយឲ្យដើរទស្សនាបានគ្រប់ជ្រុងជ្រោយ និង​​ផ្តិត​យករូប​ភាព​ស្អាតៗនៃ​ប្រា​សាទ​​តាកែវ។​ ​ ជាមួយគ្នានេះ ភ្ញៀវទេសចរ អាចដើរ​ក្រោមម្លប់ឈើធម្មជាតិយ៉ាងត្រជាក់ មុននឹងមក​ដល់​ប្រាសាទ ដែលជាលក្ខណៈពិសេសមួយ​នៃប្រាសាទតាកែវ។

  

អាជ្ញាធរជាតិអប្សរា ក៏បានអំពាវនាវដល់ភ្ញៀវទេសចរជាតិ និងអន្តរជាតិទាំងអស់ ដែល​ចូល​មកទស្សនាប្រាង្គប្រាសាទនានាក្នុងរមណីដ្ឋានអង្គរ ត្រូវគោរពនូវក្រមប្រត្តិបត្តអង្គរ និង​ស្លាក​សញ្ញាផ្សេងៗនៅតាមប្រាសាទ ដើម្បីធានាបាន​សុខសុវត្ថិភាព សេចក្តីថ្លៃថ្នូរ ព្រមទាំង​លើកកម្ពស់​គុណតម្លៃបេតិកភណ្ឌអង្គរ​៕