ជាតិ
វីដេអូ
យុទ្ធនាការ និងព្រឹតិ្តការណ៍នានានៅឆ្នាំ២០២៤ ជាការតភ្ជាប់ទីផ្សារទេសចរណ៍ដ៏ធំ
× សៀមរាប៖ នៅឆ្នាំ២០២៤នេះ រាជរដ្ឋាភិបាលបានដាក់ចេញនូវយុទ្ធនាការ «ទស្សនាសៀមរាបឆ្នាំ២០២៤» និងជាឆ្នាំនៃការផ្លាស់ប្តូររវាងប្រជាជន និងប្រជាជនកម្ពុជា-ចិន និងឆ្នាំទេសចរណ៍កម្ពុជា-ឥណ្ឌា លើកទី១ ដើម្បីជួយឱ្យទេសចរណ៍មកទស្សនាកម្ពុជាកាន់តែច្រើន។ តាមរយៈព្រឹត្តិការណ៍ទាំងនេះ លោក សុខ សូកេន សង្ឃឹមថា កំណើនភ្ញៀវទេសចរនឹងកើនឡើង។
ក្នុងបទសម្ភាសន៍ទ្រង់ទ្រាយធំលើកដំបូងដល់អ្នកកាសែតមកពី៣២ស្ថាប័ន កាលពីថ្ងៃទី១៧ មីនា លោក សុខ សូកេន រដ្ឋមន្រ្តីក្រសួងទេសចរណ៍ មានប្រសាសន៍ថា នៅឆ្នាំ២០២៤នេះ ខេត្តសៀមរាប នឹងមានព្រឹត្តិការណ៍ជាបន្តបន្ទាប់ ដែលទាក់ទងនឹងវប្បធម៌ និងការតភ្ជាប់ទីផ្សារទេសចរណ៍ផ្សេងៗ។ បើតាមរដ្ឋមន្រ្តីក្រសួងទេសចរណ៍ ការបង្កើតព្រឹត្តិការណ៍នានានេះ គឺដើម្បីទាក់ទាញទេសចរ ជាពិសេសលើកទឹកចិត្តឱ្យមានសកម្មភាពជាច្រើននៅខេត្តសៀមរាប ដូចដែលរដ្ឋាភិបាលបានដាក់ចេញយុទ្ធនាការ «ទស្សនាសៀមរាបឆ្នាំ២០២៤»។
សូមអញ្ជើញទស្សនាវីដេអូខាងក្រោមដូចតទៅ៖
ក្រៅពីបង្កើតយុទ្ធនាការ «ទស្សនាសៀមរាបឆ្នាំ២០២៤» ក៏មានព្រឹត្តិការណ៍ឆ្នាំនៃការផ្លាស់ប្តូររវាងប្រជាជន និងប្រជាជនកម្ពុជា-ចិន និងឆ្នាំទេសចរណ៍កម្ពុជា-ឥណ្ឌា លើកទី១ផងដែរ។ «សកម្មភាពទាំងនេះ ខ្ញុំសង្ឃឹមថា នឹងអាចជួយទ្រទ្រង់បន្ថែមទៀត ទៅលើអ្វីដែលជាសកម្មភាពសេដ្ឋកិច្ចនៅក្នុងខេត្តសៀមរាប»។ នេះជាការលើកឡើងរបស់លោក សុខ សូកេន។
ជាមួយគ្នានេះ ក្រសួងទេសចរណ៍ ក៏នឹងតភ្ជាប់ជើងហោះហើរសំខាន់ៗបន្ថែមទៀត ដើម្បីជួយឱ្យទេសចរណ៍មកទស្សនាកម្ពុជាកាន់តែច្រើន។ លើសពីនេះ ក៏ជាឱកាសដើម្បីឧស្សាហកម្មទេសចរណ៍ដែលពាក់ព័ន្ធ អាចពង្រឹងសមត្ថភាពឆ្លើយតបទៅនឹងតម្រូវការរបស់ភ្ញៀវទេសចរ។
សូមបញ្ជាក់ថា កាលពីថ្ងៃទី១៥-១៧ខែ មីនា ក្លិបអ្នកកាសែតកម្ពុជា បានរៀបចំដំណើរទស្សនកិច្ចទៅកាន់ខេត្តសៀមរាប ដោយមានស្ថាបន័សារពត៌មានចូលរួមចំនួន ៣២ ស្ថាប័ន និងមានអ្នកសារព័ត៌មានចូលរួម ៤២ នាក់។ ក្នុងដំណើរទស្សនកិច្ចនេះ ក្រុមអ្នកសារព័ត៌មាន បានធ្វើដំណើរទៅកាន់ឧទ្យានកម្សាន្ត Angkor WildLife and Aquarium, អាកាសយានដ្ឋានអន្តរជាតិខេត្តសៀមរាបអង្គរ, ការជិះកន្ត្រកវិល ដែលខ្ពស់ជាងគេនៅខេត្តសៀមរាប, ជិះរថយន្ត Jeepទស្សនាភូមិព្រះដាក់ និងតំបន់ទេសចរណ៍កំពង់ភ្លុកជាដើម៕
Tag:
ទេសចរណ៍
សៀមរាប
សុខ សូកេន
© រក្សាសិទ្ធិដោយ thmeythmey.com